Suɔmɔ Mli ni Wɔɔjɛ Wɔkɛ Wɔhe Aha Nitsumɔ Kpakpa Fɛɛ Nitsumɔ Kpakpa
1 Je lɛŋ wolo ko wie Yehowa Odasefoi ahe akɛ: “Ebaanyɛ efee nɔ ni wa akɛ ooona jamɔ kui krokomɛi amlibii ni tsuɔ amɛ jamɔ lɛ he nii waa diɛŋtsɛ tamɔ bɔ ni Odasefoi feɔ lɛ.” Mɛni hewɔ Yehowa Odasefoi tsuɔ nii waa nɛkɛ ni amɛkɛ mumɔ ni sumɔɔ nifeemɔ tamɔ nɛkɛ feɔ lɛ?
2 Yiŋtoo lɛ ekome ji hiamɔ henumɔ ni kanyaa amɛ lɛ. Yesu yɔse akɛ eshwɛ lɛ be fioo ko ni ekɛaagbe enitsumɔ lɛ naa yɛ shikpɔŋ nɔ. (Yoh. 9:4) Yɛ be mli ni Nyɔŋmɔ Bi ni awo ehiɛ nyam lɛ yaa nɔ eyeɔ nɔ yɛ ehenyɛlɔi ateŋ ŋmɛnɛ lɛ, Yehowa webii yɔseɔ akɛ eshwɛ amɛ be fioo ko ni amɛkɛaatsu amɛ nitsumɔ lɛ. No hewɔ lɛ, amɛyaa nɔ amɛjɛɔ amɛsuɔmɔ mli amɛkɛ amɛhe haa kɛha sɔɔmɔ krɔŋŋ lɛ. (Lala 110:1-3) Akɛni nitsulɔi babaoo he miihia kɛha nikpamɔ lɛ hewɔ lɛ, amɛnyɛŋ amɛgbɔjɔ amɛ mɔdɛŋbɔɔ lɛ mli. (Mat. 9:37, 38) No hewɔ lɛ, amɛbɔɔ mɔdɛŋ ni amɛkase Yesu ni fee suɔmɔ ni ayɔɔ kɛha nifeemɔ, kɛ ekãa ni ajieɔ lɛ kpo he nɔkwɛmɔ nɔ ni yeɔ emuu ni efee efɔ shi yɛ enitsumɔ lɛ mli lɛ.—Yoh. 5:17.
3 Yiŋtoo kroko hewɔ ni Yehowa Odasefoi jɛɔ susuma muu fɛɛ mli amɛtsuɔ nii akɛ amɛmiitsu amɛmiiha Yehowa ji akɛ, esoro amɛ jeŋ muu fɛɛ gbɛjianɔtoo lɛ yɛ kui krokomɛi fɛɛ he. Je lɛŋ jamɔŋ gbɛjianɔtoi lɛ kpaa be kɛ mɔdɛŋbɔɔ fioo ko pɛ gbɛ kɛjɛɔ amɛ sɛɛnyiɛlɔi lɛ adɛŋ. Nɔ ni amɛheɔ amɛyeɔ lɛ náa hewalɛ fioo ko yɛ amɛ daa gbi shihilɛi, kɛ bɔ ni amɛkɛ mɛi krokomɛi yeɔ amɛhaa, loo nibii ni amɛtiuɔ sɛɛ yɛ shihilɛ mli lɛ nɔ, loo enaaa amɛnɔ hewalɛ ko kwraa. Akɛni amɛbɛ anɔkwa hemɔkɛyeli mli hewalɛ ni kanyaa mɔ hewɔ lɛ, ámɛtee nɔ amɛha amɛ tookwɛlɔi lɛ ‘kɛ amɛ ewie naadɔkɔmɔ wiemɔi,’ ni ámɛha amɛna nɔmimaa akɛ mɔdɛŋ fioo ko ni amɛnyɛɔ amɛbɔɔ lɛ kɛkɛ fa. (Yes. 30:10) Amɛ osɔfoi lɛ enyɛ amɛnɔ kɛtsɔ ‘amɛtoiiaŋ fɛ̃lɛmɔ’ nɔ, ni amɛduɔ henumɔ ni abɛ kɛ mumɔŋ hejɔfeemɔ amɛwoɔ amɛmli.—2 Tim. 4:3.
