Ye Obua Mɛi Fɛɛ ni Amɛkɛ Amɛhe Awo Sɔɔmɔ lɛ Mli Daa

¹ Yɛ be mli ni jeŋ momo nɛɛ nɔnyɛɛi lɛ amli waa lɛ, belɛ mumɔŋ gbɔjɔmɔ he oshara lɛ hu miifa. Amaniɛbɔɔ etsɔɔ akɛ, shiɛlɔi babaoo kɛ amɛhe wooo shiɛmɔ nitsumɔ lɛ mli daa, ni mɛi komɛi hu efee kpɔkee. Akɛ nɔkwɛmɔnɔ lɛ, nyɛsɛɛ nɛɛ amaniɛbɔɔ ni akɛha lɛ tsɔɔ akɛ yɛ asafo ko mli lɛ, shiɛlɔi 71 lɛ ateŋ mɛi 22 kɛ amɛhe wooo sɔɔmɔ lɛ mli! Mɛni baaha mɔ ko aha nyɔŋ muu fɛɛ aho ni ekɛ ehe wooo nitsumɔ ni he hiaa nɛɛ mli?

² Hela ko ni naa wa, shiɛmɔyaa ni atsiɔ atoɔ aahu kɛyashiɔ nyɔŋ lɛ naagbee, kɛkɛ lɛ shihilɛ ko ni akpaaa gbɛ ebatsi mɔ lɛ naa koni ekanyɛ ekɛ ehe wo sɔɔmɔ lɛ mli, hiɛsɔɔ ni abɛ kɛha sɔɔmɔ nitsumɔ lɛ, kɛ oyaiyeli henumɔ ni abɛ ni kɔɔ bɔ ni Satan je lɛ ebɛŋkɛ enaagbee lɛ he ji nibii komɛi ni kɛ enɛ baa. (2 Kor. 4:7; 2 Pet. 3:11, 12) Bɔ fɛɛ bɔ ni sane lɛ ji fɛɛ sɛɛ lɛ, wɔmiisumɔ ni wɔye wɔbua amɛ fɛɛ koni amɛkɛ amɛhe awo sɔɔmɔ lɛ mli daa.

³ Nɔ ni Wɔbaanyɛ Wɔfee: Ní wɔɔha ehi wɔjwɛŋmɔ mli akɛ ekɔɔ wala he lɛ baaye abua wɔ koni wɔkɛ hegbɛ fɛɛ ni wɔɔna lɛ ajaje Biblia mli anɔkwalei lɛ wɔtsɔɔ mɛi krokomɛi. (Rom. 10:8-10) Esaaa akɛ wɔkpa shɛɛ sane ni kɔɔ wala he ni wɔɔgba gbɔmɛi ni wɔkɛ amɛ kpeɔ yɛ be mli ni wɔfaa gbɛ lɛ mli. Ní wɔɔtswa wɔfai shi akɛ wɔɔna sɔɔmɔ nitsumɔ lɛ mli gbɛfaŋnɔ yɛ nyɔŋ lɛ shishijee mli lɛ baajie he ni akɛwooo shiɛmɔ lɛ mli lɛ kɛya.—Jaj. 11:6.

⁴ Nɔ ni Mɛi Krokomɛi Baanyɛ Afee: Bei komɛi lɛ, nɔ ni he hiaa kɛkɛ ji, ekaawoo wiemɔ. Ekaawoo ni akɛaaha lɛ ji mɔ fɛɛ mɔ nitsumɔ. (Heb. 10:25) Mɔ fɛɛ mɔ baanyɛ ekɛ mɛi ni eyako shiɛmɔ lɛ afata amɛ shiɛmɔ nitsumɔ he gbɛjianɔtoo lɛ he. Kɛ gbɔmɛi ni tamɔ nakai lɛ bɛ hewalɛ loo amɛmiikwɛ abifabii lɛ, ebaahi akɛ wɔɔfɔ̃ wɔ Biblia kaselɔi komɛi nine kɛba amɛ shiai amli, koni amɛ hu amɛnyɛ amɛna gbɛfaŋnɔ yɛ nikasemɔ lɛ mli, ni amɛkafee shiɛlɔi ni eyako shiɛmɔ.

⁵ Esa akɛ onukpai lɛ abɔ mɔdɛŋ ni amɛle shihilɛi amli ni mɔ fɛɛ mɔ ni yɔɔ asafo lɛ mli lɛ yɔɔ, kɛ amɛhiamɔ nii, bɔni afee ni amɛjɛ suɔmɔ mli amɛkɛ yelikɛbuamɔ aha. (Abɛi 27:23) Esa akɛ yɛ onukpai lɛ akpeei amli lɛ, amɛkadi shiɛlɔi fɛɛ ni eyako shiɛmɔ lɛ, ni amɛsusu yelikɛbuamɔ ni amɛkɛaaha amɛ lɛ he.

⁶ Yɛ nyɔŋ fɛɛ nyɔŋ nɔ lɛ, esa akɛ woloŋmalɔ lɛ kɛ mɛi ni kɛ amɛ shiɛmɔyaa he akɔntaabuu hako lɛ agbɛi aha Asafo Woloŋ Nikasemɔ nɔkwɛlɔi lɛ, bɔni afee ni anyɛ aye abua amɛ oya. Esa akɛ nikasemɔ nɔkwɛlɔ lɛ kɛ mlihilɛ anina mɛi ni eyaaa shiɛmɔ lɛ koni amɛle nɔ ni tsi amɛnaa, koni amɛto gbɛjianɔ jogbaŋŋ ni amɛkɛ amɛ afee ekome kɛtsu nii loo amɛha shiɛlɔ kroko ni eda yɛ mumɔŋ loo gbɛgbalɔ ko afee nakai. Ŋaawoi ni anyɛɔ atsuɔ he nii ni kɔɔ be he gbɛjianɔ ni atoɔ ni hi kɛha aŋkroaŋkroi lɛ ashihilɛi hu baaye abua. Ŋaawoi krokomɛi babaoo yɛ November 1992 Wɔ Maŋtsɛyeli Sɔɔmɔ lɛ baafa 7 lɛ mli.

⁷ Esa akɛ wɔ fɛɛ wɔfee klalo koni wɔkɛ hegbɛ fɛɛ ni wɔɔna lɛ atsu nii kɛshiɛ sanekpakpa lɛ. Enɛ feemɔ, kɛ agbɛnɛ lɛ, wɔ shiɛmɔyaa he akɔntaabuu ni wɔkɛaaha oya yɛ nyɔŋ fɛɛ nyɔŋ naagbee mli lɛ baama nɔ mi akɛ wɔkɛ wɔhe woɔ sɔɔmɔ lɛ mli daa.—1 Kor. 15:58.