Afi 2004 “Okɛ Nyɔŋmɔ Anyiɛ” Yehowa Odasefoi a-Kpokpaa Wulu nɔ Kpee
1 Mɛni haa wɔ daa afi kpokpaa wuji anɔ kpee lɛ bafeɔ nɔ ko krɛdɛɛ kɛhaa bo? Ani wiemɔi ni tswaa mɔ emaa shi kɛ drama ni “tsulɔ anɔkwafo kɛ nilelɔ” lɛ saa etoɔ wɔ lɛ ni? (Mat. 24:45-47) Ani woji heei kɛ emli mumɔŋ niyenii ni yɔɔ ebe naa lɛ ni? Ani nyɛmimɛi hii kɛ yei ni gbaa bɔ ni Biblia lɛ etsake amɛshihilɛi yɛ gbɛ kpakpa nɔ lɛ aniiashikpamɔi lɛ ni? Ani bɔ ni Maŋtsɛyeli shiɛmɔ nitsumɔ lɛ yaa nɔ ehaa yɛ shikpɔji krokomɛi anɔ lɛ he amaniɛbɔi lɛ ni? Ani nanemɛi heyelilɔi ni eye afii srɔtoi ni wɔkɛ bɔɔ lɛ ni? Hɛɛ, yɛ yiŋtoi nɛɛ kɛ ekrokomɛi ni fa babaoo ahewɔ lɛ, wɔkɛ gbɛkpamɔ ni mli wa kwɛɔ wɔkpeei lɛ agbɛ!
2 Yaa Gbii Etɛ lɛ Fɛɛ: Yehowa tsɔ Mose nɔ ni efã akɛ: “Ha ni maŋ lɛ . . . abua amɛhe naa, koni amɛnu, ni amɛkase.” (5 Mose 31:12) Yehowa etsɔ tsulɔ anɔkwafo kɛ nilelɔ kuu lɛ nɔ eto tsɔsemɔ he gbɛjianɔ krɛdɛɛ ko eha wɔ yɛ wɔkpee lɛ gbii srɔtoi lɛ fɛɛ amli. Akɛni eetsɔɔ wɔ nii koni ‘ehi eha wɔdiɛŋtsɛ’ hewɔ lɛ, wɔbaasumɔ akɛ wɔhi jɛmɛ kɛha nibii fɛɛ ni ebaatsɔɔ wɔ lɛ. (Yes. 48:17) Kɛ́ ehe miihia ni obi gbɛ bianɛ kɛjɛ onitsumɔtsɛ lɛ dɛŋ lɛ, no lɛ nyiɛmɔ Nehemia ekãafeemɔ he nɔkwɛmɔnɔ lɛ sɛɛ, kɛtsɔ Yehowa ni ooosɔle oha lɛ ni okɛ ogbɛbimɔ lɛ ayafɔ̃ onitsumɔtsɛ lɛ hiɛ lɛ nɔ. (Neh. 1:11; 2:4) Agbɛnɛ hu, ebaafee nɔ ni suɔmɔ yɔɔ mli ákɛ oooha owekumɛi ni heee yeee lɛ ale ogbɛjianɔtoo kɛha kpee lɛ amrɔ nɔŋŋ kɛ́ aaahi.
3 Wɔɔhei Ataomɔ: Akɛ “Room Request” woji lɛ eko miimaje asafo fɛɛ asafo. Kɛji ootao wɔɔhe kɛtsɔ kpee he gbɛjianɔtolɔi lɛ anɔ lɛ, no lɛ ofainɛ ni oŋma “Room Request” wolo lɛ eko nɔ nii, ni okɛha asafoŋ woloŋmalɔ lɛ koni esaa ekwɛ mli, ní no sɛɛ lɛ okɛmaje he ni obaaya kpee lɛ yɛ lɛ. ESAAA akɛ akɛ “Room Request” woji kɛ kpee he woji krokomɛi ni aŋmalaa lɛ majeɔ nitsumɔhe nine ni yɔɔ Accra lɛ.
4 Abaaná wɔɔhei lɛ ekomɛi yɛ mɛi ashiai amli. Akɛ tsũi nɛɛ baaha kɛha kpee be lɛ PƐ. Esa akɛ mɛi ni nine shɛɔ wɔɔhei ni tamɔ nɛkɛ nɔ lɛ akwɛ koni amɛ kɛ amɛbii lɛ fɛɛ ajie bulɛ kpo amɛtsɔɔ amɛ gbɔfeelɔ lɛ, ni amɛkagbɛ́lɛ gbɔfeelɔ lɛ nibii amli loo ní amɛmiifite enibii lɛ loo ní amɛmiibote shia lɛ mli hei komɛi ni esaaa akɛ amɛyaa jɛmɛ lɛ. Kɛ́ shiatsɛmɛi ná naagbai yɛ enɛ gbɛfaŋ lɛ, esa akɛ amɛha tsũ taomɔ nɔkwɛlɔ ni yɔɔ kpee lɛ shishi lɛ ale enɛɛmɛi amrɔ nɔŋŋ, ni ebaaná he miishɛɛ akɛ eeeye ebua.
