Du Naanɔ Wala He Hiɛnɔkamɔ lɛ Owo Mɛi Krokomɛi Amli
1 Eyɛ mli akɛ gbɔmɔ etao gbɛ̀i ni eeetsɔ nɔ ekũ nibii ni kɛ gbɔlɛ baa lɛ naa ní eha ewala sɛɛ atsɛ moŋ, shi gbɔlɛ kɛ gbele kã he amɛji nɔ ko ni anyɛɛɛ akũ naa. Kwɛ bɔ ni wɔdaa shi wɔhaa akɛ Biblia lɛ tsɔɔ nɔ hewɔ ni adesai gbɔlɔɔ ni amɛgboiɔ lɛ mli, kɛ agbɛnɛ hu gbɛ ni aaatsɔ nɔ akpata nifitemɔi ni gbɔlɛ kɛbaa lɛ hiɛ ni ajie gbele kɛya lɛ mli. Ájie anɔkwalei ni yɔɔ faŋŋ nɛɛ kpo yɛ wolo ni ji Nilee Ni Kɛ Mɔ Yaa Naanɔ Wala Mli lɛ mli. Wolo lɛ haa sanebimɔi ni kɔɔ wala kɛ gbele he, ni gbaa jwɛŋmɔ naa lɛ hetoo yɛ faŋŋ mli, ni egbalaa nikanelɔ lɛ jwɛŋmɔ kɛyaa be ni akɛ Paradeiso baaba ekoŋŋ lɛ nɔ.
2 Wɔkɛ Nilee wolo lɛ baatsu nii yɛ March mli, kɛ oti ni ma hiɛ akɛ wɔbaaje shia Biblia mli nikasemɔi ashishi. (Mat. 28:19, 20) No sɛɛ lɛ, wɔbaaku sɛɛ wɔyasara gbɔmɛi fɛɛ ni ejie Maŋtsɛyeli shɛɛ sane lɛ he miishɛɛ kpo lɛ. Yɛ nɛkɛ gbɛ nɔ lɛ, wɔbaanyɛ wɔdu naanɔ wala he hiɛnɔkamɔ lɛ wɔwo mɛi krokomɛi amli. (Tito 1:2) Bɔni afee ni wɔtsu enɛ he nii lɛ, ekolɛ ŋaawoi ni nyiɛ sɛɛ lɛ baanyɛ aye abua bo.
3 Kɛ otee mɔ lɛ ŋɔɔ klɛŋklɛŋ lɛ, obaanyɛ obi sane nɛɛ:
◼ “Ani osusu nɔ hewɔ ni adesai shweɔ ni amɛwala sɛɛ atsɛ lɛ he dã? [Ŋmɛɛ gbɛ ni ewie.] Buddhabii, Kristofoi, Hindubii, Muslimbii, kɛ mɛi krokomɛi fɛɛ yɛ shihilɛ yɛ gbele sɛɛ he hiɛnɔkamɔ.” Gbelemɔ Nilee wolo lɛ kɛya yitso 6, “Mɛni Hewɔ Wɔgbɔlɔɔ ni Wɔgboiɔ?,” ni okane kuku 3 lɛ. Okɛ lɛ asusu ŋmalɛi ni aŋmalako emli wiemɔi lɛ ahe. Tsĩi sanebimɔi enyɔ ni yɔɔ kuku lɛ naagbee lɛ mli lɛ tã, ni obi shiatsɛ lɛ kɛji eeesumɔ ni lɛ diɛŋtsɛ ena hetoo lɛ. Kɛ eeshwe koni efee nakai lɛ, belɛ tsa sanegbaa lɛ nɔ yɛ kukuji fioo ni nyiɛ sɛɛ lɛ mli. Aje nikasemɔ shishi! Okɛ wolo lɛ aha lɛ ni oto gbɛjianɔ koni oku osɛɛ, kɛ eeehi lɛ, ekolɛ yɛ gbi kome loo enyɔ sɛɛ, koni nyɛgba sane hetoo lɛ he sane lolo.
4 Kɛ otee mɔ ko ni okɛ “Nilee” wolo lɛ eha lɛ lɛ ŋɔɔ lɛ, obaanyɛ okɛɛ akɛ:
◼ “Miku misɛɛ miba koni mikɛ bo abasusu sanebimɔi enyɔ ni kɔɔ gbele he, ni wɔhaaa hetoo nyɛsɛɛ lɛ he.” Kaimɔ shiatsɛ lɛ nakai sanebimɔi lɛ. No sɛɛ lɛ, nyɛsusua saneyitso bibioo ni ji “Efɔŋ He Ŋaa ni Atsɔ” ni yɔɔ yitso 6 lɛ shishi lɛ he. Yɛ bɔ ni shihilɛi lɛ baatamɔ naa lɛ, obaanyɛ otsa nikasemɔ lɛ nɔ aloo okɛ naagbee sanebimɔ ni yɔɔ kuku 7 lɛ naagbee gbɛ lɛ atsu nii kɛha nikasemɔ ni baanyiɛ sɛɛ lɛ. Too gbɛjianɔ jogbaŋŋ ni oku osɛɛ. Gbalamɔ jwɛŋmɔ kɛya asafoŋ kpeei anɔ, ni otsɔɔ lɛ bɔ ni afeɔ lɛ ahaa lɛ mli kuku. Okɛ miishɛɛ afɔ̃ lɛ nine koni eba.