4 Kwɛ bɔ ni etamɔɔɔ nakai yɛ Yehowa webii ateŋ! Mɔdɛŋbɔɔ, hiɛmiamɔ, kɛ nitsumɔ fata nɔ fɛɛ nɔ ni kɔɔ wɔ jamɔ lɛ he lɛ he. Wɔtsuɔ nɔ ni wɔheɔ wɔyeɔ lɛ he nii daa gbi yɛ nɔ fɛɛ nɔ ni wɔfeɔ lɛ mli. Yɛ be mli ni anɔkwale lɛ kɛ mlifilimɔ babaoo bahaa wɔ lɛ, ebiɔ “pelemɔ babaoo” koni wɔtsu nɔ ni ekpaa gbɛ lɛ he nii. (Okɛto 1 Tesalonikabii 2:2 he.) Daa gbi shihilɛ mli gbɛnaa nii ahe nitsumɔ pɛ lɛ kɛkɛ fa bɔ ni aaaha mɛi babaoo aya nɔ afee mɛi ni naaa dekã. Shi kɛlɛ, wɔŋmɛɛɛ gbɛ ni naagbai nɛɛ atsi wɔnaa kɛjɛ Maŋtsɛyeli lɛ he nibii ni wɔkɛaaye klɛŋklɛŋ gbɛhe lɛ he.—Mat. 6:33.
5 Nɔ ni akɛhaa wɔ ni wɔfee yɛ Yehowa sɔɔmɔ mli lɛ he yɛ sɛɛnamɔ, ni ehe miihia aahu akɛ etsirɛɔ wɔ ni ‘wɔhe’ be kɛjɛ nibii krokomɛi ni atiuɔ sɛɛ lɛ amli koni wɔkɛtsu mumɔŋ saji ahe nii ni ehe aba sɛɛnamɔ babaoo. (Efes. 5:16) Akɛni wɔle akɛ wɔ Nyɔŋmɔjamɔ hetuu-kɛhamɔ kɛ mumɔ ni sumɔɔ nitsumɔ lɛ ŋɔɔ Yehowa naa hewɔ lɛ, wɔyɛ nɔ ni kanyaa wɔ fe fɛɛ ni baaha wɔya nɔ wɔtsu nii waa. Akɛni wɔnine shɛɔ jɔɔmɔi babaoo nɔ amrɔ nɛɛ, kɛ wala ni baaba lɛ he gbɛkpamɔi ni wɔyɔɔ hewɔ lɛ, wɔ faishitswaa ji ni wɔya nɔ ‘wɔgbo deŋme’ yɛ Maŋtsɛyeli nitsumɔi lɛ ahewɔ.—1 Tim. 4:10.
6 Hetuu-kɛhamɔ kɛ He-kɛ-Afɔleshaa Mumɔ: Mɛi babaoo yɛ ŋmɛnɛ ni kɛ heloonaa hiamɔ nii kɛ nibii ni asumɔɔ lɛ yeɔ nɔ fɛɛ nɔ hiɛ. Amɛnuɔ he akɛ amɛsane ja yɛ amɛjwɛŋmɔ ni amɛkɛmaa nɔ ni amɛbaaye, amɛbaanu, loo nɔ ni amɛbaawo lɛ nɔ hewɔ. (Mat. 6:31) Akɛni amɛtsui enyɔko amɛmli yɛ hiamɔ nibii ahe hewɔ lɛ, oti ni tsɔɔ shihilɛ ni haa mɔ mii shɛɔ ehe ni anaa mli ŋɔɔmɔ kɛmɔɔ shi kwraa bianɛ kɛ ‘nii babaoo ni aŋɔ-to afii pii, koni amɛnyɛ amɛjɔɔ amɛhe, amɛye, amɛnu, ni amɛmii ashɛ amɛhe’ ni amɛkɛma amɛhiɛ lɛ kanyaa amɛ. (Luka 12:19) Mɔ ni yaa sɔlemɔ waa lɛ nuɔ he akɛ, mɔdɛŋ fɛɛ ni eeebɔ ni ejamɔ lɛ biɔ kɛjɛɔ edɛŋ lɛ ji ehegbɛi ni atekeɔ. Susumɔ ni amɛaaná akɛ amɛaakpoo heloonaa nii komɛi ni amɛdiɔ sɛɛ, loo amɛaakutɔ mli po loo amɛaaŋmɛɛ nɔ ko ni amɛnyaa he waa he lɛ ji nyaŋemɔ nii kɛha amɛ. Akɛni egbalaa ejwɛŋmɔ kɛbaa lɛ diɛŋtsɛ enɔ hewɔ lɛ, he-kɛ-afɔleshaa mumɔ ni eeena lɛ jeee nɔ ni yɔɔ pɔtɛɛ, nɔ ni ehiii kɛ nitsumɔ.
