Okɛ Onaanyo Awie Anɔkwale
1 Kitai wuji enyɔ ni fe fɛɛ lɛ ateŋ ekome ji: “Suɔmɔ onaanyo tamɔ bɔ ni osumɔɔ bo diɛŋtsɛ ohe.” (Mat. 22:39) Suɔmɔ ni tamɔ nɛkɛ baatsirɛ wɔ koni wɔkɛ wɔnaanyo ana nii ni hi fe fɛɛ ni wɔyɔɔ lɛ mli gbɛfaŋnɔ—anɔkwale ni wɔna yɛ Nyɔŋmɔ Wiemɔ lɛ mli lɛ. Akɛni Buu-Mɔɔ kɛ Awake! woji tɛtrɛbii lɛ gbɛɔ Biblia mli anɔkwale shɛɛ sane eshwaa hewɔ lɛ, woji nɛɛ ajaa kɛtsɔ amɛshɛɛ nɔ yɛ May nyɔŋ lɛ mli lɛ ji gbɛ kome ni wɔɔtsɔ nɔ wɔkɛ ‘wɔnanemɛi awie anɔkwale.’—Efe. 4:25.
2 Obaanyɛ okɛ April 22 “Awake!” lɛ atsu nii kɛje oshiɛmɔ wiemɔ lɛ shishi kɛtsɔ sanebimɔ nɛɛ nɔ:
◼ “Te onuɔ jeŋ ni ta bɛ mli lɛ he ohaa tɛŋŋ? [Ŋmɛɛ gbɛ ni ewie.] Ani ole akɛ je lɛŋ jamɔi lɛ diɛŋtsɛ teeɔ tawuu kɛ gbɔmɔgbee shi? [Ŋmɛɛ gbɛ ni ewie.] Nɔ ni tamɔɔɔ nakai kwraa lɛ, kadimɔ nɔ ni Biblia lɛ kɛɔ akɛ Nyɔŋmɔ anɔkwa jálɔi baafee.” Kanemɔ Yesaia 2:2-4 ni yɔɔ wolo tɛtrɛɛ lɛ baafa 4 lɛ yiteŋgbɛ lɛ, koni okane saneyitso bibioo ni ji “Kɛha Mɛi ni Sumɔɔ Toiŋjɔlɛ lɛ Tsɛmɔ” ni yɔɔ baafa 10 lɛ klɛŋklɛŋ kuku lɛ. No sɛɛ lɛ, bi akɛ: “Ani ole gbɛ ni Nyɔŋmɔ baatsɔ nɔ afee nakai? Anaa hetoo lɛ yɛ wolo tɛtrɛɛ nɛɛ mli, ni onɔ ni obaakane lɛ nɛ.” Yaa nɔ otsɔɔ wolo-shɛɛ he gbɛjianɔ ni ato lɛ mli.
3 Kɛ okɛ May 15 “Buu-Mɔɔ” lɛ miiha lɛ, bɔɔ mɔdɛŋ otsɔɔ adafi ko ni atswa nyɛsɛɛ nɛɛ ni eha gbɔmɛi enu he akɛ amɛbɛ hebuu [shweshweeshwe] lɛ, koni obi akɛ:
◼ “Mɛni osusuɔ akɛ no baaha wɔnu he akɛ wɔyɛ hebuu diɛŋtsɛ yɛ shihilɛ nɛɛ mli? [Ŋmɛɛ gbɛ ni ewie.] Yɛ anɔkwale fɛɛ mli lɛ, ani abaanyɛ akɛ hiɛ afɔ adesai anɔ koni akɛna naagbai ni adesai kɛkpeɔ lɛ anaa? [Ŋmɛɛ gbɛ ni ewie; koni okane Lala 146:3.] No sɛɛ lɛ, lalatsɛ lɛ kɛ yiŋtoo ni wɔɔdamɔ nɔ wɔkpa nɔ kpakpa gbɛ yɛ wɔsɛɛ be mli lɛ ha wɔ. [Kanemɔ Lala 146:5, 6.] Nɛkɛ sane ni ji, ‘Hebuu Diɛŋtsɛ, Bianɛ ni Agbɛnɛ Kɛmiiya Naanɔ’ lɛ tsɔɔ nɔ hewɔ ni wɔbaanyɛ wɔkɛ wɔhiɛ afɔ Yehowa Nyɔŋmɔ nɔ koni ekɛ shihilɛi kpakpai aba shikpɔŋ nɔ.” Okɛ woji tɛtrɛbii aha ni oha ashɛ. Too gbɛjianɔ ni oba ekoŋŋ kɛha sanegbaa lolo.
