Yehowa Kɛ Hewalɛ Haa
1 Akɛ Yehowa webii lɛ, akɛ sanekpakpa lɛ shiɛmɔ nitsumɔ lɛ ewo wɔdɛŋ yɛ be mli ni wɔyaa nɔ wɔbaa wɔjeŋ “jogbaŋŋ yɛ jeŋmajiaŋbii lɛ ateŋ” lɛ. (1 Pet. 2:12; Mat. 24:14) Kulɛ, wɔnyɛŋ wɔtsu nitsumɔ nɛɛ yɛ wɔ nyɛmɔ naa yɛ bei ni mli wawai lɛ kɛ wɔ diɛŋtsɛ wɔgbɔjɔmɔi kɛ fatɔɔi lɛ ahewɔ. (2 Tim. 3:1-5) Kwɛ miishɛɛ ni wɔyɔɔ akɛ wɔbaanyɛ wɔya Yehowa ŋɔɔ kɛha yelikɛbuamɔ!
2 Bɔfo Paulo ŋmɛ etsui shi yɛ kaai babaoo mli. (2 Kor. 11:23-27) Te fee tɛŋŋ enyɛ edamɔ enɛɛmɛi anaa ni egbe nitsumɔ ni akɛwo edɛŋ lɛ naa lɛ? Yehowa ha lɛ “hewalɛ ni fa kɛteke nɔ.” (2 Kor. 4:7) Paulo kpɛlɛ ŋwɛi yelikɛbuamɔ ni tamɔ nɛkɛ nɔ, beni eŋma akɛ: “Minyɛɔ nii fɛɛ mifeɔ yɛ mɔ ni hãa mi hewalɛ lɛ nyɛmɔ naa.” (Filip. 4:13, New World Translation) Yehowa baaye abua wɔ nakai nɔŋŋ. Te wɔɔfee tɛŋŋ ni wɔnine ashɛ yelikɛbuamɔ nɛɛ nɔ?
3 Kɛtsɔ Daa Sɔlemɔ Nɔ: Yesu wo wɔ hewalɛ koni ‘wɔya nɔ wɔbi, wɔtao, ni wɔshi,’ ni wɔnijiaŋ akaje wui. (Luka 11:5-10) Ni wɔɔya nɔ wɔsɔle daa lɛ haa Yehowa naa bɔ ni wɔsusuɔ sane lɛ he waa wɔhaa, bɔ ni wɔsumɔɔ waa akɛ wɔnine aaashɛ nii lɛ nɔ, kɛ bɔ ni yiŋtoo ni wɔhiɛ lɛ ja ha. (Lala 55:18; 88:2, 14; Rom. 1:9-11) Paulo yɔse bɔ ni sɔlemɔ ni asɔleɔ daa lɛ he hiaa ha, beni ewo wɔ hewalɛ koni ‘wɔsɔle daa’ lɛ. (1 Tes. 5:17) Sɔlemɔ ji gbɛi titrii ni wɔtsɔɔ nɔ wɔhaa wɔnine shɛɔ Yehowa yelikɛbuamɔ nɔ lɛ ekome.
4 Kɛtsɔ Teokrase Gbɛtsɔɔmɔ Sɛɛnyiɛmɔ Nɔ: “Teokrase” shishitsɔɔmɔ ji Nyɔŋmɔ ni yɔɔ suɔmɔ lɛ nɔyeli. Wɔnáa enɔyeli lɛ he sɛɛ kɛtsɔ ehegbɛ ni suɔmɔ yɔɔ mli lɛ nɔkpɛlɛmɔ nɔ kɛ enitsɔɔmɔi lɛ asɛɛ ni wɔnyiɛɔ yɛ yiŋkpɛi bibii kɛ ewuji amli. “Tsulɔ anɔkwafo kɛ nilelɔ” lɛ damɔ shi kɛha teokrase nɔyeli yɛ shikpɔŋ nɛɛ nɔ. (Mat. 24:45-47) Kɛ wɔnine baashɛ Yehowa jɔɔmɔ nɔ lɛ, belɛ ekome ni wɔkɛ gbɛjianɔtoo ni “tsulɔ” lɛ kɛtsuɔ nii lɛ aaafee lɛ he miihia. (Okɛto Hebribii 13:17 he.) Yehowa baawo anɔkwa ni wɔyeɔ kɛ suɔmɔ ni wɔyɔɔ akɛ wɔɔtsu he nii lɛ he nyɔmɔ kɛtsɔ hewalɛ ni he hiaa wɔ lɛ ni ekɛaaha wɔ yɛ be ni sa mli lɛ nɔ.—Heb. 4:16.
5 Kɛtsɔ Wɔ Nyɛmimɛi lɛ ni Wɔɔbɛŋkɛ Amɛ lɛ Nɔ: Suɔmɔ ji Yesu kaselɔi lɛ akadimɔ nii. (Yoh. 13:34, 35) Yɛ subaŋi sɔrɔtoi ni wɔyɔɔ hewɔ lɛ, béi baanyɛ ate shi yɛ wɔteŋ, yɛ adesai asui sɔrɔtoi lɛ ahewɔ. Ehe miihia ni wɔmli ajɔ babaoo, ni wɔkɛke wɔteŋ mɔ fɛɛ mɔ kwraa. (Efes. 4:32) Enɛ haa efeɔ mlɛo akɛ wɔɔbɛŋkɛ wɔ nyɛmimɛi ni yɔɔ hemɔkɛyeli lɛ mli lɛ daa koni amɛtsuishiŋmɛɛ ni gbugbaaa yɛ kaa mli lɛ awo wɔ hewalɛ. “[Akɛni wɔle] akɛ nakai amanehului lɛ nɔŋŋ [wɔ] nyɛmimɛi ni yɔɔ je lɛŋ lɛ hu naa” hewɔ lɛ, wɔyɛ hewalɛ ni Nyɔŋmɔ kɛhaa lɛ ni wɔkɛaadamɔ nɔnyɛɛi ni tamɔ nakai nɔŋŋ lɛ anaa.—1 Pet. 5:9.
6 Kɛtsɔ Teemɔŋ Nikasemɔ he Gbɛjianɔtoo Kpakpa Nɔ: Ni wɔɔwaje wɔ jwɛŋmɔi kɛ wɔ tsui yɛ mumɔŋ lɛ yeɔ ebuaa wɔ ni wɔwuɔ wɔshiɔ Satan tutuamɔ. (1 Pet. 5:8) Teemɔŋ nikasemɔ ni wɔɔto he gbɛjianɔ jogbaŋŋ lɛ baaha Nyɔŋmɔ nilee ni wɔyɔɔ lɛ afa. Wɔbaanyɛ wɔna Nyɔŋmɔ nilee nɛɛ he sɛɛ yɛ be mli ni wɔkɛ daa gbi naagbai kpeɔ lɛ. Paulo ma nɔ mi akɛ “anɔkwa nilee” lɛ tsuɔ gbɛfaŋnɔ ni he hiaa yɛ yiwalaheremɔ mli. (1 Tim. 2:3, 4, NW) Ehe miihia ni wɔye mumɔŋ niyenii daa.
7 Nibii fɛɛ ni he hiaa ni baaye abua ni wɔya nɔ wɔna hewalɛ lɛ bɛŋkɛ wɔ kpaakpa kɛtsɔ Kristofoi asafo lɛ nɔ. Emli nitsumɔi ni wɔkɛ wɔtsui fɛɛ baafi sɛɛ lɛ baaha “wɔnyiɛ ni etɔŋ wɔ.”—Yes. 40:29-31, NW.