Nyɛjwɛŋa Nii ni Yɔɔ Ŋwɛi lɛ Anɔ

¹ Beni ewieɔ yinɔ ni ebɔle wɔhe kɛkpe lɛ kɛ nɔ ni akpaa gbɛ yɛ ewɔsɛɛ be he lɛ he lɛ, sane ko ni je kpo yɛ December 31, 1994 The New York Times lɛ mli lɛ kɛɛ akɛ: “Amɛmiishe wɔsɛɛ be gbeyei. Nɔ ni amɛsheɔ he gbeyei lɛ kɔɔ nitsumɔ he, ekɔɔ hela he, ekɔɔ shika helɛtemɔ he, ekɔɔ je lɛŋ shihilɛi ahe.” He fɛɛ he ni wɔɔkwɛ lɛ, mɛi ayiŋ feɔ amɛ kɔshikɔshi yɛ shihilɛ he. Wɔ sɔɔmɔ ni wɔkɛ wɔhe woɔ mli akɛ Yehowa Odasefoi lɛ haa wɔkɛ mɛi ni nuɔ he nɛkɛ lɛ naa sharamɔ daa gbi. Yɛ be mli ni wɔkɛ naagbai ni amɛkɛkpeɔ lɛ nɔŋŋ kpeɔ lɛ, hemɔkɛyeli kɛ hekɛnɔfɔɔ ni wɔyɔɔ yɛ Nyɔŋmɔ Wiemɔ lɛ he shiwoo ni yɔɔ shiŋŋ mli lɛ haa wɔkwɛɔ shihilɛ lɛ kɛ adesai awɔsɛɛ be yɛ gbɛ ni yɔɔ sɔrɔto kwraa nɔ.—Yes. 65:13, 14, 17.

² Hiɛnɔkamɔ ni ma shi shiŋŋ lɛ mli hekɛnɔfɔɔ kɛ bɔ ni wɔkpaa lɛ gbɛ wɔhaa lɛ haa mɛi babaoo ni yɔɔ tsui ni ja lɛ boɔ shɛɛ sane ni wɔkɛyahaa amɛ lɛ toi. Aŋkroaŋkroi babaoo ni haoɔ ni naa amanehulu lɛ naa akɛ ebafeɔ miishɛjemɔ kɛhaa amɛ akɛ amɛkɛ wɔ aaagba sane. Akɛni amɛsumɔɔ nɔ ni amɛnuɔ lɛ hewɔ lɛ, amɛteŋ mɛi komɛi kpɛlɛɔ nɔ akɛ amɛkɛ wɔ aaakase Biblia lɛ. Shi, yɛ bei komɛi amli lɛ, ekolɛ gbɔmɛi baasumɔ ni klɛŋklɛŋ lɛ amɛwie amɛ naagbai lɛ ahe. Yɛ be mli ni abaafite be ko ni akɛbo mɔ ko yeyeeye-feemɔ he sane toi lɛ, esaaa ni wɔhiɛ jeɔ yiŋtoo ni wɔhiɛ ni ji gbɔmɛi ni wɔɔtsɔɔ amɛ Nyɔŋmɔ Wiemɔ lɛ he anɔkwalei kpakpai lɛ anɔ.

³ Wɔmiisumɔ ni wɔjie musuŋtsɔlɛ kpo wɔtsɔɔ mɛi ni naagbai jwere amɛnɔ lɛ. Yesu fee he nɔkwɛmɔ nɔ beni ekɛɛ, taakɛ aŋma yɛ Mateo 11:28 lɛ akɛ: “Nyɛbaa miŋɔɔ, nyɛ mɛi fɛɛ ni etɔ nyɛ ni nyɛjatsui fe nyɛ lɛ.” Wɔmiisumɔ ni wɔwo mɛi ahewalɛ nakai nɔŋŋ. Shi, kadimɔ akɛ, yɛ kuku 28 lɛ naagbee gbɛ lɛ, Yesu kɛɛ: “Maha nyɛ hejɔɔmɔ.” Nakai sa akɛ efee oti ni ma wɔhiɛ. Wɔfeɔ enɛ kɛtsɔɔ Nyɔŋmɔ Wiemɔ lɛ mli shiwoi ni haa mɔ he jɔɔ lɛ lɛ ni wɔkɛ mɛi gbaa he sane lɛ nɔ. Toibolɔ kpakpa ni wɔɔfee lɛ tsɔɔ bɔ ni wɔyɔɔ he miishɛɛ kɛ mɛi ahesusumɔ ni he hiaa kɛha nitsumɔ ni akɛwo wɔdɛŋ akɛ wɔshiɛ Maŋtsɛyeli lɛ he sanekpakpa lɛ wɔtsɔɔ lɛ, koni wɔye wɔbua mɛi krokomɛi ni amɛyɔse akɛ Maŋtsɛyeli lɛ ji adesai anaagbai fɛɛ anaa tsabaa kome pɛ ni baaba mli.—Mat. 24:14.

⁴ Wɔ nitsumɔ lɛ tamɔɔɔ mɛi ni he esa yɛ gbɔmɔtsoŋ hela he nitsumɔ mli lɛ anɔ̃ lɛ. Shi moŋ, etamɔ nɔ ni bɔfo Paulo tsɔɔ mli, ni anaa yɛ 1 Timoteo 4:6 lɛ, ni ji sɔɔmɔ ni gbalaa jwɛŋmɔ kɛyaa “tsɔɔmɔ kpakpa,” tsɔɔmɔi ni yɔɔ Nyɔŋmɔ Wiemɔ lɛ mli lɛ nɔ. Ekolɛ ehe baahia ni awo mɛi ni yɔɔ gbɔmɔtsoŋ loo henumɔŋ naagbai lɛ ahewalɛ ni amɛkɛ amɛhe afɔ Yehowa nɔ. Tsɔɔmɔ amɛ koni ‘amɛjwɛŋ nii ni yɔɔ ŋwɛi lɛ anɔ’—nibii ni kɔɔ Maŋtsɛyeli hiɛnɔkamɔ lɛ he. (Kol. 3:2) Kɛ gbɔmɛi kɛ amɛjwɛŋmɔ ma Nyɔŋmɔ Wiemɔ lɛ nɔ lɛ, ebaanyɛ etswa amɛ ema shi yɛ hewalɛ ni naa wa ni enaa yɛ amɛshihilɛi anɔ lɛ hewɔ.—Heb. 4:12.

⁵ No hewɔ lɛ oti ni ma wɔhiɛ ji ni wɔye wɔbua ni mɛi ajwɛŋ ‘nii ni ja, nii ni he tse, nii ni adɔɔ he, kɛ nii ni sa yijiemɔ’ lɛ anɔ jogbaŋŋ. (Fil. 4:8) Kɛ amɛkɛ amɛjwɛŋmɔ ma Maŋtsɛyeli hiɛnɔkamɔ lɛ nɔ lɛ, abaajɔɔ amɛ taakɛ eji yɛ wɔgbɛfaŋ lɛ. Amɛ hu amɛbaana miishɛɛ ni jɛɔ nilee mli kɛbaa ni tsɔɔ akɛ yɛ naagbee lɛ, Yehowa baatsɔ e-Maŋtsɛyeli lɛ nɔ ejie amɛ naagbai fɛɛ kɛya lɛ eko.—Lala 145:16.