Nɔ ko Kpakpa ko He Sanekpakpa Shiɛmɔ
1 Buu-Mɔɔ lɛ kɛ afii 117 etsu nii akɛ Biblia mli anɔkwale lɛ hefalɔ. Amrɔ nɛɛ, akalaa eko fɛɛ eko ni jeɔ kpo lɛ ekomekomei 18,950,000 yɛ wiemɔi 125 mli. Awake! lɛ hu kɛ be kakadaŋŋ efa Nyɔŋmɔ Wiemɔ lɛ he, ni amrɔ nɛɛ aajara ekomekomei 15,730,000 yɛ wiemɔi 80 mli.—Okɛto Kolosebii 1:23 he.
2 Woji Tɛtrɛbii Tsuɔ Mumɔŋ Hiamɔ Nii Ahe Nii: Buu-Mɔɔ lɛ kɛ Awake! lɛ he eba sɛɛnamɔ kɛha gbɔmɛi akpekpei abɔ ni hiɛ tsui kpakpa lɛ kɛtsɔ yelikɛbuamɔ ni ekɛhaa ni ekɛtsuɔ amɛmumɔŋ hiamɔ nii ahe nii lɛ nɔ. Aŋmalaa saji ni tswaa mɔ hemɔkɛyeli emaa shi. Akɛ nɔkwɛmɔ nɔ lɛ, wɔkase sane ko ni kɔɔ bɔ ni ehe hiaa ni wɔŋɔ wɔhiɛ wɔfɔ Yehowa kɛ e-Wiemɔ lɛ nɔ lɛ yɛ February 1, 1996 Buu-Mɔɔ lɛ mli. Buu-Mɔɔ ni je kpo March 1, 1996 lɛ wo wɔ hewalɛ ni wɔya nɔ wɔtsu nii waa yɛ Yehowa sɔɔmɔ mli ni wɔya nɔ wɔkwɛ lɛ gbɛ. Kwɛ bɔ ni Zefania gbalɛ ni atsɔɔ mli fitsofitso lɛ woɔ mɔ hewalɛ ehaa! Agbɛnɛ hu, Kristofoi anɔkwayeli he sane ni asusu he ni woɔ mɔ hemɔkɛyeli hewalɛ lɛ je kpo yɛ March 15, 1996 Buu-Mɔɔ lɛ mli. Nɔ ni je kpo May 15, 1996 lɛ, ma sɛɛnamɔ ni yɔɔ Nyɔŋmɔ Wiemɔ lɛ kanemɔ kɛ ekasemɔ daa lɛ nɔ mi. Nɛkɛ saji nɛɛ etsu nii ni ekɛha shishinumɔ ni wɔyɔɔ yɛ Nyɔŋmɔ Wiemɔ lɛ he lɛ etee hiɛ waa diɛŋtsɛ, ni eha hiɛsɔɔ ni wɔyɔɔ yɛ e-Maŋtsɛyeli lɛ he lɛ mli ewa.
3 Kɛfata he lɛ, saji ni yɔɔ ebe naa pɛpɛɛpɛ ni anyɛɔ atsuɔ he nii ni kɔɔ jeŋba kpakpa, Kristofoi ajeŋbai, kɛ saji krokomɛi ni he hiaa jogbaŋŋ lɛ ahe lɛ yɛ woji tɛtrɛbii nɛɛ amli. Amɛkɛ hiɛdɔɔ tsuɔ saji diɛŋtsɛ ni kɔɔ wɔ shihilɛi ahe lɛ ahe nii jogbaŋŋ. Nɔ ni ejɛ mli eba ji akɛ, wɔnaa shihilɛ ni hi jogbaŋŋ mli ŋɔɔmɔ bianɛ, yɛ be mli ni wɔmɛɔ koni nɔ ko ni hi waa he shiwoi ni Nyɔŋmɔ kɛha yɛ wɔsɛɛ shihilɛ he lɛ aba mli lɛ.—Yes. 48:17; 1 Tim. 6:19.