4 Esa akɛ sane ni yɔɔ May 22 “Awake!” lɛ sɛɛ lɛ atee gbɔmɛi ni yɔɔ shia-kɛ-shia kɛ nitsumɔ hei ashikpɔŋkukuji amli lɛ amiishɛɛ shi. Obaanyɛ owie he kɛtsɔ enɛ kɛɛmɔ nɔ:
◼ “Yei babaoo ena kaabonaatoo he niiashikpamɔ ni yɔɔ gbeyei yɛ nitsumɔ hé. Shihilɛ lɛ mli ewo wu aahu akɛ agbɛnɛ lɛ saneyeli hei gbalaa kaabonaatolɔi atoi ni amɛtoɔ mɛi ni atoɔ amɛ kaabonaa lɛ najiaŋ. Wɔŋmala amaniɛbɔɔ nɛɛ ni akɛjieɔ sane lɛ he amalei ni egbɛ eshwa lɛ kɛjeɔ jɛmɛ lɛ, koni wɔkɛye wɔbua akutso lɛ. Ekɛ saji ahesusumɔi ni abaanyɛ akɛtsu nii lɛ eha yei kɛ hii hu koni amɛle bɔ ni amɛaafee ni amɛbu amɛhe kɛjɛ kaabonaa ni abaanyɛ ato amɛ lɛ mli loo bɔ ni amɛaafee ni amɛbu amɛhe kɛjɛ enɛ he fɔ́ ni aaakɛɛ akɛ amɛyeɔ lɛ mli. Ani obaasumɔ ni okane Awake! wolo tɛtrɛɛ ni eje kpo nɛɛ?” Ŋmɛɛ gbɛ ni ewie. Tsɔɔmɔ lɛ wolo-shɛɛ gbɛjianɔ ni ato lɛ mli ni oshi wolo tɛtrɛɛ lɛ oha lɛ, ni okɛɛ akɛ: “Kɛ miba be kroko lɛ, masumɔ ni mikɛ bo asusu saneyitso nɛɛ he lolo kɛya hiɛ.”
5 Kɛ oosumɔ shiɛmɔ wiemɔ kuku lɛ, obaanyɛ oka enɛ okwɛ:
◼ “Mɛi babaoo susuɔ akɛ ŋmɛnɛŋmɛnɛ woji tɛtrɛbii ni maŋbii heɔ lɛ wieɔ jarayeli, bɔlɛnamɔ, loo yiwalɛ nifeemɔ he babaoo tsɔ. [Okɛ Buu-Mɔɔ kɛ Awake! lɛ atsɔɔ] Wɔmiija nɛkɛ woji kpakpai ni damɔ Biblia lɛ nɔ nɛɛ. Amɛtsɔɔ mɔ nii waa, ni amɛtsɔɔ wɔ akɛ wɔja Nyɔŋmɔ, wɔsumɔ wɔnaanyo, ni wɔhiɛ jeŋba kpakpa mli. Kɛ oosumɔ nikanemɔ ni tamɔ nɛkɛ lɛ, no lɛ mile akɛ obaana wolo lɛ ni oooshɛ lɛ he miishɛɛ.”
6 Kɛ wɔkɛ ekãa gba anɔkwale lɛ he sane wɔtsɔɔ wɔ nanemɛi lɛ, wɔbaanyɛ wɔha mɛi babaoo ana miishɛɛ waa.—Bɔf. 8:4, 8.