Kpee Krɛdɛɛ Gbi He Gbɛjianɔtoo Hee
1 Mɛni hewɔ esa akɛ wɔjaje sanekpakpa lɛ ni wɔnijiaŋ ejeee wui? Mɛɛ nibii ataoɔ yɛ sanekpakpa lɛ he shiɛlɔ kpakpa lɛ he? Te mɛi ni hiɛ gboɔ loo amɛsheɔ gbeyei po lɛ aaafee tɛŋŋ ni amɛnyɛ amɛŋɔ hegbɛ lɛ ni amɛkɛ mɛi krokomɛi agba sanekpakpa lɛ he sane? Abaaha enɛ kɛ saji krokomɛi ni teeɔ sane hesusumɔ shi lɛ ahetoo yɛ kpee krɛdɛɛ gbi he gbɛjianɔtoo hee ni jeɔ shishi yɛ August ni yitso ji “Wɔsa akɛ Sanekpakpa lɛ he Sɔɔlɔi” lɛ mli.—Okɛto 2 Korintobii 3:5 he.
2 Akɛ Yehowa webii lɛ, esa akɛ wɔsusu wɔ jeŋba he jogbaŋŋ. Gbekɛbii ni baagba bɔ ni amɛfee amɛte shi amɛwo tipɛŋfoi anɔnyɛɛ lɛ kɛ niiashikpamɔi ni woɔ mɔ hewalɛ baaha. Nɔ ni akɛbaaha fɔlɔi ji hewalɛwoo ni suɔmɔ yɔɔ mli, ni tsɔɔ bɔ ni ehe hiaa ni amɛtsɔse amɛbii akɛ Nyɔŋmɔ sɔɔlɔi. Abaaye abua wɔ fɛɛ koni wɔle bɔ ni ehe hiaa akɛ wɔɔshiɛ kɛ agbɛnɛ jɔɔmɔi ni jɛɔ mli kɛbahaa wɔ kɛ mɛi ni boɔ wɔ toi lɛ.—1 Tim. 4:16.
3 Eka shi faŋŋ akɛ baptisimɔ lɛ baafee sane oti ni abaama nɔ mi nakai gbi lɛ. Dani nifeemɔ nɛɛ aaaba mli lɛ, abaaha wiemɔ ni damɔ Biblia nɔ ni kɛ mɛi heei ni ejɔɔ amɛhe nɔ ehee lɛ baawie tɛ̃ɛ. Shi kɛlɛ, mɛi fɛɛ ni eba lɛ baasumɔ ni amɛbo sane lɛ toi jogbaŋŋ yɛ be mli ni agbaa baptisimɔ he sane ni ahaa eshishinumɔ feɔ faŋŋ lɛ. Esa akɛ mɔ fɛɛ mɔ ni baasumɔ ni abaptisi lɛ yɛ kpee krɛdɛɛ gbi lɛ shishi lɛ aha onukpai asɛinɔtalɔ lɛ ale enɛ kɛtsɔ hiɛ kwraa, koni ena be ni fa ni eto gbɛjianɔ ni onukpai kɛ mɛi ni abaabaptisi amɛ lɛ atĩ saji ni ato he gbɛjianɔ lɛ mli.
4 Sane oti kroko ni abaama nɔ mi lɛ baafee wiemɔ krɛdɛɛ ni kpokpaa wulu nɔkwɛlɔ loo wielɔ ni ahala lɛ lɛ kɛbaaha. Sane lɛ yitso ji “Wɔsa ni Awaje Wɔ akɛ Nyɔŋmɔ Sɔɔlɔi.” Abaasusu nibii titrii ejwɛ ni baawaje wɔ akɛ sɔɔlɔi lɛ ahe, ni niiashikpamɔi ni tswaa hemɔkɛyeli emaa shi lɛ baafata wiemɔ lɛ he.
5 Too gbɛjianɔ bianɛ ni oyabo wiemɔ he gbɛjianɔtoo muu lɛ fɛɛ toi. Kwɛmɔ ni ofɔ nine otsɛ mɛi ni yɔɔ wiemɔ lɛ he miishɛɛ kɛ Biblia kaselɔi, kɛ agbɛnɛ shiɛlɔi ni ekpa shiɛmɔyaa lɛ, koni amɛ hu amɛnyɛ amɛna nɛkɛ gbi nɛɛ mli teokrase tsɔsemɔ lɛ he sɛɛ. Wɔbaanyɛ “wɔfee mɛi ni sa” akɛ sanekpakpa lɛ he sɔɔlɔi kɛtsɔ nɛkɛ gbɛ nɔ.