Ní Wɔɔha Wɔ La Atso Daa

¹ Mɛni ji la? Wiemɔ komekomei ashishitsɔɔmɔ wolo tsɔɔ shishi akɛ “nɔ ko ni haa anaà nii.” Shi eka shi faŋŋ akɛ, yɛ tsɔnei ahe nilee ni gbɔmɔ etee hiɛ yɛ mli fɛɛ sɛɛ lɛ, eleee sanebimɔ ni Yehowa tee lɛ shi ni aŋma yɛ Hiob 38:24 lɛ hetoo lɛ jogbaŋŋ lolo. Ani wɔbaanyɛ wɔhi shi, kɛji la bɛ? Kɛ la bɛ lɛ wɔnyɛŋ wɔhi shi. La he miihia koni anyɛ anà nii yɛ heloonaa, ni Biblia lɛ kɛɔ wɔ akɛ, “Nyɔŋmɔ lɛ, la ji lɛ” yɛ mumɔŋ shishinumɔ naa. (1 Yoh. 1:5) Wɔkɛ wɔhe fɔɔ Mɔ ni “eha la etso eha wɔ lɛ” nɔ kwraa.—Lala 118:27.

² Enɛ feɔ anɔkwale yɛ helooŋ shishinumɔ naa, shi eyaa hiɛ fe nakai kwraa po yɛ mumɔŋ shishinumɔ naa. Apasa jamɔ elaka gbɔmɛi akui babaoo, ni eha amɛyaje mumɔŋ duŋ mli, ni ‘amɛgbugbuuɔ shi yɛ gbogbo he tamɔ shwilafoi.’ (Yes. 59:9, 10) Yɛ Yehowa suɔmɔ babaoo kɛ emlihilɛ ni tsirɛɔ lɛ lɛ hewɔ lɛ, ‘ehaa ela kɛ enɔkwale lɛ baa.’ (Lala 43:3) Gbɔmɛi akpekpei abɔ diɛŋtsɛ ni hiɛ esɔ lɛ ekpɛlɛ nɔ, ni ‘amɛjɛɔ duŋ lɛ mli kɛbaa lɛ diɛŋtsɛ enaakpɛɛ la lɛ mli.’—1 Pet. 2:9.

³ Yesu Kristo tsuɔ gbɛfaŋnɔ ko ni he hiaa yɛ la nɛɛ ni ekɛbaa je lɛ mli lɛ hewɔ. Ekɛɛ akɛ: “Mi lɛ miba je lɛ mli akɛ la, koni mɔ fɛɛ mɔ ni heɔ minɔ yeɔ lɛ akahi duŋ lɛ mli.” (Yoh. 12:46) Ekɛ ebe, hewalɛ, kɛ enibii fɛɛ tsu nii ni ekɛha ale anɔkwale la lɛ. Efa gbɛ kɛtee ejaku maŋ lɛ mli he fɛɛ he, ni eshiɛ ni etsɔɔ nii yɛ nɔ ni shɛɔ maŋ fɛɛ maŋ kɛ akrowa fɛɛ akrowa mli. Eŋmɛ etsui shi yɛ yiwaa ni naa wa ni akɛjɛɔ he fɛɛ he kɛbaa enɔ lɛ mli, shi etee nɔ edamɔ shi shiŋŋ yɛ enitsumɔ akɛ egbɛ anɔkwale la lɛ eshwa lɛ mli.