5 Mɛi ni ŋmalaaa “Room Request” woji lɛ anɔ nii dani amɛyashɛɔ he ni afeɔ kpee lɛ yɛ lɛ kɛ naagbai bahaa kpee shishi gbɛjianɔtoo lɛ ejaakɛ ehe bahiaa ni akɛ be ni faaa atao wɔɔhe aha kpeeiyalɔi ni tamɔ nɛkɛ. Gbɛjianɔ ni atoɔ yɛ naagbee mli kwraa nɛɛ tsɔɔ mɛi krokomɛi ahe ni asusuuu. No hewɔ lɛ, esa akɛ kpeeiyalɔi fɛɛ ni wɔɔhe he baahia amɛ kɛtsɔ kpee shishi gbɛjianɔtoo lɛ nɔ lɛ aŋmala “Room Request” woji lɛ anɔ nii koni akɛ enɛɛmɛi amaje kpee shishi gbɛjianɔtoo lɛ mra kɛtsɔ hiɛ. Amrɔ nɛɛ, nɔtsamɔ skulbii awɔɔhei komɛi ni anáa ahaa kpeeiyalɔi lɛ biɔ ni awo nyɔmɔ ni fa kɛha kpeeiyalɔ fɛɛ kpeeiyalɔ yɛ gbɛkɛ fɛɛ gbɛkɛ ni ekɛaawɔ jɛmɛ lɛ hewɔ. No hewɔ lɛ, ehe miihia ni wɔsaa wɔhe koni wɔkɛ shika aye abua kɛha wɔɔhei lɛ, kɛ́ eji skulbii awɔɔhe loo wɔɔhe yɛ mɔ ko shia mli.
6 Hiamɔ Nii Krɛdɛɛ: Bɔfo Paulo kai asafoi ni yɔɔ Galata lɛ koni ‘amɛfee mɛi fɛɛ ejurɔ, shi titri lɛ mɛi ni ji hemɔkɛyeli lɛ webii lɛ.’ (Gal. 6:10) Ekolɛ nyɛmimɛi hii kɛ yei ni edara, mɛi ni egbɔjɔ, kɛ mɛi ni yɔɔ be-fɛɛ sɔɔmɔ lɛ mli lɛ biŋ ni oye obua amɛ, shi ekolɛ amɛyɛ naagbai ni esa akɛ amɛtsu he nii koni amɛnyɛ amɛya kpee lɛ. Ani obaanyɛ ‘ofee amɛ ejurɔ’ ni okɛ yelikɛbuamɔ aha amɛ? Esa akɛ wekumɛi ni ji Kristofoi kɛ onukpai ahiɛ ahi amɛhe nɔ titri yɛ shihilɛ ni mɛi ni tamɔ nɛkɛ lɛ yɔɔ mli lɛ ahe.
7 Kɛ́ shiɛlɔ ko ni yɔɔ hiamɔ nii krɛdɛɛ kɛ “Room Request” wolo ha lɛ, Asafoŋ Sɔɔmɔ Ajinafoi Akuu lɛ kɛ gbɛtsɔɔmɔi ni yɔɔ wolo lɛ mli lɛ baatsu nii ni amɛsaa amɛkɛkwɛ mli ekoŋŋ. Esa akɛ amɛsusu he kɛji abaanyɛ atsu hiamɔ nii lɛ he nii yɛ asafo lɛ mli. Nɛkɛ gbɛjianɔtoo nɛɛ yɛ kɛha shiɛlɔi ni feɔ nɔkwɛmɔnɔ kpakpa kɛ amɛbii ni baa amɛjeŋ jogbaŋŋ lɛ pɛ. Kɛ́ Rooming Department nitsulɔi lɛ yɛ sanebimɔi komɛi yɛ nibimɔ kɛha hiamɔ nii krɛdɛɛ ko he lɛ, amɛbaana asafoŋ woloŋmalɔ lɛ.
