Wɔ Shiwoo lɛ ni Wɔɔye nɔ Gbi Fɛɛ Gbi

¹ Nɔ ko tsirɛ lalatsɛ David koni ejaje etsɔɔ Yehowa akɛ: “Mala majie ogbɛi lɛ yi daa nɛɛ, ni maye mishiwoi lɛ anɔ daa jenamɔ!” (Lala 61:9) David le akɛ shiwoo ji nifeemɔ ko ni suɔmɔ fɛɛ mli ajɛɔ afeɔ. Shi kɛlɛ, ena he miishɛɛ hu akɛ, kɛ́ ewo shi lɛ, ekã enɔ akɛ eye nɔ. No po diɛŋtsɛ lɛ, ejie Yehowa yi yɛ hegbɛ ni ena akɛ eeeye eshiwoi anɔ gbi fɛɛ gbi lɛ hewɔ.

² Beni wɔjɔɔ wɔhe nɔ wɔha Yehowa lɛ, wɔjɛ suɔmɔ mli wɔwo shi akɛ wɔbaafee esuɔmɔnaa nii. Wɔkwa wɔhe ni wɔha Yehowa sɔɔmɔ fee nɔ ni wɔbaatiu sɛɛ titri yɛ shihilɛ mli. (Luka 9:23) No hewɔ lɛ, esa akɛ wɔ hu wɔye wɔ shiwoo nɔ gbi fɛɛ gbi. (Jaj. 5:4-6) Esa akɛ sane ni wɔjaje wɔtsɔɔ yɛ faŋŋ mli yɛ wɔ nu mli baptisimɔ be lɛ mli lɛ aje kpo yɛ wɔ shihilɛ gbɛ fɛɛ mli, akɛni wɔle akɛ “naabu akɛjajeɔ kɛshɛɔ yiwalaheremɔ he” lɛ hewɔ. (Rom. 10:10) Sanekpakpa lɛ shiɛmɔ fata enɛ he. (Heb. 13:15) Esoro mɔ fɛɛ mɔ shihilɛ kwraa yɛ mɔ kroko nɔ he, shi, wɔ fɛɛ wɔbaanyɛ wɔkɛ wɔjwɛŋmɔ ama bɔ ni ehe hiaa ni wɔgba mɛi krokomɛi sanekpakpa lɛ he sane lɛ nɔ gbi fɛɛ gbi.

³ Too Gbɛjianɔ ni Baaha Oshiɛ Gbi Fɛɛ Gbi: Sanekpakpa lɛ ni wɔɔgba mɔ kroko lɛ ji niiashikpamɔ ni yɔɔ miishɛɛ. Bɔni afee ni wɔfee enɛ gbi fɛɛ gbi lɛ, esa akɛ wɔtao hegbɛi ni baaha wɔshiɛ be fɛɛ be ni shihilɛi lɛ baaŋmɛ gbɛ. Mɛi ni eŋɔ hegbɛ ni amɛkɛye mɛi aŋkroaŋkroi ni yɔɔ nitsumɔ he, loo yɛ skul, kɛ nanemɛi loo mɛi krokomɛi ni amɛkɛkpeɔ gbi fɛɛ gbi lɛ odase trukaa lɛ ena niiashikpamɔi babaoo ni yɔɔ miishɛɛ mli ŋɔɔmɔ. Abaanyɛ akɛ woji ni aŋmalaa loo tɛlifon ni atswaa lɛ po atsu nii akɛ gbɛ ni atsɔɔ nɔ ayeɔ mɛi krokomɛi odase. Enɛɛmɛi fɛɛ ni wɔkɛaatsu nii jogbaŋŋ kɛmɔ shi kɛ be ni aaato ama shi daa kɛha shinaai anaa odaseyeli kɛ sɛɛsaramɔi ni aaafee lɛ baaha anyɛ ana miishɛɛ krɛdɛɛ ni jɛɔ shia Biblia mli nikasemɔ feemɔ mli kɛbaa lɛ. Hɛɛ, wɔbaanyɛ wɔtao hegbɛi ni baaha wɔshiɛ gbi fɛɛ gbi.

⁴ Nyɛmi yoo ko bɔi Ŋmalɛi lɛ Amli ni Wɔɔkwɛ Daa lɛ kanemɔ beni ejɔɔ ehe yɛ nitsumɔ he lɛ. Efɔ̃ɔ nine etsɛɔ naanyo nitsulɔ ko koni ekɛ lɛ abakane gbi lɛ ŋmalɛ lɛ, ni etsɛɛɛ ni enɛ ha ekɛ yoo lɛ bɔi Biblia mli nikasemɔ. Amɛkaseɔ nii ŋmɛlɛtswaa fã gbi fɛɛ gbi, gbii enumɔ yɛ otsi kome mli. Naanyo nitsulɔ kroko nà nii ni amɛkaseɔ gbi fɛɛ gbi lɛ. Sɛɛ mli lɛ, ejie ehe shi etsɔɔ akɛ nyɛmi ni efɔ̃ɔ shiɛmɔyaa ji lɛ. Akɛni ekãa ni nyɛmi yoo lɛ yɔɔ lɛ tsirɛ lɛ hewɔ lɛ, ekɛ onukpa ko yagba sane koni aha ebɔi shiɛmɔ ekoŋŋ. Nyɛmi yoo nɛɛ ná mɛi enyɔ ashihilɛ nɔ hewalɛ yɛ eshiwoo lɛ ni eyeɔ nɔ kɛmɔɔ shi gbi fɛɛ gbi lɛ hewɔ.

⁵ Kɛ hiɛsɔɔ ni wɔyɔɔ kɛha nibii kpakpai fɛɛ ni Yehowa efee eha wɔ lɛ yimɔ wɔtsuii amli obɔbɔ ni etsirɛ wɔ lɛ, wɔ henɔjɔɔmɔ he shiwoo lɛ ni wɔɔye nɔ bɔ ni wɔɔnyɛ kɛmɔ shi gbi fɛɛ gbi lɛ baaha wɔna miishɛɛ kɛ tsui ni nyɔɔ mɔ mli. Taakɛ lalatsɛ lɛ ji lɛ, wɔbaanyɛ wɔjaje akɛ: “Nuntsɔ [Yehowa, NW], mi-Nyɔŋmɔ lɛ, majie oyi kɛ mitsui fɛɛ, ni mawo ogbɛi lɛ hiɛ nyam kɛaatee naanɔ.”—Lala 86:12.