5 Kɛ́ shia-kɛ-shia loo trukaa odaseyeli lɛ, obaanyɛ oje sanegbaa shishi okɛɛ akɛ:
◼ “Ani osusu nɔ ni baaba wɔ kɛ shikpɔŋ lɛ nɔ wɔsɛɛ lɛ he pɛŋ? [Ŋmɛɛ gbɛ ni ewie.] Biblia lɛ muɔ sane ni kɔɔ nɔ ni baaba wɔsɛɛ he lɛ naa yɛ wiemɔ kome mli—Paradeiso! Etsɔɔ akɛ, yɛ shishijee mli lɛ, Nyɔŋmɔ fee shikpɔŋ lɛ he ko paradeiso fɛfɛo, ni ekɛ adesai enyɔ ni ebɔ amɛ lɛ to jɛmɛ. Esa akɛ amɛfɔ́ ni shikpɔŋ lɛ nɔ fɛɛ ayi obɔ, ni amɛfee lɛ paradeiso fiofio. Kadimɔ bɔ ni esa akɛ sanemlitsɔɔmɔ nɛɛ atamɔ aha lɛ.” Gbelemɔ Nilee wolo lɛ kɛya baafa 8 lɛ, ni okane kuku 9 lɛ ni yɔɔ saneyitso bibioo ni ji “Shihilɛ yɛ Paradeiso” lɛ shishi lɛ. No sɛɛ lɛ, nyɛsusua saji otii ni yɔɔ kuku 10 lɛ mli lɛ he, ni okane Yesaia 55:10, 11, ni ji ŋmalɛ ni aŋmalako emli wiemɔi lɛ. Kɛɛmɔ lɛ akɛ okɛ lɛ baatsa sanegbaa ni tsɔɔ bɔ ni shihilɛ yɛ Paradeiso ni akɛbaaba ekoŋŋ lɛ mli lɛ baatamɔ aha lɛ he sane, ni nyɛkase kukuji 11-16 lɛ kutuu. Aloo wo mɔ lɛ hewalɛ koni lɛ diɛŋtsɛ ekane, ni oto gbɛjianɔ ni nyɛkpe ekoŋŋ ni nyɛsusu he.
6 Kɛ ajeee nikasemɔ shishi klɛŋklɛŋ lɛ, obaanyɛ obɔ mɔdɛŋ ofee nakai yɛ sɛɛsaramɔ lɛ mli ni okɛɛ akɛ:
◼ “Taakɛ wɔsusu he yɛ nyɛsɛɛ sanegbaa lɛ mli lɛ, eji Nyɔŋmɔ yiŋtoo akɛ atsake shikpɔŋ lɛ fɛɛ afee lɛ paradeiso. No teeɔ sanebimɔ nɛɛ shi akɛ, Te Paradeiso baatamɔ aha tɛŋŋ?” Gbelemɔ kɛya yitso 1 yɛ Nilee wolo lɛ mli, ni nyɛkase kukuji 11-16 ni yɔɔ saneyitso bibioo ni ji “Shihilɛ yɛ Paradeiso ni Akɛba Ekoŋŋ lɛ Mli.” No sɛɛ lɛ, okɛ mfoniri ni yɔɔ baafai 4-5 lɛ atsɔɔ lɛ, ni obi mɔ lɛ kɛji eeesumɔ ni ehi shihilɛhei fɛfɛji ni tamɔ nakai mli. Agbɛnɛ kanemɔ klɛŋklɛŋ sane ni yɔɔ kuku 17 ni yɔɔ baafa 10 lɛ. Yɛ bɔ ni shihilɛi lɛ baatamɔ naa lɛ, tsa nikasemɔ lɛ nɔ aloo okɛɛ akɛ kɛ oku osɛɛ oba ekoŋŋ lɛ, obaagbala nɔ ni ataoɔ yɛ wɔdɛŋ bɔni afee ni mɔ ko ahi shi yɛ Paradeiso ni akɛbaa ekoŋŋ lɛ mli lɛ mli otsɔɔ lɛ. Tsɔɔmɔ lɛ bei ni asafo lɛ kɛyaa kpee, ni okɛ miishɛɛ afɔ̃ mɔ lɛ nine koni eba Maŋtsɛyeli Asa lɛ nɔ.
7 Nilee wolo lɛ ji dɛŋdade ni nɔ bɛ ni akɛaatsu nii kɛjie “naanɔ wala” he shiwoo ni Nyɔŋmɔ kɛha lɛ atsɔɔ mɛi krokomɛi. Shia Biblia mli nikasemɔi ni okɛ gbɔmɛi aaafee lɛ baanyɛ adu hiɛnɔkamɔ wulu ni Nyɔŋmɔ “ni maleee” lɛ ejɛ mumɔ mli ekɛha lɛ awo gbɔmɛi amli.