8 Kpee Kroko ni Aaaya: Ekolɛ shihilɛi amli ni oyɔɔ lɛ baabi ni oya kpee kroko ni jeee no ato akɛ nyɛ asafo lɛ aya lɛ. Akɛ nitsumɔhe yitsei ni kwɛɔ kpeei srɔtoi lɛ fɛɛ anɔ lɛ adrɛs eha yɛ nɔ ni aŋma awo wolo nɛɛ mli lɛ baafa ni ji 6 lɛ mli. Okɛ ogbɛbimɔ wolo lɛ amaje adrɛs ni sa lɛ. Kɛ́ abaafee kpeei enyɔ loo nɔ ni fe nakai yɛ maŋtiase lɛ mli lɛ, ŋmaa gbii ni abaafee kpee ni obaasumɔ ni oya lɛ yɛ ogbɛbimɔ wolo lɛ nɔ.
9 Yɛ asafoi ni yɔɔ shɔŋŋ lɛ ekomɛi agbɛfaŋ lɛ, ekolɛ nibii tamɔ wiemɔ, gbɛ lɛ jɛkɛmɔ, kɛ tsɔne ni akɛbaaya lɛ baaha efee nɔ ni hi waa akɛ amɛaaya kpee lɛ yɛ he kroko moŋ fe he ni ato ni amɛya lɛ. Asafoi ni yɔɔ shihilɛ ni tamɔ nɛkɛ mli lɛ yɛ hegbɛ ni amɛyaa kpokpaa wulu nɔ kpee lɛ yɛ he kroko. Ehe ehiaaa ni amɛŋma nitsumɔhe nine lɛ wolo ni amɛkɛbi gbɛ. Shi kɛlɛ, esa akɛ asafoi ni baakpɛ amɛyiŋ akɛ amɛbaaya kpee kroko ni jeee nɔ ni ato ni amɛya lɛ aha kpokpaa nɔkwɛlɔ lɛ ale mra kɛtsɔ hiɛ koni ekato amɛsaramɔ he gbɛjianɔ kɛha nakai otsi ni amɛbaaya kpee lɛ. Kɛ́ asafo lɛ baaya kpee ni ato akɛ amɛya loo amɛbaaya ekroko jio, esa akɛ nyɛmimɛi hii ni kwɛɔ tsɔne taomɔ he gbɛjianɔtoi anɔ lɛ akwɛ koni tsɔne fɛɛ tsɔne ni amɛaato he gbɛjianɔ lɛ afee nɔ ni naagba ko bɛ he ni yɔɔ shweshweeshwe. Esa akɛ onukpai lɛ akwɛ hu akɛ mɛi ni baakwɔ tsɔne lɛ akafa fe yibɔ ni ato ni ewo lɛ ni akɛmiiku Kaisare mla mli.
10 Tamale Kpee: Abaafee “Okɛ Nyɔŋmɔ Anyiɛ” Kpokpaa Wulu nɔ Kpeei lɛ ekome yɛ Tamale kɛjɛ December 31, 2004 kɛyashi January 2, 2005 mli yɛ Twi kɛ Frafra wiemɔi amli. Aawo nyɛmimɛi fɛɛ ni jɛ wuoyigbɛ ni baanyɛ aya lɛ hewalɛ ni amɛya kpee nɛɛ. Nitsumɔhe nine lɛ etoŋ tsɔne he gbɛjianɔ krɛdɛɛ afi nɛɛ kɛha gbɛfãa lɛ. Aawo mɛi ni toɔ gbɛjianɔ koni amɛya lɛ hewalɛ ni amɛye odase tɛ̃ɛ, ni amɛye trukaa odase hu beni amɛyɔɔ Tamale lɛ.
11 Nitsumɔ ni Tsɔɔ Kpee Hiɛ: Hiɛ esɔ enɛ he nii ni nyɛtsu yɛ be ni eho lɛ mli lɛ jogbaŋŋ. Taakɛ afɔɔ feemɔ lɛ, abaama agba, abaatsu falefalefeemɔ nitsumɔi srɔtoi, kɛ nitsumɔi krokomɛi. Wɔyɛ nɔmimaa akɛ, mɛi fɛɛ ni yɔɔ asafoi ni bɛŋkɛ he ni abaafee kpee lɛ yɛ lɛ baato gbɛjianɔ koni amɛná nitsumɔ ni he hiaa nɛɛ mli gbɛfaŋnɔ kɛmɔ shi yɛ otsii anaagbee kɛ otsi lɛ mli gbii lɛ amli. Kɛ́ mɛi ni fa saŋŋ baanyɛ ato gbɛjianɔ koni amɛba jɛmɛ beni eshwɛ gbi kome loo gbii enyɔ ni kpeei srɔtoi lɛ baaje shishi, bɔni afee ni ato nɔ fɛɛ nɔ he gbɛjianɔ lɛ, no lɛ enɛ baaye ebua waa. Akɛni shika ni anáa kɛjɛɔ oniatsumɔ mli ji nɔ ni akɛtoɔ kpeei ahe gbɛjianɔ ni akɛfeɔ kpeei lɛ hewɔ lɛ, kɛ́ wɔtee ni wɔyatsu nitsumɔ ni tsɔɔ kpee hiɛ lɛ, esaaa akɛ wɔkpaa gbɛ akɛ kpee he gbɛjianɔtolɔi lɛ baaha wɔ niyenii.
