Ní Yehowa Aaaka Wɔ Akwɛ—Mɛni Hewɔ Sɛɛnamɔ Yɔɔ He?

¹ Mɔ fɛɛ mɔ sumɔɔ gbɔmɔtsoŋ hewalɛnamɔ kpakpa. Ehaa anaa shihilɛ mli ŋɔɔmɔ babaoo diɛŋtsɛ. Ni kɛlɛ, mɛi babaoo ni yɔɔ gbɔmɔtsoŋ hewalɛ kpakpa lɛ yaa koni aka amɛ gbɔmɔtso akwɛ yɛ be kɛ beaŋ. Mɛni hewɔ? Amɛmiisumɔ ni amɛtsɔ hiɛ amɛle gbɔmɔtsoŋ naagbai ni jeɔ shishi lɛ koni anyɛ akwɛ ni atao amɛnaa tsabaa. Wɔmumɔŋ hewalɛnamɔ ni wɔɔbu he lɛ he miihia kwraa po fe enɛ. Yehowa nɔkpɛlɛmɔ lɛ damɔɔ ‘hemɔkɛyeli lɛ mli hewalɛ’ ni mɔ ko aaana lɛ nɔ.—Tito 1:13.

² Be ni sa jogbaŋŋ ni Yehowa kɛaaka wɔ akwɛ lɛ nɛ. Mɛni hewɔ nakai eji lɛ? Ejaakɛ Yehowa yɛ esɔlemɔwe krɔŋkrɔŋ lɛ, ni eeka adesai fɛɛ atsuii eekwɛ. (Lala 11:4. 5; Abɛi 17:3) Taakɛ David ji lɛ, wɔmiibi ni Yehowa aka wɔ akwɛ jogbaŋŋ kɛmɔ shi, akɛ: “Yehowa, taomɔ mimli ni oka mi okwɛ; tsuumɔ misabai kɛ mitsui he!”—Lala 26:2.

³ Esa akɛ wɔbu wɔhe kɛjɛ nibii ni kɛ oshara baanyɛ aba wɔmumɔŋ hewalɛnamɔ nɔ lɛ ni baanyɛ ajɛ wɔmligbɛ kɛba yɛ wɔheloo ni yeee emuu lɛ hewɔ lɛ ahe. Abɛi 4:23 woɔ ŋaa akɛ: “Ohiɛ akã otsui he fe nii fɛɛ; ejaakɛ no mli wala jɛɔ.”

⁴ Jeŋ ni ekpɔtɔ ni jeŋba shara yɔɔ mli ni ebɔle wɔ lɛ hu baanyɛ ekɛ oshara aba wɔmumɔŋ hewalɛnamɔ nɔ. Kɛ wɔbɛŋkɛ gbɛjianɔtoo fɔŋ nɛɛ he kpaakpa fe nine lɛ, no lɛ wɔbaabɔi nii ahesusumɔ taakɛ efeɔ lɛ, ni ebaaha wɔna je lɛŋ sui lɛ eko. Aloo ekolɛ eeeha wɔkɛ wɔhe awo je lɛŋ sui lɛ amli, ni je lɛŋ mumɔ lɛ baaye wɔnɔ.—Efes. 2:2, 3.

⁵ Satan baanyɛ ekɛ yiwaa atsu nii loo ekɛ shitee-kɛ-woo ni baa tɛɛ lɛ aba koni ekɛbɔ mɔdɛŋ ni ekɛkpata wɔhiɛ yɛ mumɔŋ. Shi, yɛ bei pii amli lɛ, ekɛ ŋaa tsuɔ nii koni ekɛ je lɛŋ nibii ni gbalaa mɔ lɛ alaka wɔ. Petro woɔ wɔ hewalɛ ni wɔha ‘wɔhiɛ akã shi ni wɔsara,’ akɛni Satan “tamɔ jata ni hũuɔ [ni] eetao mɔ ni eeemi” lɛ hewɔ. Aawo wɔ hewalɛ ni ‘wɔdamɔ shi shiŋŋ yɛ hemɔkɛyeli lɛ mli ni wɔtsĩ lɛ gbɛ.’—1 Pet. 5:8, 9.

⁶ Ehe miihia ni wɔbu wɔmumɔŋ hewalɛnamɔ he kɛtsɔ wɔ hemɔkɛyeli lɛ ni wɔɔha emli awa, ni wɔkanya lɛ daa gbi lɛ nɔ. Bɔfo Paulo woɔ wɔ ŋaa koni wɔya nɔ wɔka wɔhemɔkɛyeli lɛ wɔkwɛ. Taakɛ wɔkɛ nilee feɔ toiboo wɔhaa ŋaawoo kpakpa ni datrɛfonyo ni he esa kɛhaa wɔ lɛ, nakai nɔŋŋ wɔboɔ Yehowa toi kɛ́ E-mumɔŋ kaa-kɛ-kwɛmɔ lɛ jie naagba ko ni he hiaa ni atsu he nii lɛ kpo lɛ. Enɛ haa efeɔ mlɛo kɛhaa wɔ akɛ ‘wɔɔfee mɛi ni awaje amɛ.’—2 Kor. 13:5, 11.

⁷ Yehowa ji Kaa-kɛ-Kwɛlɔ kpeteŋkpele lɛlɛŋ. Nɔ ni tamɔ hela ni etaoɔ mli enaa lɛ ja jogbaŋŋ yɛ bei fɛɛ mli. Ele nɔ ni he hiaa wɔ lɛ jogbaŋŋ. Etsɔɔ nɔ ni ji mumɔŋ niyenii ni haa mɔ hewalɛ lɛ kɛtsɔɔ e-Wiemɔ kɛ “tsulɔ anɔkwafo” lɛ nɔ. (Mat. 24:45; 1 Tim. 4:6) Nɛkɛ mumɔŋ niyenii ni haa mɔ hewalɛ ni wɔɔye daa yɛ shia kɛ asafoŋ kpeei amli lɛ haa wɔnaa mumɔŋ hewalɛ daa. Mumɔŋ kpɔiaŋgbɔlemɔ ni wɔɔfee daa yɛ sɔɔmɔ nitsumɔ lɛ mli kɛ Kristofoi anitsumɔ kroko hu mli lɛ he yɛ sɛɛnamɔ. No hewɔ lɛ, wɔkɛ miishɛɛ kpɛlɛɔ kaa-kɛ-kwɛmɔ ni Yehowa feɔ wɔ daa lɛ nɔ kɛ nɔmimaa akɛ ebaaha wɔna mumɔŋ hewalɛ ni hi fe fɛɛ.