7 Wɔkwɛɔ sane nɛɛ yɛ gbɛ kroko nɔ. Nyɔŋmɔ Wiemɔ lɛ etsɔse wɔ jwɛŋmɔ koni wɔjwɛŋ Nyɔŋmɔ susumɔi lɛ ahe moŋ fe gbɔmɛi asusumɔi. (Yes. 55:8, 9) Wɔyɛ otii yɛ shihilɛ mli ni nɔ kwɔlɔ fe heloonaa sɛɛdii nii. Yehowa maŋtsɛyeli lɛ bembuu kɛ egbɛi lɛ hetsemɔ ji saji ni he hiaa fe fɛɛ yɛ jeŋ muu fɛɛ. Kɛ akɛaato he lɛ, bɔ ni saji nɛɛ yɔɔ ha lɛ da aahu akɛ maji lɛ fɛɛ “jeee nɔ ko yɛ ehiɛ.” (Yes. 40:17) Esa akɛ wɔbu nɔ fɛɛ nɔ ni baaka wɔ, ni wɔhi shi yɛ gbɛ ni haa akuɔ hiɛ ashwieɔ Nyɔŋmɔ suɔmɔnaa nii anɔ lɛ akɛ eji kwashiai asane.—1 Kor. 3:19.
8 No hewɔ lɛ, yɛ be mli ni heloonaa nibii komɛi ahe miihia ni ekrokomɛi hu he yɔɔ sɛɛnamɔ yɛ wɔ Maŋtsɛyeli nitsumɔi amli lɛ, wɔyoɔ akɛ enɛɛmɛi jeee “nii ni hi titri lɛ” diɛŋtsɛ. (Fili. 1:10) Wɔkɛ wɔhe kpɛtɛɔ mumɔ ni yɔɔ 1 Timoteo 6:8 lɛ he koni wɔkɛkutɔ gbɛ ni wɔtsɔɔ nɔ wɔdiɔ heloonaa nibii asɛɛ wɔhaa lɛ mli, ni wɔbɔɔ mɔdɛŋ ni wɔjɛ nilee mli wɔkɛ wɔtsuii amamɔ ‘nii ni anaaa ni hiɔ shi daa lɛ’ anɔ.—2 Kor. 4:18.
9 Kɛ wɔjwɛŋ Nyɔŋmɔ susumɔi ahe babaoo lɛ, ehaa yeyeeye ni wɔfeɔ yɛ heloonaa nibii ahe lɛ nɔ gbɔɔ. Kɛ wɔjwɛŋ nɔ ni Yehowa efee eha wɔ momo kɛ jɔɔmɔi ni yɔɔ naakpɛɛ ni ewo shi yɛ he lɛ anɔ lɛ, belɛ wɔmiisumɔ ni wɔkɛ wɔhe asha afɔle fɛɛ ni ebiɔ kɛjɛɔ wɔdɛŋ lɛ. (Mar. 10:29, 30) Shihilɛ mli diɛŋtsɛ ni wɔyɔɔ lɛ jɛ eŋɔɔ. Kɛ́ jeee emɔbɔnalɛ kɛ suɔmɔ hewɔ kulɛ, wɔnaŋ miishɛɛ ko kwraa yɛ shihilɛ mli amrɔ nɛɛ, ni kulɛ wɔbɛ wɔsɛɛ shihilɛ ko kwraa. Eka wɔ nɔ akɛ wɔkɛ wɔhe aha, akɛni nɔ fɛɛ nɔ ni wɔfeɔ yɛ esɔɔmɔ mli lɛ ‘ji nɔ ni ji wɔgbɛnaa akɛ wɔtsu lɛ.’ (Luka 17:10) Nɔ fɛɛ nɔ ni abiɔ ni wɔku sɛɛ wɔkɛha Yehowa lɛ, wɔkɛhaa yɛ miishɛɛ mli, ni wɔle akɛ ‘wɔbaakpa babaoo.’—2 Kor. 9:6, 7.
