Nyɛwowoa Nyɛhe Hewalɛ Beni Nyɛtsuɔ Shiɛmɔ Nitsumɔ Lɛ
1 Wɔteŋ mɔ fɛɛ mɔ náa miishɛɛ waa kɛ́ enine shɛ hewalɛwoo “wiemɔ ni awie yɛ be ni sa mli” lɛ nɔ. (Abɛi 25:11) Kɛ́ wɔkɛ mɛi krokomɛi miitsu nii yɛ shiɛmɔ nitsumɔ lɛ mli lɛ, te wɔɔfee tɛŋŋ wɔha wɔsanegbai afee nɔ ni woɔ mɔ hewalɛ lɛ?
2 Sanegbaa ni Woɔ Mɔ Hewalɛ: Kɛ́ wɔkɛ wɔnyɛmimɛi ni wɔkɛtsuɔ nii yɛ shiɛmɔ nitsumɔ lɛ mli lɛ gba saji ní haa wekukpaa ni kã wɔ kɛ Nyɔŋmɔ teŋ lɛ mli waa lɛ, ewoɔ wɔ fɛɛ hewalɛ waa! (Lala 37:30) Wɔbaanyɛ wɔwie shiɛmɔ wiemɔ ni wɔkɛbaatsu nii lɛ loo niiashikpamɔ ko ni wɔná yɛ shiɛmɔ nitsumɔ lɛ mli nyɛsɛɛ nɛɛ lɛ he. (Bɔf. 15:3) Ani wɔkase nɔ ko ni yɔɔ miishɛɛ kɛjɛ wɔ aŋkro Biblia kanemɔ, woji tɛtrɛbii ni je kpo nyɛsɛɛ nɛɛ, aloo asafoŋ kpee ko ní wɔtee lɛ mli? Wɔbaanyɛ wɔgba saji otii komɛi ni je kpo yɛ maŋshiɛmɔ ko ní aha nyɛsɛɛ nɛɛ yɛ Maŋtsɛyeli Asa lɛ nɔ lɛ ahe sane.
3 Kɛ́ shiatsɛ ko tée sane ko shi ni wɔnyɛɛɛ he nii wɔtsu lɛ, wɔnijiaŋ baanyɛ aje wui. Ebaafee nɔ ni sɛɛnamɔ yɔɔ he akɛ beni wɔshi shiatsɛ lɛ sɛɛ lɛ, wɔkɛ minitii fioo ko aaasusu bɔ ni ebaabi ni wɔtsu shihilɛ ni tamɔ nakai lɛ he nii be kroko, ekolɛ kɛtsɔ Reasoning wolo lɛ mli ni wɔɔkwɛ lɛ nɔ. Agbɛnɛ kɛ́ wɔhiɛ sɔ nɔ ko ni mɔ ni fata wɔhe lɛ fee beni ekɛ shiɛmɔ wiemɔ lɛ haa lɛ, wɔbaanyɛ wɔjɛ anɔkwayeli mli wɔjie eyi, ni enɛ baawo lɛ hewalɛ waa.
4 Bo Klɛŋklɛŋ Ŋɔɔ Hegbɛ Lɛ: Ani wɔkɛ mɛi komɛi yɛ woloŋ nikasemɔ kuu kome mli ni wɔkɛ amɛ tsu nii yɛ shiɛmɔ nitsumɔ lɛ mli be saŋŋ nɛ? Wɔbaanyɛ ‘wɔwowoo wɔhe hewalɛ’ kɛtsɔ nine ni wɔɔfɔ̃ wɔtsɛ mɔ ko ni tamɔ nɛkɛ, ní wɔkɛ lɛ atsu nii yɛ shiɛmɔ nitsumɔ lɛ mli lɛ nɔ. (Rom. 1:12) Gbɛgbalɔi kɛ gbɛgbalɔi awalɔi náa miishɛɛ kɛ́ mɛi krokomɛi fata amɛhe kɛtsu shiɛmɔ nitsumɔ lɛ, titri lɛ, leebi mra aloo gbɛkɛnaashi, beni shiɛlɔi fioo ko pɛ shiɛɔ lɛ. Wɔbaanyɛ wɔye wɔbua gbɛgbalɔi lɛ kɛtsɔ shiɛmɔ ni wɔkɛ amɛ aaaya lɛ nɔ. Ani shiɛlɔ ko yɛ ni gbɔmɔtsoŋ hewalɛ ni enaaa hewɔ lɛ enyɛɛɛ etsu shiɛmɔ nitsumɔ lɛ bɔ ni etaoɔ? Ekolɛ gbɛjianɔ ni wɔɔto koni mɔ nɛɛ afata wɔhe kɛya shiɛmɔ, loo ekolɛ efata wɔhe kɛfee Biblia mli nikasemɔ ko lɛ baaye abua wɔ kɛ lɛ fɛɛ.—Abɛi 27:17.
5 Yijiemɔ ni akɛhaa kɛ hiɛsɔɔ kpo ni ajieɔ yɛ nibii bibii po amli lɛ woɔ mɔ hewalɛ be fɛɛ be. Esa akɛ wɔha enɛ ahi wɔjwɛŋmɔ mli beni wɔkɛ mɛi tsuɔ nii yɛ shiɛmɔ nitsumɔ lɛ mli lɛ, akɛni wɔmiitao ni ‘mɔ fɛɛ mɔ aha enaanyo nane amɔ shi’ lɛ hewɔ.—1 Tes. 5:11.