Mɛi Krokomɛi ni Akɛ Amɛ Aaagba Nɔ Diɛŋtsɛ ni Kɛ Weku Miishɛɛ Baa lɛ He Sane
1 Weku lɛ ji adesai ashihilɛ lɛ shikwɛ̃ɛhe, ni akrowai, maŋtiasei, maji, kɛ maŋ muu fɛɛ jɛ weku lɛ mli kɛba. Ŋmɛnɛ, weku kɔkrɔɔ lɛ ebaje nɔnyɛɛ shishi bɔ ni ebako lɛ nakai pɛŋ. Hewalɛi ni naa wa miitsu nii kɛmiiwo weku shihilɛ diɛŋtsɛ ni yɔɔ lɛ he gbeyei. Kwɛ bɔ ni wɔdaa shi akɛ Yehowa, weku gbɛjianɔtoo lɛ Shishitolɔ lɛ kɛ gbɛtsɔɔmɔi eha wɔ koni wɔnine anyɛ ashɛ weku miishɛɛ nɔ! Mɛi ni nyiɛɔ egbɛtsɔɔmɔi lɛ asɛɛ lɛ naa akɛ naagbai anɔ gbɔɔ ni nɔ ni jɛɔ mli baa ji weku kɔkrɔɔ lɛ ni yeɔ omanye. Wɔyɛ hegbɛ yɛ September mli akɛ wɔkɛ mɛi krokomɛi aaagba Nɔ Diɛŋtsɛ ni Kɛ Weku Miishɛɛ Baa wolo lɛ mli sane. Ŋɔɔ hegbɛ lɛ koni obɛŋkɛ mɛi koni okɛ amɛ agba weku shihilɛ lɛ he sane. Okɛ naanyobɔɔ su atsu nii, okɛ jwɛŋmɔ ni ja atsu nii, ni okɛ sɛɛyoomɔ atsu nii. Mɛni obaanyɛ okɛɛ?
2 Obaanyɛ oje shishi kɛtsɔ sanebimɔ ni tamɔ enɛ nɔ:
◼ “Ani oyɔse akɛ ewa kɛha wekui pii akɛ amɛaadamɔ shihilɛ mli nɔnyɛɛi lɛ anaa? [Ŋmɛɛ gbɛ ni ewie.] Amaniɛbɔi tsɔɔ akɛ mɛi babaoo náa naagbai yɛ shia lɛ mli. Mɛni oheɔ oyeɔ akɛ ebaaye ebua wekui koni amɛya nɔ jogbaŋŋ ni amɛná miishɛɛ babaoo? [Ŋmɛɛ gbɛ ni ewie.] Akɛni Nyɔŋmɔ to weku gbɛjianɔtoo lɛ shishi hewɔ lɛ, ani efeŋ nilee akɛ aaapɛi gbɛtsɔɔmɔi ni ekɛha lɛ mli akwɛ? [Kanemɔ 2 Timoteo 3:16, 17.] Atsɔɔ gbɛtsɔɔmɔ ni he yɔɔ sɛɛnamɔ tamɔ nɛkɛ lɛ yɛ wolo ni ji Nɔ Diɛŋtsɛ ni Kɛ Weku Miishɛɛ Baa nɛɛ mli.” No sɛɛ lɛ bi ni mɔ lɛ atsɔɔ nɔ ni esusuɔ akɛ no ji nɔ ni gbaa weku naa titri, tsɔɔmɔ saneyitso ni gbaa nakai naagba lɛ he sane, ni okɛ wolo lɛ aha.
3 Kɛ otee sɛɛsaramɔ lɛ, obaanyɛ otiu oti ni ma ohiɛ akɛ oooje Biblia mli nikasemɔ shishi lɛ sɛɛ kɛtsɔ enɛ kɛɛmɔ nɔ:
◼ “Misusu nɔ ni owie yɛ weku shihilɛ he sane lɛ he, ni mikɛ nɔ ko ni misusuɔ akɛ obaaná he miishɛɛ lɛ eba akɛ mikɛbaaha bo. [Okɛ Taoɔ wolo bibioo lɛ atsɔɔ, gbelemɔ baafa 16, ni okane sanebimɔi ekpaa ni yɔɔ yiteŋgbɛ lɛ.] Eka shi faŋŋ akɛ, esa akɛ mɔ fɛɛ mɔ ni yɔɔ weku lɛ mli lɛ atsu egbɛfaŋnɔ koni eha weku miishɛɛ aya nɔ. Kɛ oyɛ minitii fioo ko pɛ lɛ, mafee bɔ ni obaanyɛ ofee ni ona sane nɛɛ he sɛɛ jogbaŋŋ kɛmɔ shi lɛ he nɔkwɛmɔnɔ matsɔɔ bo.” No sɛɛ lɛ nyɛjea nikasemɔ 8 lɛ kasemɔ shishi.