⁴ Yesu ha ejwɛŋmɔ hi ekaselɔi ni ehalaa, ni etsɔseɔ amɛ, ni etoɔ amɛhe gbɛjianɔ lɛ mli, kɛ yiŋtoo krɛdɛɛ ko. Wɔkaneɔ famɔ ni ekɛha amɛ lɛ he sane yɛ Mateo 5:14-16 akɛ: “Nyɛji je lɛŋ la lɛ. . . . Nyɛhaa nyɛla atsoa yɛ gbɔmɛi ahiɛ koni amɛna nyɛnifeemɔnii kpakpai lɛ, ni amɛwo nyɛtsɛ ni yɔɔ ŋwɛi lɛ hiɛ nyam.” Taakɛ Yesu ji lɛ, esa akɛ ‘amɛtso tamɔ kanei yɛ je lɛŋ,’ koni amɛgbɛ anɔkwale la lɛ amɛshwa he fɛɛ he. (Fil. 2:15) Amɛkɛ miishɛɛ kpɛlɛ nakai gbɛnaa nii lɛ nɔ, ni amɛbu no akɛ amɛyiŋtoo krɛdɛɛ ni yɔɔ shihilɛ mli. Etsɛɛɛ tsɔ ni Paulo nyɛ ekɛɛ akɛ ‘ashiɛ’ sanekpakpa lɛ “atsɔɔ bɔɔnii fɛɛ ni yɔɔ ŋwɛi shishi lɛ.” (Kol. 1:23) Afee Kristofoi asafo muu lɛ fɛɛ ekome yɛ nakai nitsumɔ kpeteŋkpele lɛ he nitsumɔ mli.

⁵ Esa akɛ wɔ mɛi ni wɔyɔɔ ŋmɛnɛ lɛ ada shi akɛ wɔbafata mɛi ni ‘ejie duŋ mli nitsumɔi eshwie’ lɛ ahe. (Rom. 13:12, 13) Wɔbaanyɛ wɔtsɔɔ wɔ hiɛsɔɔ kɛtsɔ nɔkwɛmɔ nɔ ni Yesu kɛ blema be mli Kristofoi anɔkwafoi fee lɛ kasemɔ nɔ. Bɔ ni ehe ebahia akɛ mɛi krokomɛi abo anɔkwale lɛ toi lɛ he miihia, ni hiɛdɔɔ yɛ mli amrɔ nɛɛ fe adesa yinɔsane bei fɛɛ mli. Nitsumɔ ko kwraa bɛ ni abaanyɛ akɛto bɔ ni nitsumɔ nɛɛ he hiaa ha kɛ sɛɛnamɔi babaoo ni ekɛbaa lɛ he.

⁶ Mɛɛ Gbɛ nɔ Wɔɔtsɔ Wɔtso Tamɔ Kanei? Gbɛ krɛdɛɛ ni wɔɔtsɔ nɔ wɔha wɔ la atso ji ni wɔkɛ wɔhe aaawo Maŋtsɛyeli shiɛmɔ nitsumɔ mli. Asafo fɛɛ asafo yɛ gbɛjianɔtoo ni akɛtsuɔ nii daa kɛha shiɛmɔ yɛ shikpɔŋkuku ni akɛwo edɛŋ lɛ mli. Akɛ woji sɔrɔtoi ni fa babaoo ni aŋmala yɛ wiemɔi babaoo mli lɛ haa. Akɛ tsɔsemɔ ni yaa hiɛ babaoo haa yɛ kpeei ashishi, ni mɛi ni he esa lɛ kɛ yelikɛbuamɔ haa yɛ mɛi krokomɛi atsɔsemɔ mli. Hii, yei, mɛi ni edara, kɛ gbekɛbii po yɛ hegbɛ akɛ amɛkɛ amɛhe aaawo mli. Ahaa aŋkro fɛɛ aŋkro ni yɔɔ asafo lɛ mli lɛ hegbɛ ni ekɛ ehe awo mli yɛ bɔ ni enyɛmɔi kɛ eshihilɛi baaŋmɛ gbɛ lɛ naa. Ahaa asafo lɛ nitsumɔi fɛɛ kɔɔ shiɛmɔ lɛ he, ni akɛ hegbɛ haa koni aye abua emli bii lɛ ateŋ mɔ fɛɛ mɔ ni ekɛ ehe awo mli yɛ gbɛ ko nɔ. Asafo lɛ ni wɔkɛ aaabɔ kpaakpa be fɛɛ be lɛ ji gbɛ ni hi fe fɛɛ ni wɔɔtsɔ nɔ wɔha wɔ la atso daa.