4 Nɔ ni aŋma yɛ Awake! ni jeɔ kpo lɛ eko fɛɛ eko baafa 4 lɛ mlitĩi kuku haa wɔnaa yiŋtoo kpakpa ni wɔɔdamɔ nɔ wɔjie wolo tɛtrɛɛ nɛɛ yi wɔha mɛi ni yɔɔ he fɛɛ he, gbekɛbii kɛ onukpai fɛɛ, ákɛ wolo ni hi jogbaŋŋ ni akaneɔ. Ekɛɔ yɛ jɛmɛ akɛ: “Awake! yɛ kɛha nilee babaoo ni weku muu lɛ fɛɛ aaaná. Etsɔɔ bɔ ni aaafee adamɔ ŋmɛnɛŋmɛnɛ naagbai anaa. Etswaa saji ahe adafi, egbaa gbɔmɛi ni yɔɔ shikpɔji babaoo nɔ lɛ ahe saji, epɛiɔ jamɔ kɛ jeŋ nilee mli ekwɛɔ. Shi efeɔ fe nakai. Epɛiɔ saji amli kɛyaa shɔŋŋ ni etsɔɔ shishinumɔ diɛŋtsɛ ni yɔɔ ŋmɛnɛŋmɛnɛ saji ni yaa nɔ lɛ asɛɛ, ni kɛlɛ, ekɛ ehe wooo maŋkwramɔŋ saji amli yɛ bei fɛɛ mli ni ewooo hewolo nɔ su mli bii komɛi anɔ fe mɛi krokomɛi. Nɔ ni he hiaa fe fɛɛ lɛ, wolo tɛtrɛɛ nɛɛ tswaa toiŋjɔlɛ jeŋ hee ni yɔɔ shweshweeshwe, ni etsɛŋ ni akɛbaato ŋmɛnɛŋmɛnɛ nibii agbɛjianɔtoo ni mlakwamɔ yɔɔ mli ni ehiii lɛ najiaŋ lɛ he shiwoo, ni Bɔlɔ lɛ kɛha lɛ mli hemɔkɛyeli ni aaaná lɛ emaa shi.”
5 Okɛ Mɛi Krokomɛi Ana Woji Tɛtrɛbii lɛ Amli Gbɛfaŋnɔ: Okɛ Buu-Mɔɔ lɛ kɛ Awake! lɛ babaoo aha. (Okɛto 1 Timoteo 6:18 he.) Hiɛmɔ ekomɛi koni onyɛ okɛha mɔ fɛɛ mɔ ni okɛ lɛ aaakpe. (Jaj. 11:6) Wɔ fɛɛ, ni gbekɛbii kɛ shiɛlɔi heei fata he lɛ, baanyɛ ana woji ni aaaha mɛi ashɛ yɛ nyɔŋ nɛɛ nɔ lɛ mli gbɛfaŋnɔ kɛmɔ shi, kɛtsɔ shiɛmɔ wiemɔi kukuji ni damɔ saji ni yɔɔ ebe naa pɛpɛɛpɛ ni awie he yɛ eheei lɛ amli lɛ ni akɛaatsu nii lɛ nɔ. Lé amɛmli saji lɛ jogbaŋŋ, ni okɛha yɛ anɔkwayeli kɛ yiŋ ni kɔneɔ mɔ mli.
6 Saji ni he hiaa mɔ fɛɛ mɔ lɛ yɛ Buu-Mɔɔ lɛ kɛ Awake! lɛ amli. Ní wɔɔjara wɔha kɛtsɔ amɛshɛɛ nɔ lɛ ji gbɛi ni hi fe fɛɛ ni wɔbaanyɛ wɔtsɔ nɔ wɔye wɔbua mɛi krokomɛi ni amɛkase sanekpakpa ni tsɔɔ akɛ etsɛŋ ni nɔ ko kpakpa aaaba lɛ he nii!