Okɛ Woji Bibii lɛ Atsu Nii Koni Okɛtee Jwɛŋmɔ kɛ Tsui Miishɛɛ Shi
1 Esa akɛ akɛ Biblia mli anɔkwale lɛ aha bɔni afee ni etee jwɛŋmɔ kɛ tsui fɛɛ miishɛɛ shi. Beni Yesu wie anɔkwale lɛ he etsɔɔ etoibolɔi lɛ, ehala saji ni amɛná he miishɛɛ ni ekanya amɛ. (Luka 24:17, 27, 32, 45) Omanye ni wɔyeɔ yɛ wɔshiɛmɔ nitsumɔ lɛ mli lɛ damɔ mɔdɛŋ ni wɔbɔɔ koni wɔyɔse wɔtoibolɔi lɛ amumɔŋ hiamɔ nii lɛ anɔ titri.
2 Woji bibii lɛ baanyɛ afee dɛŋdadei ni mɔɔ shi ni akɛaashɛ mɛi ni wɔkɛkpeɔ yɛ shiɛmɔ nitsumɔ lɛ mli lɛ ajwɛŋmɔ kɛ tsui he. Tsɔ hiɛ osusu mɛi ni baakpɛlɛ shɛɛ sane ni yɔɔ woji bibii ni akɛbaaha yɛ August mli lɛ eko fɛɛ eko mli lɛ nɔ lɛ he:
—Ani Nyɔŋmɔ Susuɔ Wɔhe Lɛlɛŋ? Mɛi ni ehao yɛ shika gbɛfaŋ loo mɛi ni kɛ oshara ekpe lɛ baaná nɛkɛ miishɛjemɔ shɛɛ sane ni tsɔɔ wɔsɛɛ be ni nɔnaa ko bɛ mli lɛ he miishɛɛ.
—Mɛni Ji Yiŋtoo ni Yɔɔ Shihilɛ Sɛɛ—Te Ooofee Tɛŋŋ Ole Hu? Oblahii kɛ oblayei ni kɛ hiɛdɔɔ miisusu amɛ wɔsɛɛ shihilɛ he lɛ baaná sane hetooi ni damɔ Biblia lɛ nɔ ni anaa yɛ wolo bibioo nɛɛ mli lɛ he sɛɛ.
—Na Wala Mli Ŋɔɔmɔ yɛ Shikpɔŋ Nɔ Kɛya Naanɔ! Mfonirii babaoo kɛ ŋmalɛi ni atsɛ lɛ baaye abua gbekɛbii kɛ mɛi ni le nikanemɔ fioo pɛ lɛ koni amɛnu Nyɔŋmɔ yiŋtoi lɛ ashishi.
—Nɔyeli Ni Kɛ Paradeiso Baaba. Ekolɛ, mɔ fɛɛ mɔ ni kɛ nɔyeli yɔɔ tsakpaa lɛ baakpɛlɛ nɛkɛ shɛɛ sane ni tsɔɔ bɔ ni Nyɔŋmɔ Maŋtsɛyeli lɛ baatsu adesai anaagbai ni wa lɛ ahe nii lɛ nɔ.
—Beni Mɔ Ko ni Osumɔɔ Lɛ Egbo. Wekui babaoo ni agbo yɛ amɛnɔ lɛ náa miishɛɛ akɛ amɛaaná wolo bibioo nɛɛ eko. Shiɛlɔi ni yeɔ odase yɛ fuuhei lɛ kɛ nɛkɛ wolo bibioo nɛɛ tsuɔ nii ni amɛkɛshɛjeɔ yarafeelɔi lɛ amii. Nyɛmimɛi yei enyɔ yanina weku ko ni feɔ mɛi kpawo ni miisɔle yɛ gbonyobu ko he. Miishɛjemɔ shɛɛ saji ni yɔɔ wolo bibioo lɛ mli ni amɛgba amɛ lɛ hewɔ lɛ, akɛ nyɛ lɛ je Biblia mli nikasemɔ shishi enɔ jetsɛremɔ!
—Ani Esa akɛ Ohe Triniti lɛ Oye? Ekolɛ, mɔ ko ni hiɛ dɔɔ yɛ jamɔ he lɛ baakpɛlɛ anɔkwale ni anaa yɛ nɛkɛ anɔkwa wolo ni kpaa Kristendom shishijee tsɔɔmɔ lɛ he mama nɛɛ mli lɛ nɔ.
—Le nɔ ni yɔɔ woji bibii nɛɛ eko fɛɛ eko mli, ni okwɛ gbɛ nɔ ni oootsɔ ni okɛtsu nii jogbaŋŋ yɛ oshikpɔŋkuku lɛ mli. Kwɛmɔ Wɔ Maŋtsɛyeli Sɔɔmɔ ni je kpo yɛ July 1998 lɛ sɛɛ baafa lɛ kɛha shiɛmɔ wiemɔi ahe ŋaawoi. Eba akɛ Yehowa aaajɔɔ omɔdɛŋbɔɔi lɛ anɔ koni oshɛ gbɔmɛi lɛ ajwɛŋmɔi kɛ tsuii ahe.—Mar. 6:34.