⁷ Wɔbaanyɛ wɔtso yɛ gbɛi ni kɔɔɔ wɔnaabu kɛ odaseyeli he lɛ nɔ. Wɔbaanyɛ wɔtsɔ wɔjeŋba pɛ nɔ wɔgbala mɛi krokomɛi ajwɛŋmɔ kɛba nɔ. No ji nɔ ni yɔɔ Petro jwɛŋmɔ mli beni ewo hewalɛ akɛ: “Ni nyɛba nyɛjeŋ jogbaŋŋ yɛ jeŋmajiaŋbii lɛ ateŋ, koni . . . nyɛnitsumɔi kpakpai lɛ ni amɛnaa lɛ amɛkɛwo Nyɔŋmɔ hiɛ nyam.” (1 Pet. 2:12) Mɛi babaoo tsɔɔ bɔ ni nitsumɔ loo gbɛjianɔtoo ko yɔɔ ha, kɛtsɔ mɛi ni kɛ amɛhe bɔɔ he lɛ ajeŋba nɔ. Kɛ mɛi ni kwɛɔ nii jogbaŋŋ lɛ yɔse gbɔmɛi ni amɛ jeŋba he tse, amɛyeɔ anɔkwa, amɛsumɔɔ toiŋjɔlɛ, ni amɛyeɔ mla nɔ lɛ, amɛbuɔ gbɔmɛi ni tamɔ nɛkɛ akɛ esoro amɛ kwraa ni amɛmuɔ sane naa akɛ amɛhiɔ shi yɛ tɛi ni nɔ kwɔlɔ babaoo fe nɔ ni mɛi babaoo hiɔ shi yɛ naa lɛ naa. No hewɔ lɛ wu lɛ haa ela tsoɔ kɛji ekɛ woo haa eŋa lɛ ni ehiɛɔ lɛ dɔdɔɔdɔ yɛ suɔmɔ mli; ŋa lɛ feɔ nakai nɔŋŋ kɛtsɔ ewu lɛ yitsoyeli gbɛhe ni ekɛ bulɛ haa lɛ nɔ. Gbekɛbii bafeɔ mɛi ni esoro amɛ kwraa yɛ be mli ni amɛkɛ bulɛ haa amɛfɔlɔi ni amɛkpooɔ bɔlɛnamɔ mli jeŋba shara kɛ tsofai fɔji kɛ nitsumɔ lɛ. Abuɔ nitsulɔ ni kɛ henilee tsuɔ nii, eyeɔ anɔkwa, ni esusuɔ mɛi krokomɛi ahe lɛ waa akɛ ehe yɛ sɛɛnamɔ. Kɛtsɔ Kristofoi asui nɛɛ kɛ nitsumɔ nɔ lɛ, wɔhaa wɔ la lɛ tsoɔ, ni wɔjieɔ wɔ shihilɛ gbɛ lɛ yi wɔhaa mɛi krokomɛi.

⁸ Shiɛmɔ ji nɔ ni wɔkase yɛ Nyɔŋmɔ Wiemɔ lɛ mli lɛ ni wɔkɛ mɛi krokomɛi gbaa he sane. Afeɔ nakai kɛjɛɔ wielɔi akpoku lɛ nɔ loo yɛ shinaai anaa, shi jeee nakai bei amli pɛ afeɔ nakai. Wɔ daa gbi nitsumɔi haa wɔkɛ mɛi nyɔŋma-nyɔŋmai abɔ yeɔ sharamɔ. Shii enyiɛ okɛ mɛi ni shinaa bɛŋkɛ onɔ he lɛ gbaa sane? Shii enyiɛ mɔ ko tswaa oshinaa? Mɛi sɔrɔtoi enyiɛ okɛ amɛ gbaa sane be mli ni oheɔ nii, ota bɔs mli, loo otsuɔ oheloonaa nitsumɔ? Kɛ oji gbekɛ ni yaa skul lɛ, ani obaanyɛ otsɔɔ mɛi ni okɛwieɔ daa gbi lɛ ayibɔ? Etamɔ nɔ ni hegbɛi ni ayɔɔ akɛ akɛ mɛi krokomɛi aaagba sane lɛ fa babaoo. Nɔ ni he hiaa ni ofee kɛkɛ ji ni oha Ŋmalɛ fioo ni okɛ mɛi baasusu he lɛ ahi ojwɛŋmɔ mli, ohiɛ Biblia kɛ dɛhiɛmɔ woji komɛi, koni otsɔ hiɛ otsɔɔ ojwɛŋmɔ yɛ saji ahe kɛ ona hegbɛ.

