Kpokpaa Wulu Nɔ Kpee kɛ Tsɛmɔ ni Kanyãa Mɔ Haa!
Okɛ Mlifilimɔ Ajie Yehowa Yi Gbi Fɛɛ Gbi!
1 Bɔfo Paulo bi akɛ: “Kɛji tɛtrɛmantrɛ egbɛɛɛ gbɛɛmɔ ni yɔɔ faŋŋ lɛ, namɔ aaasaa ehe ato ta?” (1 Kor. 14:8) Ani tsɛmɔ ni gbɛɛ yɛ “Miishɛɛ Yijielɔi” Kpokpaa Wulu nɔ Kpee lɛ shishi lɛ gbɛɛ waa ni eyɛ faŋŋ? Hɛɛ, nakai eji. ‘Okɛ mlifilimɔ ajie Yehowa yi gbi fɛɛ gbi’ lɛ ji shɛɛ sane ni kanyãa mɔ lɛ! Ani nɛkɛ tsɛmɔ nɛɛ tsirɛ otsui koni ofee he nɔ ko? Yiŋtoi ni mli wa ni baaha wɔjie naanɔ Maŋtsɛ, Yehowa, yi daa lɛ eyi kpee he gbɛjianɔtoo lɛ mli obɔ.—Lala 35:27, 28.
2 Ŋwɛi ni yɔɔ naakpɛɛ lɛ jajeɔ Yehowa anunyam lɛ “gbi fɛɛ gbi.” (Lala 19:1-3, NW) Kɛ bɔɔ nii ni wala bɛ amɛmli ni amɛwieee lɛ jieɔ Yehowa yi daa lɛ, ani esaaa akɛ etsirɛɔ wɔ adesai ni le nii lɛ koni wɔhole wɔgbeei anɔ kɛjie eyi yɛ bei fɛɛ mli yɛ esui kɛ nitsumɔi ni eko kɛ lɛ yeee egbɔ lɛ hewɔ? Namɔ sa wɔ yijiemɔ ni mlifilimɔ yɔɔ mli fe wɔ Bɔlɔ ni je agbo lɛ?—Lala 145:3, 7.
3 Gbi Fɛɛ Gbi: Lalatsɛ ni mumɔ kanyãa lɛ lɛ ŋma akɛ: “Nyɛgbaa eyiwalaheremɔ lɛ he sane gbi fɛɛ gbi! Ejaakɛ Yehowa da ni esa yijiemɔ babaoo.” (Lala 96:2, 4) Ani enɛ kɔɔ gbɛgbalɔi pɛ he? Dabi! Ani enɛ tsɔɔ akɛ esa akɛ wɔ fɛɛ wɔwie Yehowa he wɔtsɔɔ mɛi krokomɛi be fɛɛ be ni wɔɔnyɛ yɛ he fɛɛ he, kɛ gbii po ni wɔkɛ wɔhe wooo shia-kɛ-shia sɔɔmɔ nitsumɔ lɛ mli? Hɛɛ! Bɔ ni ehe hiaa ni wɔjie Yehowa yi daa gbi ni wɔkɛɛ mɛi krokomɛi nɔ ni eeetsɔ nɔ ekɛ yiwalaheremɔ aaaba lɛ he miihia. Esa akɛ mɛi ale akɛ Yehowa ji Naanɔ Maŋtsɛ, ni E-kɛ je lɛ nɔyeli eha E-Bi, Yesu Kristo ni awo ehiɛ nyam lɛ. Suɔmɔ kɛha Yehowa kɛ gbɔmɛi baaha wɔya nɔ wɔwie shɛɛ sane nɛɛ he, kɛ gbɛjianɔ ni eto kɛha yiwalaheremɔ lɛ he sane yɛ he fɛɛ he ni abaanyɛ ana gbɔmɛi yɛ.—Lala 71:15.
4 Yesu Kristo fee nɔkwɛmɔ nɔ ni hi fe fɛɛ efɔ shi daa gbi akɛ Yehowa yijielɔ ni shashaooo shi yɛ eshikpɔŋ nɔ sɔɔmɔ nitsumɔ lɛ mli. Ekɛɛ: “Miijie oyi, Ataa, ŋwɛi kɛ shikpɔŋ nuntsɔ.” (Mat. 11:25) Yɛ ewiemɔ lɛ kɛ gbeekpamɔ naa lɛ, he fɛɛ he ni Yesu yɔɔ lɛ, ejie Yehowa yi yɛ faŋŋ mli. Ni he fɛɛ he ni gbɔmɛi asafoi aaabua amɛhe naa yɛ lɛ—kɛji yɛ kpeehei, yɛ Yerusalem sɔlemɔwe lɛ, yɛ gɔji anɔ, loo ŋshɔnaa lɛ—ejie Yehowa yi. Kɛ wɔnyiɛ Yesu nanefaamɔi asɛɛ kpaakpa kɛtsɔ nitsumɔ ni wɔɔya nɔ wɔkɛjie Yehowa yi yɛ faŋŋ mli kɛtsara nɔ gbi fɛɛ gbi lɛ nɔ lɛ, nibii kpakpai ni yɔɔ miishɛɛ ni haa mɔ mli filiɔ lɛ baajɛ mli kɛba.
5 Tsɛmɔ lɛ Nɔkpɛlɛmɔ: Ani obaakpɛlɛ tsɛmɔ akɛ ajie Yehowa yi yɛ faŋŋ mli gbi fɛɛ gbi lɛ nɔ? Kaimɔ akɛ, afii ni mɔ ko eye lɛ jeee gbɛtsii nii. Lala 148:12 tsɛɔ obalahii, obalayei, hiimeji, kɛ gbekɛbii hii koni amɛbajie Yehowa yi. Gbekɛbii, ani nyɛbaajie Yehowa yi yɛ skulbii kɛ tsɔɔlɔi ateŋ afi nɛɛ? Onukpai, ani mɛi ni nyɛkɛ amɛ tsuɔ nii yɛ nyɛ nitsumɔ he lɛ nuɔ Yehowa kɛ eyiŋtoi ahe sane, kɛ be ni sa kɛha sanegbaa kutuu ba? Esa akɛ wɔ fɛɛ wɔwie Yehowa he babaoo akɛ wɔ shihilɛ lɛ fa, taakɛ mumɔ kɛ niyeli yɔɔ ha lɛ. Kɛ mɛi ni feɔ shikpilikpii lɛ po booo nɔ ni wɔkɛɔ toi lɛ, Mɔ ko yɛ ni boɔ toi, ni ebaawo wɔ nyɔmɔ.—Mal. 3:16.
6 Akɛni nibii agbɛjianɔtoo lɛ baa naagbee hewɔ lɛ, tsɛmɔ lɛ yashɛɔ shikpɔŋ lɛ naagbee hei, akɛ: “Nyɛjiea Yehowa yi, nyɛ gbɔmɛi!” (Lala 106:1, NW) Eba akɛ wɔ yijiemɔ lɛ gbɛɛmɔ lɛ naa baawa gbi fɛɛ gbi koni mɛi fɛɛ ale akɛ Mɔ ni gbɛi ji Yehowa lɛ ji Ŋwɛi Flooflonyo yɛ shikpɔŋ lɛ fɛɛ nɔ.—Lala 83:19.