4 Gbɛ kroko ni aaatsɔ nɔ aje sanegbaa shishi ji ni otsĩ naagba ko tã, ekolɛ kɛtsɔ enɛ kɛɛmɔ nɔ:
◼ “Eyɛ mli akɛ mɔ fɛɛ mɔ miisumɔ ni enu he akɛ eyɛ miishɛɛ ni etsui enyɔ emli moŋ, shi etamɔ nɔ ni wekui babaoo yeko omanye lɛɛlɛŋ yɛ enɛ mli. Mɛni osusuɔ akɛ no baaye ebua koni amɛná anɔkwa miishɛɛ? [Ŋmɛɛ gbɛ ni ewie.] Tsutsu ko lɛ, Biblia lɛ jie naagbai pɔtɛɛ ni wɔbaana yɛ wekui amli ŋmɛnɛ lɛ kpo etsɔɔ. [Kanemɔ 2 Timoteo 3:1-3.] Shi kɛlɛ, Biblia lɛ hu kɛɔ wekui nɔ ni amɛbaafee ni amɛna naagbai nɛɛ anaa, koni amɛná naanɔ miishɛɛ. Átsɔɔ eshishitoo mlai lɛ yɛ wolo ni ji, Nɔ Diɛŋtsɛ ni Kɛ Weku Miishɛɛ Baa nɛɛ mli.” No sɛɛ lɛ tsɔɔmɔ akrabatsa ni akɛtĩɔ mli lɛ ni yɔɔ saneyitso ni sa lɛ naagbee gbɛ lɛ, kanemɔ, ni okɛ wolo lɛ aha.
5 Kɛ oku osɛɛ otee lɛ, okɛ “Taoɔ” wolo bibioo lɛ atsu nii kɛje nikasemɔ shishi. Obaanyɛ okɛɛ:
◼ “Minya bɔ ni osumɔɔ ni opɛi Biblia lɛ mli okwɛ yɛ shishitoo mlai ni kɔɔ weku shihilɛ he lɛ he. Niiashikpamɔ etsɔɔ akɛ ayeɔ omanye ni fe fɛɛ lɛ kɛtsɔɔ ŋaawoo ni abaanyɛ akɛtsu nii ni anaa yɛ Biblia lɛ mli lɛ sɛɛnyiɛmɔ nɔ. Naa sane mlitsɔɔmɔ kuku ko ni tsɔɔ nɔ hewɔ ni eyɔɔ nakai lɛ.” Kanemɔ Taoɔ wolo bibioo lɛ mli nikasemɔ 1 lɛ mli klɛŋklɛŋ kuku lɛ kɛfata Lala 1:1-3 loo Yesaia 48:17, 18 lɛ he. Kɛ hegbɛ yɛ lɛ, nyɛsusua nikasemɔ lɛ fã ni eshwɛ lɛ he. Kɛɛmɔ akɛ obaaba ekoŋŋ koni nyɛfee ekome kɛsusu nikasemɔ ni nyiɛ sɛɛ lɛ he.
6 Kɛ okɛ mɛi ni tamɔ oshijafoi kpe lɛ, obaanyɛ oje sanegbaa shishi nɛkɛ: “Ána akɛ gbalashihilɛi babaoo amli gbálaa yɛ afii fioo ko sɛɛ. No hewɔ lɛ, ní aaabote gbalashihilɛ mli lɛ feɔ tamɔ kaa kɛhaa mɛi babaoo. Te oshijafonyo aaafee tɛŋŋ ele kɛji efee klalo kɛha gbalashihilɛ?” Ŋmɛɛ gbɛ ni ewie. Gbelemɔ kɛya mfoniri ni yɔɔ Weku Miishɛɛ wolo lɛ baafa 19 lɛ mli, ni ogbala jwɛŋmɔ kɛya subaŋi ni amu naa ni he hiaa kɛha gbalashihilɛ ni sɛɛ tsɛɔ lɛ yɛ baafa 18 lɛ nɔ. Kanemɔ kuku 9 lɛ. Gbelemɔ kɛya saneyitso lɛ shishijee, no sɛɛ lɛ okɛ wolo lɛ aha.
7 Wɔ woji lɛ ekanya gbɔmɛi akpekpei abɔ koni amɛpɛi Biblia lɛ mli jogbaŋŋ kɛmɔ shi. Nɔ ni amɛkase lɛ eha amɛ wɔsɛɛ be ni miishɛɛ yɔɔ mli he hiɛnɔkamɔ. Nɔ ni ejɛ mli eba ji akɛ, amrɔ nɛɛ mɛi babaoo miijie Yehowa yi ákɛ jeŋ muu fɛɛ Nuntsɔ Maŋtsɛ. (Lala 146:5; 83:19) Shi kɛlɛ, yɛ nibii ni jɛɔ nibii ajara ni yaa hiɛ oyayaayai lɛ mli kɛbaa hewɔ lɛ, woji ni he yɔɔ sɛɛnamɔ nɛɛ akalamɔ kɛ lɛlɛ mli ni akɛwoɔ akɛmajeɔ lɛ fiteɔ shika babaoo. Yɛ enɛ fɛɛ sɛɛ lɛ, amɛkã he amɛji woji ni jara waaa kwraa ni yɔɔ lɛ ateŋ eko. No hewɔ lɛ wɔyɛ nɔ ni wɔɔdamɔ nɔ wɔná miishɛɛ ni wɔfee ekãa yɛ hewalɛ ni wɔɔwo mɛi krokomɛi ni amɛkane woji nɛɛ lɛ mli, koni anyɛ awaje amɛ koni amɛná Nyɔŋmɔ Wiemɔ mli hewalɛ ni náa adesai asubaŋi anɔ hewalɛ lɛ.—Kol. 3:10.
8 Nyɛhaa wɔbɔa mɔdɛŋ fɛɛ ni wɔɔnyɛ koni wɔgba mɛi krokomɛi nɔ diɛŋtsɛ ni kɛ mɔ yaa weku miishɛɛ namɔ mli lɛ he sane—kɛtsɔ gbɛtsɔɔmɔi ni atsɔɔ yɛ Nyɔŋmɔ Wiemɔ lɛ mli lɛ sɛɛnyiɛmɔ nɔ.—Lala 19:8-11.