10 Mɛi ni Jɛɔ Amɛsuɔmɔ Mli Amɛtsuɔ Nii Ahe Miihia Bianɛ: Kristofoi asafo lɛ kɛ ehe wo nitsumɔ ni mli wa mli be ko, kɛjɛ be ni ato eshishi lɛ mli tɔ̃ɔ. Ehe bahia ni aye odase kɛmɔ shi dani abutu Yerusalem yɛ 70 Ŋ.B. Yɛ nakai be lɛ mli lɛ “wiemɔ lɛ yimɔ” Yesu kaselɔi lɛ amli “obɔbɔ.” (Bɔf. 18:5, NW) Nɔyaa ni baa lɛ oyayaayai lɛ ha ehe bahia ni atsɔse sanekpakpa shiɛlɔi kɛ tookwɛlɔi ni he esa lɛ babaoo koni atao amɛdɛŋ yelikɛbuamɔ. Hii ni he esa yɛ bɔ ni amɛkɛ je lɛŋ nɔyeli hegbɛi yeɔ haa lɛ kɛ hii ni he esa ni baanyɛ akwɛ heloonaa nibii anaabuamɔ kɛ amɛjaa kɛhamɔ nɔ lɛ ahe bahia. (Bɔf. 6:1-6; Efes. 4:11) Yɛ be mli ni amɛteŋ mɛi fioo ko sɔmɔ yɛ faŋŋ mli lɛ, amɛteŋ mɛi babaoo yɛ ni anuuu amɛhe tsɔ. Shi amɛ fɛɛ ‘amɛmia amɛhiɛ waa,’ ni amɛtsu nii kutuu kɛ amɛtsui fɛɛ koni akɛgbe nitsumɔ lɛ naa.—Luka 13:24.
11 Eyɛ mli akɛ ekolɛ kɛ́ akɛaato he lɛ, nitsumɔ yɛ ekãa naa yɛ jeŋ fɛɛ yɛ afii ohai abɔ ni nyiɛ sɛɛ ba lɛ amli lɛ he ebahiaaa pii moŋ, shi asaa atswa Maŋtsɛyeli nitsumɔ lɛ ama shi ekoŋŋ beni Yesu ba e-Maŋtsɛyeli hewalɛ mli yɛ 1914 lɛ. Klɛŋklɛŋ lɛ, amɛteŋ mɛi fioo ko yoo akɛ Maŋtsɛyeli nitsumɔi lɛ he nitsulɔi ni he baahia lɛ ayi baafa waa, ni ebaabi ni mɛi akpekpei abɔ ni sumɔɔ nitsumɔ aye abua yɛ shikpɔji ni yɔɔ je lɛŋ fɛɛ lɛ anɔ.
12 Ŋmɛnɛ, gbɛjianɔtoo lɛ miitsu nitsumɔi sɔrɔtoi babaoo he nii, ni eha akɛ nɔ fɛɛ nɔ ewo nitsumɔi nɛɛ amli. Maŋtsɛyeli nitsumɔ lɛ miiya hiɛ waa fe nine. Bɔ ni hiamɔ eba wɔbei lɛ ahe eha lɛ tsirɛɔ wɔ koni wɔmia wɔhiɛ ni wɔkɛ nibii fɛɛ ni wɔyɔɔ lɛ atsu nii koni wɔkɛgbe nitsumɔ ni wɔyɔɔ lɛ naa. Akɛni nibii agbɛjianɔtoo fɔŋ lɛ fɛɛ naagbee miibɛŋkɛ waa hewɔ lɛ, wɔmiikpa nitsumɔ ni fa babaoo po gbɛ yɛ gbii ni ka wɔhiɛ lɛ mli. Aatsɛ Yehowa tsulɔ fɛɛ tsulɔ koni ejɛ suɔmɔ mli ekɛ ehe aha yɛ henaabuamɔ nitsumɔ ni hiamɔ eba he nɛɛ mli.
13 Mɛni Ehe Hiaa ni Afee? Wɔbaanyɛ wɔkɛɛ yɛ anɔkwale mli akɛ ayɛ “babaoo feemɔ yɛ Nuntsɔ lɛ nitsumɔ lɛ mli.” (1 Kor. 15:58, NW) Be eshɛ kɛha nikpamɔ yɛ shikpɔŋkukuji babaoo mli, shi nitsulɔi lɛ faaa. Jeee akɛ aatsɛ wɔ koni wɔtsu wɔgbɛfaŋnɔ kɛmɔ shi babaoo yɛ odase ni wɔɔye yɛ wɔ diɛŋtsɛ wɔ shikpɔŋkuku lɛ mli fɛɛ lɛ pɛ kɛkɛ, shi moŋ ni wɔkpee sɔɔmɔ yɛ he ni hiamɔ lɛ eda yɛ lɛ he kaa lɛ hu naa.
