Kuu Osɛɛ Koni Oyahere Mɛi Komɛi Ayiwala

¹ Eji Nyɔŋmɔ suɔmɔnaa nii “akɛ ehere gbɔmɛi fɛɛ yiwala, koni amɛshɛ anɔkwale lɛ lee mli.” (1 Tim. 2:4) Mɛni wɔbaanyɛ wɔfee ni wɔkɛye wɔbua? Feemɔ sɛɛsaramɔi kɛ yiŋtoo akɛ obaatsɔɔ mɛi anɔkwale lɛ. Mɛni obaakɛɛ? Ŋaawoi ni nyiɛ sɛɛ ni wieɔ Weku Shihilɛ wolo lɛ he lɛ baanyɛ aye abua bo.

² Kɛ otee fɔlɔ ko ni he “Weku Shihilɛ” wolo lɛ ŋɔɔ lɛ, obaanyɛ okɛ mfoniri ni yɔɔ baafa 4 lɛ atsɔɔ lɛ ekoŋŋ ni obi shiatsɛ lɛ akɛ:

◼ “Beni okwɛ wolo ni mishi miha bo lɛ mli kɛtee hiɛ ni osusu paradeiso shikpɔŋ he shiwoo ni Nyɔŋmɔ kɛha lɛ he lɛ sɛɛ lɛ, te onuɔ gbɛkpamɔi ni yɔɔ kɛha weku shihilɛ ni miishɛɛ yɔɔ mli yɛ shikpɔŋ nɔ lɛ he ohaa tɛŋŋ?” Beni okpɛlɛ bɔ ni shiatsɛ lɛ jie enaa eha lɛ nɔ ni owie he fioo sɛɛ lɛ, obaanyɛ ogbala jwɛŋmɔ kɛya saneyitso bibioo ni yɔɔ baafa 8 lɛ nɔ ni okɛ lɛ awie ni nyɛsusu yitso 1 lɛ he koni nyɛna gbɛ ni aaatsɔ nɔ ana miishɛɛ yɛ weku lɛ mli.

³ Obaanyɛ okɛ gbekɛ ko aje sanegbaa shishi ekoŋŋ kɛtsɔ enɛ kɛɛmɔ nɔ:

◼ “Beni miba biɛ be ko lɛ, wɔwie yiŋtoo ni Nyɔŋmɔ yɔɔ akɛ eeebɔ jeŋ hee ni toiŋjɔlɛ yɔɔ mli, ni weku shihilɛ ni miishɛɛ yɔɔ mli baahi mli aahu lɛ he. Sane ni mibiɔ bianɛ ji, Mɛni esa akɛ wɔfee ni wɔnine ashɛ jɔɔmɔi nɛɛ anɔ? Te obaaha enɛ he hetoo oha tɛŋŋ?” Ŋmɛɛ gbɛ ni ewie. Gbelemɔ baafa 184 ni nyɛgba saji ni asusuɔ he yɛ kukuji 8 kɛ 9 lɛ he sane, ni oma bɔ ni ehe hiaa akɛ atswa hemɔkɛyeli ni mli wa ama shi kɛtsɔ Nyɔŋmɔ Wiemɔ lɛ kasemɔ nɔ lɛ nɔ mi. Tsɔɔmɔ gbɛ ni abaanyɛ atsɔ nɔ afee enɛ kɛtsɔ wɔ shia Biblia mli nikasemɔ he gbɛjianɔtoo ni akɛaatsu nii lɛ nɔ.

⁴ Obaanyɛ okɛ enɛ kɛɛmɔ adi “Weku Shihilɛ” wolo lɛ kɛhamɔ sɛɛ:

◼ “Beni mibasara bo klɛŋklɛŋ lɛ, minya bɔ ni osusuɔ oweku lɛ he jogbaŋŋ ohaa lɛ he. Akɛni nibii agbɛjianɔtoo fɔŋ naagbee gbii amli wɔyɔɔ hewɔ lɛ, ehe miihia ni wekui aya nɔ asaa amɛhe amɛha wɔsɛɛ be. Kɛbashi amrɔ nɛɛ, wolo ni ji, Oweku Shihilɛ Ni Oooha Efee Miishɛɛ lɛ ni mishi miha bo lɛ woɔ ŋaa jogbaŋŋ ni agba Biblia mli sane daa yɛ shia. [Kanemɔ kuku 10 ni yɔɔ baafai 185-6 lɛ.] Kɛ aaahi lɛ, masumɔ akɛ mikɛ minitii fioo ko pɛ afee bɔ ni mɛi ni yɔɔ shikpɔji ni shɛɔ 200 nɔ lɛ gbaa Biblia mli sane yɛ shia akɛ wekui lɛ he nɔkwɛmɔ.” Kɛ be yɛ lɛ, okɛ nikasemɔ ni yɔɔ saneyitso bibioo lɛ shishi lɛ ni yɔɔ baafa 71 lɛ afee nikasemɔ lɛ he nɔkwɛmɔ nɔ.

⁵ Obaanyɛ odi “Weku Shihilɛ” wolo lɛ he yiŋtoo lɛ he sanegbaa lɛ sɛɛ kɛtsɔ enɛ kɛɛmɔ nɔ:

◼ “Miba biɛ be ko koni mibatsɔɔ bo Nyɔŋmɔ yiŋtoo ni eyɔɔ kɛha weku shihilɛ lɛ he nii babaoo.” Gbelemɔ kɛya mfoniri ni yɔɔ baafa 12 lɛ nɔ, kanemɔ Mateo 7:24-27 lɛ, koni no sɛɛ lɛ otsɔɔ bɔ ni enɛ kɔɔ shishitoo kpakpa ni aaana aha gbalashihilɛ mli miishɛɛ namɔ he lɛ mli kuku. Okɛ wolo lɛ yitso 2 lɛ mli sanegbaa atsa nɔ koni no sɛɛ lɛ okɛ lɛ afee shia Biblia mli nikasemɔ ni aheee nɔ ko.

⁶ Kaimɔ akɛ oti ni ma sɛɛsaramɔ ni afeɔ lɛ hiɛ ji ni aje Biblia mli nikasemɔi ashishi. Kɛ wɔdi Weku Shihilɛ wolo lɛ kɛ woji memeji krokomɛi kɛhamɔ sɛɛ ni wɔje nikasemɔ shishi lɛlɛŋ lɛ, ebaahi akɛ aaagbala jwɛŋmɔ kɛaaya Nilee wolo hee ni ato he gbɛjianɔ diɛŋtsɛ kɛha nikasemɔi afeemɔ lɛ nɔ yɛ sɛɛ mli. Wɔmli baafili wɔ babaoo, yɛ be mli ni mɛi ni kaseɔ nii lɛ baleɔ Yehowa gbɛi lɛ tsɛmɔ kɛha yiwalaheremɔ lɛ.—Bɔf. 2:21.