Nɔkwɛlɔi ni Nyiɛɔ Hiɛ—Woloŋmalɔ Lɛ
1 Asafoŋ woloŋmalɔ lɛ tsuɔ gbɛfaŋnɔ ni he hiaa he nii koni ekwɛ ní “afee nii fɛɛ bɔ ni yɔɔ fɛo kɛ gbɛnaagbɛnaa.” (1 Kor. 14:40) Ákɛ Asafoŋ Sɔɔmɔ Ajinafoi Akuu lɛ mlinyo lɛ, etsuɔ asafo lɛ woloŋmaa kɛ saji ni he hiaa ni aŋmalaa awoɔ woji amli lɛ he nii. Eyɛ mli akɛ ekolɛ jeee mɔ fɛɛ mɔ yɔseɔ enitsumɔ lɛ tamɔ onukpai krokomɛi lɛ anitsumɔ lɛ moŋ, shi enitsumɔ he hiaa waa diɛŋtsɛ ni hiɛ sɔɔ.
2 Kɛ nine shɛ woloŋmaa nɔ kɛjɛ Asafo lɛ loo mɛi krokomɛi adɛŋ lɛ, woloŋmalɔ lɛ tsuɔ he nii ni ekwɛɔ koni aha hetoo kɛ́ ehe miihia. Ekwɛɔ koni akɛ woji ni aŋmala lɛ aha onukpai lɛ koni amɛteŋ mɔ fɛɛ mɔ akane koni no sɛɛ lɛ ekɛwo woji amli kɛha emli kwɛmɔ be kroko kɛ́ aatao. Ekwɛɔ woji ni akɛshɛɔ woji tɛtrɛbii kɛ woji wuji lɛ amli akɛ eja lo, ni ekɛmajeɔ Asafo lɛ. Ekwɛɔ mɛi ni tsuɔ shika akɔntaabuu kɛ woji tɛtrɛbii ashɛɛ he nii lɛ anɔ tɛ̃ɛ kɛ kpee wuji he saji fɛɛ hu nɔ.
3 Akɛni esa akɛ woloŋmalɔ lɛ kɛ asafo lɛ daa nyɔŋ nɔ shiɛmɔyaa he akɔntaabuu lɛ amaje Asafo lɛ dani nyɔŋ lɛ nɔ gbi ni ji ekpaa lɛ aho hewɔ lɛ, ehe miihia ni wɔ fɛɛ wɔbu wɔshiɛmɔ nitsumɔ lɛ he akɔntaa mra yɛ nyɔŋ fɛɛ nyɔŋ naagbee. No sɛɛ lɛ, eŋmalaa shiɛmɔyaa he akɔntaabuu lɛ fɛɛ ewoɔ “Congregation’s Publisher Record” woji lɛ anɔ. Shiɛlɔ fɛɛ shiɛlɔ baanyɛ abi koni ekwɛ lɛ diɛŋtsɛ enitsumɔ he akɔntaabuu lɛ mli.
4 Kɛ shiɛlɔ ko fã kɛba asafo lɛ mli loo efã kɛtee lɛ, woloŋmalɔ lɛ biɔ wolo ní tsɔɔ mɔ ni eji ni fataa mɔ lɛ “Congregation’s Publisher Record” woji lɛ ahe lɛ kɛjɛɔ asafo kroko lɛ mli onukpai lɛ adɛŋ loo kɛmajeɔ amɛ.—Our Ministry, bf. 104-105.
5 Woloŋmalɔ lɛ kwɛɔ gbɛgbalɔi anitsumɔ mli, ni ehaa onukpai lɛ, titri lɛ sɔɔmɔ nitsumɔ nɔkwɛlɔ lɛ leɔ naagbai fɛɛ ni ekolɛ gbɛgbalɔi kɛkpeɔ. Ehaa Asafo Woloŋ Nikasemɔ nɔkwɛlɔi lɛ leɔ shiɛlɔi ní eyaaa shiɛmɔ daa nyɔŋ nɔ lɛ. Woloŋmalɔ lɛ kɛ shiɛmɔ nitsumɔ nɔkwɛlɔ lɛ kɛ ekomefeemɔ nyiɛɔ hiɛ yɛ mɔdɛŋ ni amɛbɔɔ koni amɛye amɛbua mɛi ni ekpa shiɛmɔyaa lɛ mli.—Wɔ Maŋtsɛyeli Sɔɔmɔ, November 1987, bf. 1.
6 Yɛ be mli ni wɔjieɔ hiɛsɔɔ babaoo kpo wɔtsɔɔ yɛ nitsumɔ ni woloŋmalɔ lɛ tsuɔ lɛ he lɛ, eba akɛ wɔbaafee bɔ ni wɔɔnyɛ koni wɔkɛye wɔbua ni etsulɔnukpa nitsumɔ lɛ afee mlɛo kɛha lɛ.—1 Kor. 4:2.