14 Eji nɔ ni sa yijiemɔ akɛ aaana bɔ ni Odasefoi ni yɔɔ je lɛŋ hei sɔrɔtoi fɛɛ lɛ jɛɔ amɛsuɔmɔ mli amɛkɛ amɛhe haa yɛ nitsumɔi krokomɛi amli lɛ. Enɛɛmɛi baanyɛ aya nɔ kɛjɛ mɛi ni kɛ amɛhe haa yɛ jamɔ hei amaamɔ, kpeei ashishi sɔɔmɔ, kɛ nibii ni akɛyeɔ abuaa yɛ nibii ahiɛkpatamɔ bei amli lɛ anɔ, kɛyashɛ maŋ lɛ mli Maŋtsɛyeli Asa lɛ mli saamɔ nɔtonɔto mli lɛ nɔ. Yɛ nɔ ni kɔɔ naagbee nitsumɔ ni atsi ta lɛ he lɛ, sane ni yɔɔ daa ji ni akwɛ ni Maŋtsɛyeli Asa lɛ nɔ atse be fɛɛ be, ni ato nibii ahe gbɛjianɔ jogbaŋŋ beni agbe kpee fɛɛ kpee naa. Nitsumɔi ni abuɔ lɛ akɛ ebaa shi lɛ tsumɔ tsɔɔ Yesu wiemɔi ni yɔɔ Luka 16:10 lɛ shishinumɔ ni ja, akɛ: “Mɔ ni yeɔ nɔ ko bibioo mli anɔkwa lɛ, eyeɔ babaoo hu mli anɔkwa; ni mɔ ni yeee nɔ ko bibioo mli anɔkwa lɛ, eyeee babaoo hu mli anɔkwa.”
■ Ni Aaafi Asafo lɛ Mli Nitsumɔi Asɛɛ: Yɛ be mli ni asafo fɛɛ asafo tsuɔ nii akɛ gbɛjianɔtoo muu lɛ fɛɛ fa ko, ni enaa gbɛtsɔɔmɔ kɛjɛɔ “tsulɔ anɔkwafo kɛ nilelɔ” lɛ ŋɔɔ lɛ, mɛi ni yɔɔ mli ji aŋkroaŋkroi ni ji Maŋtsɛyeli shiɛlɔi. (Mat. 24:45) Nii ni enyɛɔ etsuɔ lɛ damɔ bɔ ni Odasefonyo fɛɛ Odasefonyo sumɔɔ ni etsu kɛ nyɛmɔ ni ekɛaafee lɛ nɔ babaoo. Asafo lɛ gbalaa jwɛŋmɔ kɛbaa sanekpakpa lɛ ni aaashiɛ yɛ eshikpɔŋkuku lɛ mli, kaselɔi heei ni aaafee, kɛ agbɛnɛ hewalɛ ni aaawo amɛ yɛ mumɔŋ lɛ nɔ. Wɔteŋ mɔ fɛɛ mɔ baanyɛ aye abua yɛ nitsumɔ nɛɛ mli. Wɔbaanyɛ wɔkɛ otii hu amamɔ shi aha wɔhe kɛha teemɔŋ nikasemɔ, kpeei ni wɔkɛ wɔhe aaawo mli kɛmɔ shi, kɛ mɛi krokomɛi ni ehia amɛ yɛ asafo lɛ mli lɛ ayelikɛbuamɔ. Nitsumɔi nɛɛ kɛ hegbɛi fɛfɛji babaoo bahaa wɔ koni wɔtsɔɔ bɔ ni wɔsumɔɔ ni wɔtsu nii lɛ.
