Teokrase Sɔɔmɔ Skul lɛ Kɛha 1998

Ní aaaya skul lɛ tsɔɔ “mɔ ko tsɔsemɔ loo nilee aloo hesaa pɔtɛɛ ko ni ahaa ekaa mɔ jwɛŋmɔ mli.” Kɛtsɔ Teokrase Sɔɔmɔ Skul lɛ nɔ lɛ, ayaa nɔ atsɔseɔ wɔ daa yɛ Nyɔŋmɔ he nilee mli. Agbɛnɛ hu, wɔhe ni wɔkɛwoɔ skul nɛɛ mli lɛ haa wɔyaa hiɛ yɛ hesaai ni wɔyɔɔ yɛ wɔwiemɔ kɛ nitsɔɔmɔ mli lɛ mli. Skul gbɛjianɔtoo kɛha 1998 lɛ baaha wɔná hegbɛ babaoo koni wɔya hiɛ lolo yɛ mumɔŋ.

Yɛ be mli ni okwɛɔ wɔsɛɛ afi lɛ skul he gbɛjianɔtoo lɛ mli lɛ, obaana akɛ, yɛ be kɛ bei amli lɛ Nifeemɔ ni Ji 3 lɛ baakɔ Biblia mli gbɔmɔ ko he taakɛ anaa yɛ Insight wolokpoi lɛ amli lɛ. Kɛfata he lɛ, akɛ Weku Miishɛɛ wolo lɛ efata nifeemɔ kɛha 1998 lɛ he, ni Nifeemɔi ni Ji 3 kɛ 4 lɛ baadamɔ nɔ. Be fɛɛ be ni Weku Miishɛɛ wolo lɛ baafee nɔdaamɔ nɔ̃ kɛha Nifeemɔ ni Ji 4 lɛ, esa akɛ nyɛmi nuu ko kɛha asafo lɛ ákɛ wiemɔ. Ni ákɛ kaimɔ nɔ̃ lɛ, esaaa akɛ mɔ ko ni yɔɔ skul lɛ mli nifeemɔ lɛ yeɔ be fe nɔ ni aha lɛ lɛ.

Nɔ ko Hee: Akɛ “Supplemental Bible-Reading Schedule” (Biblia Kanemɔ He Gbɛjianɔtoo ni Fata He) ewo akrabatsai amli, ni etsa lala ni abaala yɛ otsi fɛɛ otsi mli lɛ nɔ nɔŋŋ kɛha wɔhe sɛɛnamɔ. Eyɛ mli akɛ otsi lɛ mli skul nifeemɔ lɛ eko damɔɔɔ nɔ moŋ, shi ha efee oti ni ma ohiɛ akɛ obaanyiɛ sɛɛ. Enɛ baaye ebua bo koni oná su ni yɔɔ Biblia ni akaneɔ daa lɛ mli lɛ eko, kɛji ofeee nakai momo.

Kɛha saji babaoo ni kɔɔ nifeemɔi, ŋaawoo, kɛ niŋmaa kaai lɛ ahe lɛ, ofainɛ kanemɔ gbɛtsɔɔmɔi ni yɔɔ “Theocratic Ministry School Schedule for 1998,” (Teokrase Sɔɔmɔ Skul He Gbɛjianɔtoo Kɛha 1998) kɛ October 1996 Wɔ Maŋtsɛyeli Sɔɔmɔ lɛ baafa 3 lɛ mli jogbaŋŋ.

Kɛ oŋmako ogbɛi owoko Teokrase Sɔɔmɔ Skul lɛ mli kɛbashi amrɔ nɛɛ lɛ, no lɛ, wɔmiifɔ bo nine koni okɛ ogbɛi awo mli. Skul ni nɔ bɛ nɛɛ baaya nɔ atsu gbɛhe ko ni he hiaa he nii yɛ Yehowa tsuji ni baa amɛhe shi ni etuu amɛhe amɛha lɛ atsɔsemɔ mli, koni amɛtsɔmɔ esɔɔlɔi ni he esa jogbaŋŋ.​—⁠1 Tim. 4:​13-16.