“Ani Gbɔmɛi Fɛɛ Baasumɔ Amɛhe Gbi Ko?”
1 Abaajaje shɛɛ sane ko ni yɔɔ miishɛɛ, ni kanyaa mɔ, ni shɛjeɔ mɔ mii yɛ jeŋ fɛɛ yɛ wiemɔi 169 amli. Mɛni ji nɛkɛ shɛɛ sane nɛɛ? Ni akɛbaaha yɛ mɛɛ gbɛ nɔ?
2 Shɛɛ sane lɛ kɔɔ naanyo suɔmɔ he. Abaana yɛ Maŋtsɛyeli Sanekpakpa No. 35 ni eyitso ji, “Ani Gbɔmɛi Fɛɛ Baasumɔ Amɛhe Gbi Ko?” lɛ mli. Nɛkɛ Maŋtsɛyeli Sanekpakpa nɛɛ pɛiɔ bɔ ni saji ni yɔɔ je lɛŋ fɛɛ lɛ yɔɔ yɛ ŋmɛnɛŋmɛnɛ beaŋ lɛ mli kuku, ni tsɔɔ akɛ suɔmɔ ni bɛ gbɔmɛi ateŋ lɛ ji nɔ ni kɛ tsuiŋdɔlɛ kɛ piŋmɔ babaoo eba lɛ. Etsɔɔ nɔ hewɔ ni titri lɛ, naanyo suɔmɔ he ejɔ yɛ gbɔmɛi ateŋ yɛ wɔ gbii nɛɛ amli lɛ kɛ nɔ ni enɛ tsɔɔ kɛha wɔsɛɛ.
3 Kɛfata he lɛ, Maŋtsɛyeli Sanekpakpa No. 35 lɛ tsɔɔ akɛ anɔkwa naanyo yɛ mɛi akpekpei abɔ komɛi ateŋ ŋmɛnɛ yɛ je lɛŋ. Eyɔseɔ mɛi ni náa mra be mli Kristojamɔ lɛ hiɛtsiɛmɔ mli gbɛfaŋnɔ—klɛŋklɛŋ afii oha lɛ mli jamɔ, ni naanyo suɔmɔ ni Yesu Kristo tsɔɔ lɛ kadiɔ lɛ lɛ.—Luka 10:25-37.
4 Maŋtsɛyeli Sanekpakpa No. 35 lɛ muɔ sane naa kɛ nii amli tsɔɔmɔ ni tsɔɔ bɔ ni etsɛŋ ni adesai ajeŋ muu lɛ fɛɛ baajie naanyo suɔmɔ kpo yɛ Nyɔŋmɔ Maŋtsɛyeli yɛ Kristo nɔyeli shishi lɛ mli. Aawo mɛi ni kaneɔ nɛkɛ shɛɛ sane nɛɛ hewalɛ koni amɛná Mɛni Nyɔŋmɔ Taoɔ yɛ Wɔdɛŋ? wolo bibioo lɛ eko, koni amɛkase bɔ ni amɛaafee ni amɛtsɔmɔ nɛkɛ jeŋ muu fɛɛ suɔmɔ gbɛjianɔtoo nɛɛ ni atsɔɔ mli fitsofitso yɛ Nyɔŋmɔ Wiemɔ lɛ mli lɛ fã.
5 Namɔ Kɛ Shɛɛ Sane Nɛɛ Baaha? Yehowa Odasefoi ni yɔɔ jeŋ fɛɛ lɛ kɛ nɛkɛ naanyo suɔmɔ he shɛɛ sane nɛɛ baaha mɛi ni amɛle amɛ, nanemɛi, kɛ wekumɛi yɛ October kɛ November nyɔji lɛ amli. Aawo mɛi fɛɛ ni sa lɛ hewalɛ koni amɛná Maŋtsɛyeli Sanekpakpa No. 35 lɛ jaa yɛ faŋŋ mli lɛ mli gbɛfaŋnɔ.
6 Oti titri ni akɛma hiɛ yɛ tafãa nɛɛ mli ji koni atee gbɔmɛi lɛ amiishɛɛ shi yɛ Biblia mli nikasemɔ mli yɛ Taoɔ wolo bibioo lɛ loo yɛ Nilee wolo lɛ mli. Kɛfata he lɛ, nyɛmɔ ni jɛ tsui fɛɛ mli ní Yehowa tsuji lɛ ateŋ mɔ fɛɛ mɔ kɛbaatsu nii lɛ baaye suɔmɔ Nyɔŋmɔ, Yehowa kɛ e-Bi, Yesu Kristo he odase babaoo diɛŋtsɛ.