12 Jɛɛ Suɔmɔ Mli ni Okɛ Ohe Aha: Mɛi ohai abɔ kɛ amɛhe haa beni kpee lɛ yaa nɔ koni amɛha nitsumɔhei bibii ni yɔɔ kpee lɛ shishi lɛ anitsumɔi lɛ aya nɔ jogbaŋŋ. Mɛi ni kwɛɔ shitaramɔi anɔ ni yɔɔ kpee lɛ shishi kɛ tsɔnei amaamɔhei lɛ kɛ gbɛtsɔɔmɔi haa kɛha shitaramɔ, ni amɛkwɛɔ wɔtsɔnei anɔ amɛhaa wɔ yɛ gbi lɛ mli. Cleaning Department (Falefalefeemɔ Nitsumɔhe) lɛ ená hegbɛ akɛ amɛaafĩ gbɛi kpakpa ni wɔyɔɔ yɛ falefalefeemɔ gbɛfaŋ lɛ sɛɛ, ni amɛhaa he ni wɔkpeɔ yɛ yɛ be kukuoo mli kɛha jamɔ lɛ feɔ falefale fe bɔ ni wɔbanina lɛ. Ani wɔbaanyɛ wɔye wɔbua mɛnɛɛmɛi loo nitsumɔhei bibii krokomɛi ni wɔyelikɛbuamɔ he baahia amɛ lɛ? Ani okɛ ohe baaha koni oye obua ni okɛ onyɛmimɛi lɛ asɔmɔ ‘kɛ gbee kome’?—Zef. 3:9.
13 Niyenii He Nitsumɔ: Afii fioo komɛi eho kɛjɛ beni wɔtsake kɛba gbɛjianɔtoo ni ji “niyenii ahe gbɛjianɔ ni atooo” yɛ wɔkpeei wuji kɛ kpeei bibii lɛ fɛɛ ashishi lɛ. Aakpa gbɛ akɛ kpeeiyalɔi fɛɛ kɛ niyenii ni mli etsiii ni amɛbaaye ni amɛnu beni akpa fioo shwane lɛ baajɛ shia kɛba. Enɛ haa wɔhiɔ he ni afeɔ kpee lɛ yɛ lɛ kɛha naanyobɔɔ kɛ hewalɛwoo moŋ fe nɔ ni wɔɔya ni wɔyatao niyenii kɛ nɔ ko ni wɔbaanu akɛni wɔtooo gbɛjianɔ kɛha enɛɛmɛi lɛ hewɔ. Kɛ wɔfã gbɛ kɛtee maŋtiase ni afeɔ kpee yɛ mli lɛ mli po lɛ, esa akɛ wɔto gbɛjianɔ be fɛɛ be kɛtsɔ hiɛ akɛ wɔbaaná niyenii ko ni mli etsiii ni wɔ kɛ mɛi ni yɔɔ wiemɔ lɛ he miishɛɛ ni wɔfɔ̃ nine wɔtsɛ amɛ lɛ baaye beni akpa fioo shwane bɔni afee ni wɔkawo mɛi hewalɛ ni amɛkɛ hei ni wɔfeɔ kpee lɛ yɛ lɛ miitsɔmɔ jarayelihei. Nɛkɛ tsakemɔ nɛɛ haa wɔjieɔ wɔjwɛŋmɔ kɛjɛɔ niyenii anɔjwɛŋmɔ babaoo nɔ kɛyaa mumɔŋ saji ni he hiaa waa lɛ anɔ.
14 Nyɛhaa wɔkwɛa jogbaŋŋ yɛ he fɛɛ he ni wɔɔtara kɛha niyeli beni akpa fioo shwane lɛ, koni wɔkɛ nɔ ko akakpa sɛii lɛ anɔ loo ni wɔshi jwɛi wɔshwie jɛmɛ. Akɛ nibii ni abaanyɛ akɛ jwɛi awo mli baamamɔ shi yɛ kpee fɛɛ kpee shishi. Nyɛfainɛ ni nyɛkɛ jwɛi lɛ awo enɛɛmɛi amli.