⁹ Eyɛ mli akɛ trukaa odaseyeli waaa moŋ, shi mɛi komɛi shashaoɔ shi akɛ amɛaaka amɛkwɛ. Ekolɛ amɛbaafee diŋŋ, ni amɛaakɛɛ akɛ amɛhiɛ gboɔ tsɔ loo amɛmiishe gbeyei akɛ amɛaabɛŋkɛ gbɔi. Ekolɛ amɛaashe gbeyei akɛ amɛaagbala mɛi ajwɛŋmɔ kɛaaba amɛnɔ loo bɔ ni mɛi kɛ mlifu aaafee amɛnii. Mɛi ni he esa yɛ trukaa odaseyeli mli lɛ baanyɛ akɛɛ bo akɛ efɔɔɔ kaa akɛ anaa naagba. Kɛ hoo lɛ mɛi krokomɛi tamɔ wɔ nɔŋŋ; hiamɔ nii kome too lɛ nɔŋŋ amɛyɔɔ, nii kome lɛ nɔŋŋ amɛsusuɔ he, ni nii kome too lɛ nɔŋŋ amɛtaoɔ amɛha amɛhe kɛ amɛwekui. Mɛi babaoo kɛ mlihilɛ baakpɛlɛ hiɛŋmɔlɔŋmɔlɔ loo naanyobɔɔ ŋamɔ nɔ. Kɛ oooje efeemɔ shishi lɛ, ekolɛ ehe baahia ni ‘ona ekãa.’ (1 Tes. 2:2) Shi kɛ oje shishi pɛ lɛ, nɔ ni jɛɔ mli baa lɛ baaha onaa akpɛ ohe ni ooona miishɛɛ.

¹⁰ Ájɔɔ Wɔ Kɛ́ Wɔha Wɔ La Tso: Naa niiashikpamɔi ni ŋɔɔ ni jɛɔ trukaa odaseyeli mli lɛ he nɔkwɛmɔ nii komɛi: Yoo ko ni eye afii 55 miibɔ mɔdɛŋ ni efo gbɛjegbɛ ko mli. Beni lɔle ko miihe atswa lɛ lɛ nɔŋŋ pɛ kɛkɛ ni nyɛmi yoo ko mɔ enine mli ni egbala lɛ kɛjɛ oshara lɛ mli, ni ekɛɛ: “Ofainɛ, kwɛmɔ ohe nɔ jogbaŋŋ. Jaramɔ bei amli wɔyɔɔ lɛ!” Kɛkɛ ni etsɔɔ nɔ hewɔ ni bei lɛ ahe eba oshara lɛ. Yoo lɛ bi akɛ, “Ani Yehowa Odasefoi ateŋ mɔ ko jio?” Akɛni ehe wɔ woji lɛ eko kɛjɛ enyɛmi yoo ko ŋɔɔ hewɔ lɛ, yoo lɛ miisumɔ ni ekɛ Yehowa Odasefoi lɛ ateŋ mɔ ko akpe, ni amɛhe ni amɛkɛkpe nɛɛ ha enɛ ba mli.

¹¹ Nyɛmi yoo ko kɛ yoo ko ni miimɛ yɛ datrɛfonyo ɔfis bɔi sanegbaa. Yoo lɛ bo toi diŋŋ ni ebi akɛ: “Aaafee be saŋŋ nɛ ni Yehowa Odasefoi batsɔɔ he ni miyɔɔ lɛ kɛhoɔ; shi kɛ mi diɛŋtsɛ matsɔ Yehowa Odasefoi ateŋ mɔ ko wɔsɛɛ ko lɛlɛŋ lɛ, no lɛ enɛ baajɛ nɔ ni okɛɛ mi nɛɛ hewɔ. Osane lɛ toi ni miboɔ lɛ tamɔ nɔ ni miina la yɛ duŋ mli.”

