Saramɔ Ni Baanyɛ Afee Jɔɔmɔ
1 Miishɛɛ Zakeo kɛhere Yesu ákɛ gbɔ kɛba eshia lɛ. Ni kwɛ jɔɔmɔ ni jɛ nakai saramɔ lɛ mli ba!—Luka 19:2-9.
2 Ŋmɛnɛ, ákɛ asafo lɛ Yitso lɛ, Yesu Kristo kɛ gbɛtsɔɔmɔi haa onukpai lɛ koni ‘amɛkwɛ Nyɔŋmɔ asafo kuu lɛ.’ (1 Pet. 5:2, 3; Yoh. 21:15-17) Kɛfata nitsɔɔmɔ yɛ kpeei ashishi, kɛ hiɛnyiɛmɔ yɛ shiɛmɔ nitsumɔ lɛ mli lɛ he lɛ, nɔkwɛlɔi ni yɔɔ asafo lɛ mli lɛ jɛɔ amɛsuɔmɔ mli amɛkɛ yelikɛbuamɔ haa aŋkroaŋkroi ni yɔɔ asafo lɛ mli lɛ. No hewɔ lɛ, yɛ be kɛ bei amli lɛ, ekolɛ obaakpa gbɛ akɛ onukpai lɛ kɛ yelikɛbuamɔ aaabaha bo aŋkro, ekolɛ yɛ oshia, yɛ Maŋtsɛyeli Asa lɛ nɔ, beni nyɛnyiɛ shiɛmɔ nɔ aloo yɛ shihilɛi krokomɛi amli. Ani esa akɛ oshe onukpai lɛ gbeyei kɛ amɛbasara bo? Dabi kwraa. Oŋɔɔ ni amɛaaba lɛ etsɔɔɔ akɛ ootɔ fã yɛ gbɛ ko nɔ. Belɛ, mɛɛ yiŋtoo yɔɔ saramɔ ni onukpai lɛ basaraa bo lɛ he mɔ?
3 Paulo kɛɛ eesumɔ ni eyasara nyɛmimɛi lɛ, ‘ni ekwɛ bɔ ni amɛyɔɔ.’ (Bɔf. 15:36) Hɛɛ, ákɛ tookwɛlɔi ni yɔɔ suɔmɔ lɛ, onukpai lɛ susuɔ bɔ ni oyɔɔ lɛ he waa diɛŋtsɛ. Amɛmiisumɔ ni amɛkɛ mumɔŋ yelikɛbuamɔ ni baaye ebua bo ni etswa bo ema shi aha bo. Mɔ he susumɔ ni tamɔ nɛkɛ Yehowa ni ji Tookwɛlɔ ni yɔɔ suɔmɔ lɛ taoɔ yɛ wɔteŋ mɔ fɛɛ mɔ dɛŋ.—Ezek. 34:11.
4 Heremɔ Onukpai lɛ Atuu kɛ́ Amɛbasra Bo: Oti ni ma Paulo hiɛ yɛ saramɔ lɛ mli lɛ ji koni ‘ekɛ mumɔŋ duromɔkeenii lɛ eko ayaha amɛ, bɔni afee ni aŋɔwaje amɛ ni akɛ hewalɛwoo aha.’ (Rom. 1:11, 12) Mumɔŋ hewalɛwoo he miihia wɔteŋ mɔ fɛɛ mɔ yɛ nɛkɛ naagbee gbii ni jaraa nɛɛ mli, ni yelikɛbuamɔ he miihia wɔ koni wɔfĩ shi yɛ hemɔkɛyeli lɛ mli. Ŋwanejee ko bɛ he akɛ jwɛŋmɔ kpakpa ni okɛbaahere saramɔ ko nɔ lɛ baawaje bo jogbaŋŋ.
5 Jiemɔ hiɛsɔɔ kpo otsɔɔ sɛɛnamɔi babaoo ni abaaná kɛjɛ onukpai lɛ asaramɔ nitsumɔ lɛ mli lɛ. Kɛ́ sane ko yɛ, aloo sanebimɔ ko ni osusuɔ he yɛ lɛ, kaimɔ akɛ onukpai lɛ yɛ asafo lɛ mli koni amɛye amɛbua. Kaashashao shi akɛ okɛ amɛ aaasusu saji fɛɛ ni miiye omumɔŋ hilɛ-kɛ-hamɔ awui lɛ ahe. Jiemɔ hiɛsɔɔ kpo otsɔɔ nɛkɛ gbɛjianɔ ni suɔmɔ yɔɔ mli ni Yehowa eto lɛ, ni onya yɛ jɔɔmɔi ni nakai saramɔ lɛ baanyɛ ekɛba lɛ hewɔ.