Feemɔ Mɔ ni Tswaa Mɔ Emaa Shi

¹ Akɛni wɔyɛ “jaramɔ bei” amli hewɔ lɛ, hewalɛwoo he hiaa wɔ fɛɛ. (2 Tim. 3:1) Yɛ bɔ ni ele hiamɔ nɛɛ jogbaŋŋ yɛ egbii lɛ amli po hewɔ lɛ, Paulo miisumɔ waa ni ekɛ sharamɔ ni ekɛ enyɛmimɛi lɛ naa lɛ atsu nii akɛ hegbɛi kɛha ‘hewalɛwoo ni amɛkɛaaha amɛhe.’ Ewo enyɛmimɛi lɛ hewalɛ ni ‘amɛtiu nibii ni amɛkɛaaha amɛnanemɛi anane amɔ shi’ lɛ asɛɛ. (Rom. 1:11, 12; 14:19) Nɛkɛ mɔdɛŋbɔi nɛɛ ye omanye ni “amɛwo kaselɔi lɛ amumɔŋ wala lɛ hewalɛ, ni amɛwie amɛtsɔɔ amɛ, akɛ amɛhiɛ hemɔkɛyeli lɛ mli.” (Bɔf. 14:22) Hewalɛwoo ni tamɔ nakai he miihia wɔ waa ŋmɛnɛ.

² Wɔbaanyɛ wɔtswa mɛi krokomɛi wɔma shi kɛtsɔ wɔ wiemɔ nɔ. Kɛ wɔkɛtsu nii jogbaŋŋ lɛ, wɔ wiemɔi baanyɛ afee “tamɔ shika akutui yɛ jwiɛtɛi kpanyai amli.” (Abɛi 25:11) Kɛ wɔkɛ wɔhe wo kpeei amli lɛ, ‘wɔwoɔ wɔhe hewalɛ.’ (Heb. 10:25) Wɔbaanyɛ wɔkɛ wɔlilɛi atsu nii yɛ gbɛ kpakpa nɔ kɛji wɔmiigba niiashikpamɔi, wɔmiijie mɛi ayi, aloo wɔmiisusu mumɔŋ saji ahe. Lilɛi lɛ kɛ nitsumɔ yɛ gbɛ kpakpa tamɔ nɛkɛ nɔ lɛ ‘hi, ni ehaa mɔ nane mɔɔ shi, ni eduroɔ mɛi ni nuɔ lɛ.’—Efes. 4:29.

³ Wiemɔ Nibii ni Tswaa Mɔ Emaa Shi He: Paulo kɛ wɔ wiemɔ he gbɛtsɔɔmɔi ni yeɔ ebuaa eha yɛ Filipibii 4:8. Ekɛɛ esa akɛ wɔsusu nii abɔ ni ji anɔkwale, nii ni sa woo, nii ni ja, nii ni he tse, nii ni adɔɔ he, nii ni yɔɔ gbɛi kpakpa, jeŋba kpakpa, kɛ nii ni sa yijiemɔ lɛ ahe. Wɔbaanyɛ wɔna nɔmimaa be fɛɛ be akɛ nɔ ni wɔwieɔ lɛ baafee anɔkwale ni ehe baaba sɛɛnamɔ eha mɛi krokomɛi, kɛji edamɔ Nyɔŋmɔ Wiemɔ lɛ nɔ. (Yoh. 17:17) Wɔ Kristofoi ahenɔjɔɔmɔ, nɔ ni wɔkaseɔ yɛ asafoŋ kpeei ashishi, bɔ ni wɔtsuɔ wɔsɔɔmɔ nitsumɔ lɛ jogbaŋŋ kɛmɔɔ shi, kɛ saji krokomɛi ni tamɔ nakai lɛ ji nii ni sa woo. Eka shi faŋŋ akɛ sanegbaai ni tswaa mɔ emaa shi, ni kɔɔ tɛi kɛ shishitoo mlai ni yɔɔ Nyɔŋmɔ Wiemɔ lɛ mli lɛ ahe lɛ baaye abua wɔ ni ‘wɔna nilee kɛha yiwalaheremɔ.’ (2 Tim. 3:15) Wɔbaanyɛ wɔjie hiɛsɔɔ kpo yɛ jeŋba kpakpa ni mɛi ni yɔɔ Yehowa asafo ni he tse lɛ mli lɛ jieɔ lɛ kpo lɛ he. Wɔbaanyɛ wɔjie suɔmɔ nifeemɔi ni tsɔɔ wɔnyɛmimɛi lɛ amlihilɛ lɛ yi. (Yoh. 13:34, 35) Nibii ni awieɔ he ekpakpa lɛ ekomɛi ji Kristofoi asui kpakpai ni ji hemɔkɛyeli, miishɛɛ, toiŋjɔlɛ, kɛ tsuishitoo ni wɔnaa yɛ wɔnyɛmimɛi ahe lɛ. Nibii kpakpai kɛ nibii ni sa yijiemɔ tamɔ enɛɛmɛi ahe sanegbaa ‘hi ni ehaa mɛi krokomɛi anane mɔɔ shi.’—Rom. 15:2.

⁴ Daa gbi lɛ, wɔkɛ je lɛŋ haomɔi ni haa mɔ nijiaŋ jeɔ wui lɛ kpeɔ. Kwɛ bɔ ni ehaa wɔ hejɔɔmɔ akɛ wɔkɛ enɛɛmɛi aaashwie afã ni wɔkɛ wɔnyɛmimɛi lɛ ana naanyobɔɔ ni suɔmɔ yɔɔ mli! Be kpakpa ni wɔnyɛɔ wɔkɛ amɛ yeɔ kutuu lɛ ji jwetri ko ni esa akɛ wɔbu lɛ waa. Kɛ wɔwoɔ mɛi hewalɛ ni wɔtswaa amɛ wɔmaa shi be fɛɛ be lɛ, no lɛ, mɛi krokomɛi baawie yɛ wɔhe lɛlɛŋ akɛ: ‘Amɛha mimumɔ ewo etsui.’—1 Kor. 16:18.