■ Hiɛnyiɛmɔ yɛ Nɔkwɛmɔ Gbɛhei Amli: Yehowa kɛ asafo fɛɛ asafo nɔkwɛmɔ ewo emli onukpai ni ahala amɛ lɛ adɛŋ. (Bɔf. 20:28) Mɛnɛɛmɛi ji hii ni etee hiɛ ni amɛhe esa kɛha hegbɛ nɛɛ. (1 Tim. 3:1) Eehe efee akɛ nyɛmi nuu fɛɛ nyɛmi nuu ni yɔɔ asafo lɛ mli lɛ yɛ nyɛmɔ ko ni baanyɛ aha ehe asa kɛha gbɛnaa nii babaoo he nitsumɔ. Nyɛmimɛi hii babaoo miiya hiɛ yɛ mumɔŋ ni ehe miihia ni amɛya nɔ amɛdara yɛ asafoŋ onukpai lɛ agbɛtsɔɔmɔ kɛ suɔmɔ mli ni amɛjɛɔ amɛkɛ yelikɛbuamɔ haa lɛ mli. Esa akɛ hii nɛɛ afee mɛi ni kɛ ekãa kaseɔ Biblia lɛ kɛ wɔ woji lɛ. Amɛbaanyɛ amɛtsɔɔ suɔmɔ ni amɛyɔɔ kɛha nitsumɔ lɛ kɛtsɔ amɛhe shi ni amɛaaba amɛha onukpai ni akɛ mumɔ ehala amɛ lɛ, ni amɛkase amɛ hemɔkɛyeli lɛ, ni amɛna hesaai ni ataoɔ yɛ nɔkwɛlɔi ahe lɛ nɔ.—Heb. 13:7, 17.
■ Ohe ni Okɛaawo Be-Fɛɛ Sɔɔmɔ lɛ Mli: Asafo lɛ tsuɔ nii titri kɛhaa sanekpakpa lɛ shiɛmɔ. (Mat. 24:14) Mɛɛ jɔɔmɔ ji enɛ kɛ mɛi ni feɔ ekãa lɛ wo amɛ mɔdɛŋbɔi amli hewalɛ kɛtsɔ amɛhe ni amɛkɛaaha akɛ gbɛgbalɔi lɛ nɔ! Bei pii lɛ enɛ biɔ ni amɛfee tsakemɔi yɛ amɛ shihilɛ mli. Tsakemɔi krokomɛi he baahia koni amɛya nɔ yɛ sɔɔmɔ lɛ fa krɛdɛɛ nɛɛ mli. Shi yɛ nɔ najiaŋ ni mɛi ni kɛ hegbɛ nɛɛ tsuɔ nii lɛ baaŋmɛɛ he yɛ afi kome sɛɛ loo nɔ yɛ nijiaŋwujee ni baa yɛ be kuku ko mli lɛ, amɛyɛ nɔmimaa akɛ amɛbaana Yehowa dɛŋ jɔɔmɔi babaoo. Onukpai ni yɔɔ suɔmɔ kɛ mɛi krokomɛi ni edara yɛ mumɔŋ lɛ baanyɛ aye abua koni gbɛgbalɔi lɛ aye omanye, ni amɛwo amɛ hewalɛ kɛtsɔ wiemɔ kɛ nifeemɔ nɔ. Mɛɛ mumɔ kpakpa ni obalahii kɛ obalayei bibii ni kɛ amɛhe woɔ gbɛgbamɔ nitsumɔ lɛ mli beni amɛgbe skul naa amrɔ nɔŋŋ lɛ náa nɛkɛ! Nakai eji yɛ mɛi ni edara lɛ ni kɛ amɛhe haa akɛ daa gbɛgbalɔi beni amɛ heloonaa nitsumɔ mli gbɛnaa nii eba shi nɔŋŋ lɛ ahe. Mɛɛ tsui ni nyɔɔ mɔ mli ekɛbahaa Kristofonyo ni ejɔɔ ehe nɔ lɛ nɛkɛ, beni ekɛ henaabuamɔ nitsumɔ ni Yehowa woɔ lɛ foi lɛ kpaa gbee lɛ!—Yes. 60:22.