¹² Mlijɔlɛ nifeemɔ baanyɛ afee gbɛ ni atsɔɔ nɔ akɛyeɔ abuaa mɛi krokomɛi koni amɛkase anɔkwale lɛ. Be mli ni nyɛmimɛi yei enyɔ ekpa shiɛmɔ ni amɛnyiɛ kɛyaa shia lɛ, amɛna yoonukpa ko ni tamɔ mɔ ni he miiye yɛ be mli ni ejɛɔ bɔs lɛ mli eyiɔ shi lɛ. Amɛwa kɛdamɔ shi ni amɛbi kɛ yoo lɛ miisumɔ ni aye abua lɛ. Enaa kpɛ ehe waa akɛ gbɔi diɛŋtsɛ enyɔ aaana ehe miishɛɛ, ni eesumɔ ni ele nɔ ni tsirɛ amɛ ni amɛjie bulɛ ni mlijɔlɛ fata he nɛkɛ kpo amɛtsɔɔ lɛ lɛ. Enɛ ha ana hegbɛ kɛha odaseyeli. Amrɔ nɔŋŋ ni yoo lɛ kɛ edrɛs ha amɛ ni ekɛ miishɛɛ fɔ nine etsɛ amɛ koni amɛbasara lɛ. Aje nikasemɔ shishi. Etsɛɛɛ nɔŋŋ ni yoo lɛ bɔi kpeei yaa ni amrɔ nɛɛ egbaa mɛi krokomɛi anɔkwale lɛ.

¹³ Nyɛmi yoo onukpa ko kɛ hegbɛ ni enaa leebi maaŋkpa kɛhaa odaseyeli yɛ amɛ ŋshɔ lɛ naa lɛ tsu nii. Ekɛ abaawai, gbekɛbii akwɛlɔi, shikatoo he nitsulɔi, kɛ mɛi krokomɛi ni sheraa shi leebi yɛ gbɛ ni kã ŋshɔnaa lɛ nɔ lɛ kpeɔ. Efeɔ Biblia mli nikasemɔi, yɛ be mli ni eta sɛi ni yɔɔ ŋshɔ lɛ naa lɛ nɔ. Mɛi babaoo ekase anɔkwale lɛ kɛjɛ eŋɔɔ ni amɛtsɔmɔ Yehowa Odasefoi amrɔ nɛɛ.

¹⁴ Nyɛmi yoo ko nu ni naanyo nitsulɔ ko miiwie maŋkrwamɔŋ kuu ko ni eheɔ yeɔ akɛ, no kɛ je lɛŋ naagbai anaa tsabaa baaba lɛ he, yɛ enitsumɔ hé. Nyɛmi yoo lɛ bɔi wiemɔ, ni egba nɔ ni Nyɔŋmɔ Maŋtsɛyeli baafee lɛ he shiwoo he sane. Sanegbaa ni tee nɔ yɛ nitsumɔ he nɛɛ ha abɔi daa Biblia mli nikasemɔ yɛ shia, ni yɛ naagbee lɛ, yoo lɛ kɛ ewu batsɔ Odasefoi.

¹⁵ Ohiɛ Akakpa nɔ Kɔkɔɔkɔ akɛ Oji Odasefonyo! Beni Yesu wie ekaselɔi lɛ ahe akɛ “je lɛŋ la lɛ,” etsɔɔ akɛ esa akɛ amɛye amɛbua mɛi krokomɛi ni amɛná Nyɔŋmɔ Wiemɔ lɛ he mumɔŋ shishinumɔ lɛ he sɛɛ. Kɛ wɔkɛ Yesu ŋaawoo lɛ tsu nii lɛ, te wɔbaabu wɔ sɔɔmɔ nitsumɔ lɛ wɔha tɛŋŋ?

¹⁶ Kɛ mɛi komɛi miitao nitsumɔ lɛ, amɛhalaa be-fa nitsumɔ. Amɛsumɔɔɔ ni amɛkɛ be kɛ hewalɛ fɛɛ tsuɔ, ejaakɛ amɛmiisumɔ ni amɛkɛ amɛbe babaoo atsu nitsumɔi ni amɛbaana he sɛɛ babaoo lɛ. Ani wɔmiina jwɛŋmɔ ni tamɔ nakai nɔŋŋ yɛ wɔ sɔɔmɔ nitsumɔ lɛ he? Eyɛ mli akɛ ekolɛ wɔbaanu he akɛ eji wɔ gbɛnaa nii ni wɔmiisumɔ ni wɔto be wɔma shi kɛha shiɛmɔ nitsumɔ lɛ moŋ, shi ani esa akɛ nɔ ni wɔsumɔɔ titri lɛ ahi he kroko?

