Sanebimɔ He

◼ Mɛni esa akɛ aha ehi jwɛŋmɔ mli yɛ kukuji ni akaneɔ yɛ kpeei ashishi lɛ he?

Akɛ be ni akɛha Buu-Mɔɔ Nikasemɔ lɛ kɛ Asafo Woloŋ Nikasemɔ lɛ babaoo tsuɔ nii yɛ kukuji lɛ akanemɔ mli. Enɛ tsɔɔ akɛ gbɛnaa nii ko ni tsii kã nyɛmi nuu ni akɛ nitsumɔ ewo edɛŋ akɛ nikanelɔ lɛ nɔ akɛ nitsɔɔlɔ. Esa akɛ ekane nii yɛ gbɛ nɔ ni baaha ‘shishinumɔ ahi’ nikasemɔ lɛ mli, koni ekaba lɛ akɛ toibolɔi baanu shishi pɛ kɛkɛ, shi koni etsirɛ amɛ ni amɛtsu he nii. (Neh. 8:8) Enɛ hewɔ lɛ, ehe miihia ni nikanelɔ lɛ asaa ehe jogbaŋŋ kɛha nitsumɔ ni akɛwo edɛŋ lɛ. (1 Tim. 4:13; kwɛmɔ School Guidebook lɛ nikasemɔ ni ji 6.) Naa saji komɛi ni he hiaa kɛha mɛi ahiɛ nikanemɔ ni mɔɔ shi.

Maa Shishinumɔ ni Yɔɔ Sɛɛ lɛ nɔ Mi Jogbaŋŋ: Tsɔ hiɛ osusu wiemɔi loo wiemɔi kukuji ni he hiaa ni ama nɔ mi lɛ ahe, bɔni afee ni oha shishinumɔ ni ja lɛ aje kpo faŋŋ.

Tsɛ́ Wiemɔi lɛ Jogbaŋŋ: Wiemɔ ni atsɛɔ lɛ jogbaŋŋ ni ejeɔ kpo faŋŋ lɛ he miihia, kɛ́ toibolɔi lɛ baanu wiemɔi ni jeɔ kpo yɛ wolo lɛ mli lɛ shishi lɛ. Bi onukpa ko ni etsɔɔ bo wiemɔi ni anuuu shishi lɛ loo nɔ ni afɔɔɔ kɛ nitsumɔ lɛ shishi, aloo bó wiemɔi ni Asafo lɛ emɔmɔ ewo kasɛt nɔ lɛ toi.

Okɛ Ekãa Awie Waa ni Anu: Ní okɛ ekãa baawie faŋŋ ni anu lɛ teeɔ miishɛɛ shi, ekanyaa henumɔi, ni ewoɔ toibolɔ lɛ hewalɛ.

Okɛ Miishɛɛ kɛ Sanegbaa Su Awie: Henumɔ ni akɛaawie lɛ kɛ naatselɛ baa. Kɛ nikanelɔ lɛ saa ehe ni ekane mli shii abɔ lɛ, ebaanyɛ efee tswãa, ni nɔ ni baajɛ mli aba ji akɛ nikanemɔ lɛ baaŋɔɔ fe nɔ ni eeefee kpɛŋŋ kɛ nɔ ni jeɔ mɔ tsine.—Hab. 2:2.

Kanemɔ Sane lɛ Taakɛ Aŋma lɛ Pɛpɛɛpɛ: Akaneɔ shishigbɛ niŋmaai kɛ saji ni yɔɔ akrabatsai amli lɛ waa taakɛ aŋma lɛ kɛ́ ehaa saji ni aŋmala lɛ feɔ faŋŋ. Nɔ ni akaneee pɛ ji saji ni atsɛ sɛɛ ni tsɔɔ he ni ajie nikasemɔ lɛ kɛjɛ lɛ kɛkɛ lɛ. Esa akɛ akane shishigbɛ niŋmaa lɛ yɛ he ni atsɛɔ sɛɛ yɛ, yɛ kuku lɛ mli lɛ, ni aje ekanemɔ shishi kɛtsɔ enɛ kɛɛmɔ nɔ, akɛ: “Shishigbɛ niŋmaa lɛ kaneɔ akɛ . . .” Kɛ okane ogbe naa lɛ, bo lɛ yaa nɔ okane kuku lɛ fã ni eshwɛ lɛ.

Kɛ akane nii ojogbaŋŋ yɛ mɛi ahiɛ lɛ, ebafeɔ gbɛi ni he hiaa ni wɔbaanyɛ wɔtsɔ nɔ ‘wɔtsɔɔ mɛi krokomɛi nibii fɛɛ’ ni wɔ Tsɔɔlɔ Kpele lɛ ‘etsɔɔ lɛ’ ateŋ ekome.—Mat. 28:20.