15 Kpee Shishi Tsitsinaa-Tsɛɛ Nii kɛ Nɔ ni Akɛhɔɔ Mli: Kɛjɛ September kɛyaa lɛ, akɛ kpokpaa wulu nɔ kpee he tsitsinaa-tsɛɛ nii ni yɔɔ Blɔfo wiemɔ mli baafata woji ni akɛmajeɔ lɛ ahe. Ehe ebahiaŋ ni ashɛ enɛɛmɛi. Akɛ tsitsinaa-tsɛɛ nii lɛ baamaje asafoi lɛ fɛɛ yɛ mɛi ni yɔɔ asafo fɛɛ asafo mli lɛ ayibɔ naa. Kɛ tsitsinaa-tsɛɛ nii lɛ ekrokomɛi ahe baahia nyɛ asafo lɛ, no lɛ esa akɛ akɛ “Literature Request Form” (S-14) lɛ ashɛ eko. Nyɛfainɛ nyɛkadia akɛ akɛ plastik ni akɛwoɔ mli lɛ emajeŋ kɛ́ ashɛɛɛ. Ehe miihia ni akɛ “Literature Request Form” (S-14) lɛ ashɛ enɛɛmɛi aha asafo lɛ mli bii lɛ ateŋ mɔ fɛɛ mɔ ni taoɔ eko lɛ. Nyɛhaa ehia nyɛjwɛŋmɔ mli akɛ akɛ tsitsinaa-tsɛɛ nii kɛ nɔ ni akɛwoɔ mli lɛ eko baŋ kpeei lɛ ashishi.
16 Wiemɔi ni Amɔmɔɔ loo Vidio Shamɔi: Esa akɛ aŋkroaŋkroi fɛɛ ni baamɔmɔ wiemɔi lɛ yɛ kpãai anɔ kɛha amɛhe lɛ afee nakai yɛ gbɛ ni gbaŋ mɛi krokomɛi ni eba kpee lɛ shishi lɛ anaa loo ni eeegbala amɛjwɛŋmɔ kɛjɛ wiemɔ lɛ nɔ lɛ nɔ. Titri lɛ, esaaa akɛ amɛtaraa sarawa hewalɛ kpãai kɛ wiemɔ kpãai lɛ ahe. Wɔhiɛ sɔɔ ekome ni nyɛ kɛ wɔ feɔ yɛ enɛ gbɛfaŋ lɛ waa diɛŋtsɛ.
17 Yɛ kpee ko ni Yehowa webii fee aaafee afii 2,500 ni eho nɛ lɛ mli lɛ, Ezra kɛ enanemɛi Levibii lɛ kane Nyɔŋmɔ Wiemɔ lɛ ni amɛtsɔɔ shishi amɛha gbɔmɛi ni babua amɛhe naa lɛ. Mɛni jɛ mli kɛba? Nehemia 8:12 lɛ kɛɔ wɔ akɛ, “maŋ muu lɛ fɛɛ yiŋ amɛtee ni . . . amɛná miishɛɛ babaoo; ejaakɛ wiemɔi ní ajaje atsɔɔ amɛ lɛ amɛnu shishi.” Ani wɔdaaa shi akɛ tsulɔ kuu ni afɔ amɛ mu lɛ kɛ Nyɔŋmɔ Wiemɔ lɛ tsuɔ nii, ni amɛtsɔɔ shishi, ni amɛtsɔɔ wɔ bɔ ni wɔɔfee wɔkɛtsu nii yɛ wɔ diɛŋtsɛ wɔshihilɛi amli taakɛ Ezra kɛ Levibii lɛ fee lɛ? Yɛ enɛ feemɔ mli lɛ, nakai tsulɔ lɛ jieɔ anɔkwa suɔmɔ kɛ mɔ hesusumɔ ni Yehowa yɔɔ kɛha E-webii fɛɛ lɛ kpo. Tswaa ofai shi akɛ obaaya “Okɛ Nyɔŋmɔ Anyiɛ” Kpokpaa Wulu nɔ Kpeei lɛ gbii etɛ lɛ fɛɛ!
[Akrabatsa ni yɔɔ baafa 3]
Nifeemɔ Bei
Sohaa kɛ Hɔɔ
Leebi 9:30 - Gbɛkɛ 5:10
Hɔgbaa
Leebi 9:30 - Gbɛkɛ 4:05