¹⁷ Akɛni wɔle akɛ abɛ nɔ ko tamɔ be-fa Kristofonyo lɛ, wɔjɔɔ wɔhe nɔ, ‘wɔkwa wɔhe’ ni wɔkpɛlɛ nɔ akɛ wɔbaanyiɛ Yesu sɛɛ “daa.” (Mat. 16:24, NW) Nɔ ni wɔsumɔɔ ji ni wɔkɛ “susuma fɛɛ” atsu, ni wɔkɛ hegbɛ fɛɛ hegbɛ ni baaha wɔ la atso lɛ atsu nii koni wɔya mɛi aŋɔɔ yɛ he fɛɛ he. (Kol. 3:23, 24, NW) Esa akɛ wɔte shi wɔwo je lɛ sui, ni wɔhiɛ ekãa ni wɔkɛje shishi lɛ mli, ni wɔkwɛ ni wɔ la lɛ aya nɔ atso heŋŋ. Ekolɛ mɛi komɛi eha ekãa ni amɛyɔɔ lɛ eba shi, ni amɛha amɛ la lɛ kpɛmɔ eba shi kwraa, ni ekpɛɛɛ kɛyaaa shɔŋŋ. Ekolɛ yelikɛbuamɔ he baahia mɔ ni tamɔ nɛkɛ koni esaa ena ekãa kɛha sɔɔmɔ nitsumɔ lɛ ni je edɛŋ lɛ.

¹⁸ Mɛi komɛi baasumɔ ni amɛgbala amɛhe shi akɛni amɛsumɔɔɔ wɔ shɛɛ sane lɛ ni eŋɔɔɔ mɛi pii anaa lɛ hewɔ. Paulo kɛɛ akɛ Kristo he shɛɛ sane lɛ ji “kwashiaiasane ha mɛi ni hiɛ kpataa lɛ.” (1 Kor. 1:18) Shi yɛ nɔ ni mɛi aaakɛɛ fɛɛ sɛɛ lɛ, ekɛ ekãa jaje akɛ: “Mihiɛ gbooo . . . sanekpakpa lɛ he.” (Rom. 1:16) Mɔ ni hiɛ gboɔ lɛ nuɔ he akɛ ebaa shi loo ehe bɛ sɛɛnamɔ. Te aaafee tɛŋŋ ni wɔhiɛ aaagboi kɛ wɔwie jeŋ muu fɛɛ Maŋtsɛ lɛ kɛ nibii ni yɔɔ naakpɛɛ ni efee kɛha wɔ naanɔ miishɛɛ lɛ he lɛ? Jwɛŋmɔ bɛ mli akɛ wɔɔnu he akɛ wɔbaa shi loo ni wɔhe bɛ sɛɛnamɔ beni wɔwieɔ anɔkwalei nɛɛ ahe wɔtsɔɔ mɛi krokomɛi. Yɛ no najiaŋ lɛ, esa akɛ etsirɛ wɔ ni wɔfee nɔ fɛɛ nɔ ni wɔɔnyɛ, ni wɔtsɔɔ hemɔkɛyeli ni wɔyɔɔ akɛ mɛi ni “hiɛ gbooo.”—2 Tim. 2:15.

¹⁹ Anɔkwale la lɛ ni tsoɔ amrɔ nɛɛ yɛ shikpɔji ni yɔɔ jeŋ fɛɛ nɔ lɛ kɛ naanɔ wala yɛ paradeiso jeŋ hee mli he hiɛnɔkamɔ haa yɛ miishɛɛ mli. Nyɛhaa wɔtsɔɔa akɛ wɔkɛ ŋaa ni awoɔ koni wɔha wɔ la atso daa lɛ eto wɔtsui mli! Kɛ wɔfee nakai lɛ, wɔbaaná nɔ ni wɔɔdamɔ nɔ wɔha wɔmli afili wɔ tamɔ kaselɔi lɛ ni ‘efɔ̃ɔɔ nitsɔɔmɔ kɛ Yesu Kristo he shiɛmɔ’ daa lɛ nɔŋŋ.—Bɔf. 5:42.