■ Ohe ni Okɛaawo Kpee Hei Amaamɔ kɛ Amɛsaamɔ Mli: Amamɔ ŋmɛnɛŋmɛnɛ beaŋ Maŋtsɛyeli Asai ohai abɔ kɛ Kpee Asai hu diɛŋtsɛ yɛ jeŋ fɛɛ. Eehe efee akɛ nitsumɔ lɛ fɛɛ ji nɔ ni wɔ nyɛmimɛi hii kɛ yei ni jɛ suɔmɔ mli amɛkɛ amɛbe kɛ hesaai ha lɛ tsu yɛ naakpɛɛ gbɛ nɔ. (1 Kron. 28:21) Mɛi akpei abɔ ni sumɔɔ nitsumɔ lɛ kwɛɔ tsũi nɛɛ asaamɔ nɔ kɛtsɔɔ nitsumɔi fɛɛ ni ebiɔ ni atsu lɛ tsumɔ nɔ. (2 Kron. 34:8) Akɛni nitsumɔ nɛɛ ji sɔɔmɔ krɔŋŋ lɛ fa kome hewɔ lɛ, mɛi ni kɛ amɛhe haa lɛ jɛɔ amɛ suɔmɔ mli amɛtsuɔ, ni amɛbiii ni aha amɛ nɔ ko kɛto najiaŋ yɛ sɔɔmɔ ni amɛkɛhaa yɛ enɛ mli lɛ hewɔ, ni nakai nɔŋŋ amɛbiii ni awo amɛ nyɔmɔ koni amɛshiɛ yɛ shia kɛ shia, amɛha maŋshiɛmɔi yɛ asafo lɛ mli, loo amɛye amɛbua yɛ kpeei bibii loo kpeei wuji ahe nitsumɔ mli. Mɛi ni kɛ amɛhe haa nɛɛ tsuɔ nii kwraa yɛ jamɔ hei ahe gbɛjianɔ ni atoɔ kɛ amɛmaamɔ mli kɛha Yehowa yijiemɔ. Amɛkɛ ekãa yeɔ amɛbuaa yɛ be mli ni amɛtsuɔ mla woji ahe nii, shika akɔntaabuu he woji anɔkwɛmɔ, kɛ nihemɔ he saji, kɛ nibii ni he hiaa lɛ afalɛ he akɔntaabuu he nii lɛ. Yehowa anɔkwafoi nɛɛ biii ni awo shikai krokomɛi ni amɛfiteɔ yɛ he lɛ he nyɔmɔ aha amɛ loo ni amɛaatao gbɛ ko ni amɛkɛaana he sɛɛ yɛ gbɛ ni yɔɔ tɛ̃ɛ nɔ loo nɔ ni bɛ tɛ̃ɛ nɔ, yɛ heloo gbɛfaŋ, yɛ nitsumɔ ni amɛkɛhaa lɛ mli, ejaakɛ amɛjɔɔ amɛhesaai kɛ nibii ni amɛyɔɔ lɛ nɔ amɛha Yehowa. Nifeemɔ nɛɛ biɔ ni ana nitsulɔi ni yɔɔ ekãa ni kɛ “tsui fɛɛ” tsuɔ nii akɛ “Yehowa amɛfeɔ amɛhaa.”—Kol. 3:23, NW.
15 Belɛ mɛni haa suɔmɔ mli ni Yehowa webii jɛɔ amɛtsuɔ enɛ lɛ feɔ sɔrɔto kwraa lɛ? Ejɛ amɛ nihamɔ mumɔ lɛ. Amɛkɛ nibii babaoo keɔ fe shika loo heloonaa nibii kɛkɛ—amɛkɛ ‘amɛhe haa yɛ suɔmɔ naa.’ (Lala 110:3) Enɛ he miihia yɛ wɔhe ni wɔjɔɔ nɔ wɔha Yehowa lɛ mli. Aduroɔ wɔ yɛ gbɛ krɛdɛɛ nɔ. Wɔnáa “miishɛɛ babaoo” ni “wɔkpaa babaoo” ejaakɛ mɛi krokomɛi ni toɔ wɔ najiaŋ lɛ ahiɛ sɔɔ nɔ ni wɔfeɔ lɛ. (Bɔf. 20:35, NW; 2 Kor. 9:6, NW; Luka 6:38) Wɔ Ejurɔfeelɔ fe fɛɛ ji wɔ ŋwɛi Tsɛ, Yehowa, ni ‘sumɔɔ tsuijurɔ naa nihalɔ’ lɛ. (2 Kor. 9:7) Ekɛ jɔɔmɔi ni baahi shi kɛya naanɔ lɛ baato wɔ najiaŋ ohai abɔ. (Mal. 3:10; Rom. 6:23) No hewɔ lɛ kɛ onine shɛ hegbɛi anɔ yɛ Yehowa sɔɔmɔ mli lɛ, ani obaajɛ suɔmɔ mli ni okɛ ohe aha ni oha hetoo taakɛ Yesaia fee beni ekɛɛ akɛ: “Naa mi, tsu mi!” lɛ?—Yes. 6:8.