Nɔkwɛlɔi ni Nyiɛɔ Hiɛ—Sɔɔmɔ Nitsumɔ Nɔkwɛlɔ Lɛ
1 Sɔɔmɔ nitsumɔ nɔkwɛlɔ lɛ susuɔ nibii fɛɛ ni kɔɔ bɔ ni sanekpakpa shiɛmɔ nitsumɔ lɛ yaa nɔ ehaa yɛ shikpɔŋkuku ni akɛwo asafo lɛ dɛŋ lɛ he waa diɛŋtsɛ. Enɛ hewɔ lɛ, etsuɔ gbɛhe ko ni he hiaa waa he nii bɔni afee ni wɔnyɛ wɔtsu sɔ̃ ni kã wɔnɔ akɛ wɔshiɛ sanekpakpa lɛ he nii. Ákɛ sanekpakpa shiɛlɔ ni yɔɔ ekãa lɛ, enyiɛɔ hiɛ yɛ gbɛjianɔtoo fɛɛ ni kɔɔ shiɛmɔ nitsumɔ lɛ he lɛ mli. Ákɛ tsɔɔlɔ ni le nii lɛ, eyeɔ ebuaa shiɛlɔi aŋkroaŋkroi koni amɛya hiɛ yɛ hesaa ni amɛyɔɔ yɛ sɔɔmɔ nitsumɔ lɛ mli lɛ mli.—Efe. 4:11, 12.
2 Nɛkɛ onukpa nɛɛ kwɛɔ asafoŋ sɔɔlɔi ni kwɛɔ woji, woji tɛtrɛbii, kɛ shikpɔŋkukuji lɛ anɔ lɛ anɔ tɛ̃ɛ. Lɛ ji mɔ ni sɔ̃ kã enɔ akɛ ekwɛ akɛ woji, woji tɛtrɛbii, kɛ sɔɔmɔ nitsumɔ he woji ni aŋmalaa nɔ nii ni fa bɔ ni sa yɛ kɛha nyɔŋ fɛɛ nyɔŋ nɔ nitsumɔ. Daa afi lɛ ekwɛɔ shikpɔŋkuku wolo lɛ mli shikome, ni ekwɛɔ hei fɛɛ ni awo ŋaa yɛ he akɛ akaya jɛmɛ lɛ, ni ehaa nyɛmimɛi ni he esa yaa shiai nɛɛ amli.
3 Eji sɔɔmɔ nitsumɔ nɔkwɛlɔ lɛ sɔ̃ akɛ ekwɛ hei srɔtoi ni ayashiɛɔ yɛ lɛ, ní nitsumɔhei, gbɛjegbɛi anɔ, kɛ tɛlifoŋ nɔ odaseyeli fata he lɛ nɔ. Ehiɛ hiɔ ehe nɔ ni etoɔ shiɛmɔ nitsumɔ lɛ he gbɛjianɔi srɔtoi yɛ otsi lɛ fɛɛ mli, ni gbii juji hu fata he. Ejieɔ anɔkwa miishɛɛ kpo yɛ Biblia mli nikasemɔ ni afeɔ lɛ he. Ekwɛɔ gbɛ̀i anɔ ni eeetsɔ ekɛ mumɔŋ yelikɛbuamɔ aha mɛi ni foɔ shiɛmɔ yaa mli aloo amɛfee kpɔkee yɛ shiɛmɔ nitsumɔ lɛ mli lɛ. Ekɛ ekãa susuɔ gbɛgbalɔi lɛ anitsumɔ lɛ he, ni ekwɛɔ Gbɛgbalɔi Yeɔ Buaa Mɛi Krokomɛi he gbɛjianɔtoo lɛ nɔ.
4 Ákɛ Asafoŋ Sɔɔmɔ Ajinafoi Akuu lɛ mlinyo lɛ, sɔɔmɔ nɔkwɛlɔ lɛ kɛ ŋaawoi fɛɛ ni he hiaa kɛha tsakemɔi afeemɔ yɛ Asafo Woloŋ Nikasemɔ kui lɛ amli lɛ haa. Kɛ́ ebasara nyɛkuu lɛ, bɔɔ mɔdɛŋ koni oya, ni ofata ehe yɛ shiɛmɔ nitsumɔ lɛ mli.
5 Esa akɛ mɛi fɛɛ ni yɔɔ asafo lɛ mli lɛ ajɛ amɛsuɔmɔ mli amɛkɛ sɔɔmɔ nitsumɔ nɔkwɛlɔ lɛ afee ekome yɛ gbɛtsɔɔmɔ ni ekɛhaa lɛ mli. Enɛ baaye ebua wɔ koni wɔbɔ mɔdɛŋ jogbaŋŋ yɛ kaselɔ-feemɔ nitsumɔ lɛ mli, ni wɔná miishɛɛ ni fe fɛɛ ni yɔɔ shiɛmɔ nitsumɔ lɛ mli lɛ mli ŋɔɔmɔ.