“Nyɛlea Shidaa”
1 Atsɔse wɔteŋ mɛi pii yɛ wɔ gbekɛbiiashi koni wɔkɛɛ “ofainɛ” kɛ “miida bo shi” loo “oyiwaladɔŋŋ” kɛ mɔ ko jie su kpakpa loo mlihilɛ kpo etsɔɔ wɔ. Paulo woɔ wɔ ŋaa ni ‘wɔle shidaa’ daa nɛɛ, ni esa akɛ wɔjie hiɛsɔɔ kpo wɔtsɔɔ Yehowa titri. (Kol. 3:15, 16) Shi te wɔbaafee tɛŋŋ wɔda wɔ Bɔlɔ Kpeteŋkpele lɛ shi? Ni mɛɛ yiŋtoi krɛdɛɛi wɔyɔɔ hewɔ ni esa akɛ wɔda lɛ shi?
2 Bɔfo Paulo ŋma akɛ: “Shidaa aha Nyɔŋmɔ, mɔ ni tsɔ wɔ-Nuntsɔ Yesu Kristo nɔ ni eha wɔye kunim lɛ.” (1 Kor. 15:57) Yɛ Kaimɔ be lɛ mli afi fɛɛ afi lɛ, akaiɔ wɔ yɛ Nyɔŋmɔ kɛ Kristo fɛɛ suɔmɔ kpele ni amɛjie kpo amɛtsɔɔ yɛ kpɔmɔ nɔ lɛ ni amɛkɛha ni haa wɔnaa naanɔ wala he hiɛnɔkamɔ lɛ he lɛ he. (Yoh. 3:16) Akɛni kɛ hoo kwraa lɛ wɔteŋ mɛi babaoo elaaje wɔsuɔlɔi yɛ gbele mli hewɔ lɛ, kwɛ bɔ ni wɔdaa shi yɛ gbohiiashitee he shiwoo ni Yesu kɛha lɛ hewɔ! Hiɛsɔɔ yiɔ wɔtsuiŋ obɔ kɛtekeɔ nɔ kɛ́ wɔsusu wɔyiwala ni abaahere yɛ gbɛjianɔtoo nɛɛ naagbee, ni wɔgboiŋ dɔŋŋ lɛ he gbɛkpamɔi ahe lɛ. (Yoh. 11:25, 26) Ewa akɛ wɔɔná wiemɔi ni wɔkɛtsɔɔ shidaa ni wɔyɔɔ kɛha jɔɔmɔi fɛɛ ni yɔɔ naakpɛɛ ni etsɛŋ ni wɔbaaná kɛbaajɛ Yehowa dɛŋ yɛ Paradeiso shikpɔŋ ni baa lɛ he lɛ. (Kpoj. 21:4) Mɛɛ yiŋtoi ni fe enɛ mɔ ko baanyɛ ana ni ‘ekɛda’ Nyɔŋmɔ ‘shi’?
3 Gbɛ ni Oootsɔ nɔ Oda Nyɔŋmɔ Shi: Eja akɛ wɔɔda Yehowa shi be fɛɛ be yɛ sɔlemɔ mli yɛ nibii kpakpai ni efeɔ lɛ ahewɔ. (Lala 136:1-3) Ewoɔ wɔ hewalɛ hu koni wɔda lɛ shi yɛ gbɛi krokomɛi ni ja nɔ. Akɛ nɔkwɛmɔ nɔ lɛ, bɔ fɛɛ bɔ ni fee lɛ, wɔbaabua wɔhe naa yɛ Hɔgbaa, March 23, kɛha Kristo gbele lɛ Kaimɔ. Bɔni afee koni wɔye wɔbua ni atsu asafo lɛ kɛ jeŋ muu fɛɛ nitsumɔ lɛ hiamɔ nii yɛ heloo gbɛfaŋ lɛ he nii lɛ, wɔkɛ ‘wɔ nibii ni jara wa lɛ woɔ Yehowa hiɛ nyam’ kɛ miishɛɛ. (Abɛi 3:9) Wɔfĩɔ onukpai lɛ asɛɛ ni wɔkɛ amɛ feɔ ekome kɛmɔɔ shi, ni wɔtsɔɔ no feemɔ nɔ wɔjieɔ hiɛsɔɔ kpo wɔtsɔɔ Yehowa yɛ yelikɛbuamɔ ni ekɛhaa kɛtsɔɔ amɛnɔ lɛ hewɔ. (1 Tes. 5:12, 13) Wɔbɔɔ mɔdɛŋ gbi fɛɛ gbi koni wɔhiɛ jeŋba kpakpa ni woɔ Nyɔŋmɔ gbɛi lɛ hiɛ nyam mli. (1 Pet. 2:12) Hiɛsɔɔ ni wɔjieɔ kpo wɔtsɔɔ lɛ he odaseyelii nɛɛ fɛɛ saa Yehowa hiɛ.—1 Tes. 5:18.
4 Nɔ ni Tsɔɔ Wɔshidaa ni Fe Fɛɛ: Ni wɔɔjɛ wɔsusuma fɛɛ mli wɔná Maŋtsɛyeli shiɛmɔ nitsumɔ lɛ mli gbɛfaŋnɔ, ni wɔwo Yehowa gbɛi lɛ hiɛ nyam, ni wɔtsɔɔ hiɛsɔɔ yɛ sɔlemɔ mli, ni wɔkɛ anɔkwayeli afã anɔkwale lɛ he lɛ fata shidaa ni fe fɛɛ ni jɛ tsuiŋ ni wɔbaanyɛ wɔkɛha wɔ Bɔlɔ lɛ, yɛ nibii fɛɛ ni efee eha wɔ hewɔ lɛ he. Yehowa mii shɛɔ ehe akɛ eeena ni wɔkɛ sɔɔmɔ krɔŋŋ nifeemɔi miiha lɛ ni wɔkɛmiifi esuɔmɔnaa nii ni ji akɛ, “esa akɛ ahere gbɔmɛi sɔrɔtoi fɛɛ ayiwala” lɛ sɛɛ. (1 Tim. 2:3, 4, NW) No hewɔ ni shiɛlɔi babaoo diɛŋtsɛ ni baanyɛ ato he gbɛjianɔ lɛ hereɔ tsɛmɔ ni je kpo yɛ February Wɔ Maŋtsɛyeli Sɔɔmɔ lɛ mli lɛ nɔ koni amɛsɔmɔ akɛ gbɛgbalɔi awalɔi yɛ March, April, kɛ May nyɔji lɛ ekome loo nɔ̃ mli. Ní wɔkɛ ekãa ni fa pii aaawo shiɛmɔ nitsumɔ lɛ mli lɛ ji gbɛ ni fe fɛɛ ni wɔtsɔɔ nɔ ‘wɔdaa’ Nyɔŋmɔ ‘shi.’ Ani obaanyɛ ofata gbɛgbalɔi lɛ ahe yɛ April? yɛ May?
5 Akɛ shihilɛ kɛmiiya naanɔ he hiɛnɔkamɔ ni ma shi shiŋŋ eha wɔ. Kɛ wɔna akɛ eeba mli lɛ, wɔbaana yiŋtoi babaoo diɛŋtsɛ ni wɔɔdamɔ nɔ daa gbi, koni wɔya nɔ wɔkɛ miishɛɛ ada Yehowa shi.—Lala 79:13.