Tsu Oshiɛmɔ Nitsumɔ Iɛ He Nii Jogbaŋŋ Kɛmɔ Shi
1 Atatu lɛ mli badĩ tuŋŋ, ni ebɔi gbɛɛmɔ gbeyeigbeyei, ni egbɛɛmɔ lɛ naa miiwa bɔ ni baanyɛ atsimɔ mɔ toi. Kɛkɛ ni atatu ko ni tamɔ lasu bɔi shikpɔŋgbɛ baa. Mɛni ni? Baalabii akpekpei abɔ akuu ko miiba koni amɛbakpata shikpɔŋ lɛ hiɛ kwraa! Nɛkɛ nifeemɔ ni gbalɔ Yoel tsɔɔ mli nɛɛ miiba mli ŋmɛnɛ yɛ Nyɔŋmɔ sɔɔlɔi ni afɔ amɛ mu kɛ amɛnanemɛi asafo babaoo lɛ ashiɛmɔ nitsumɔ Iɛ mli.
2 May 1, 1998 Buu-Mɔɔ lɛ baafa 11, kuku 19 kɛɛ akɛ: “Ŋmɛnɛŋmɛnɛ beaŋ Nyɔŋmɔ baalabii akuu lɛ eye odase jogbaŋŋ kɛmɔ shi yɛ Kristendom ‘maŋ lɛŋ.’ (Yoel 2:9) . . . Amɛkã he amɛmiiye gbɛtsii nii fɛɛ anɔ kunim lolo, ni amɛmiibote shiai akpekpei abɔ mli, amɛmiibɛŋkɛ gbɔmɛi yɛ gbɛjegbɛi anɔ, amɛkɛ amɛ miiwie yɛ tɛlifoŋ nɔ, ni amɛmiiya amɛ ŋɔɔ kɛtsɔ gbɛ fɛɛ gbɛ ni baahi nɔ, beni amɛjajeɔ Yehowa shɛɛ sane lɛ amɛtsɔɔ lɛ.” Ani ejeee hegbɛ kpele akɛ aaaná nitsumɔ ni Nyɔŋmɔ ehala nɛɛ mli gbɛfaŋnɔ?
3 Nɔ ni tamɔɔɔ baalabii diɛŋtsɛ, ni amɛyiŋtoo pɛ ji koni amɛye nii lɛ, wɔ ákɛ Yehowa sɔɔlɔi lɛ susuɔ mɛi ni wɔshiɛɔ wɔtsɔɔ amɛ lɛ ashihilɛi ahe waa diɛŋtsɛ. Wɔmiisumɔ ni wɔye wɔbua mɛi krokomɛi koni amɛkase Nyɔŋmɔ Wiemɔ mli anɔkwalei ni yɔɔ nyam lɛ ní etsirɛ amɛ koni amɛfee nii ni baaha ahere amɛyiwala kɛya naanɔ. (Yoh. 17:3; 1 Tim. 4:16) No hewɔ lɛ, wɔmiisumɔ ni wɔtsu nii jogbaŋŋ kɛmɔ shi yɛ bɔ ni wɔtsuɔ wɔ shiɛmɔ nitsumɔ lɛ he nii wɔhaa lɛ mli. Yɛ bɔ ni wɔtsuɔ shiɛmɔ Iɛ he nii wɔhaa lɛ fɛɛ sɛɛ lɛ, esa akɛ wɔsusu kɛji wɔmiitsu he nii bɔ ni baawo yibii ni fe fɛɛ kɛ be mli ni ebaawo yibii ni fe fɛɛ lɛ he. Akɛni ‘je nɛŋ shihilɛ miitsake’ hewɔ lɛ, wɔɔfee jogbaŋŋ akɛ wɔɔpɛi bɔ ni wɔtsuɔ nii lɛ wɔhaa kɛ bɔ ni wɔfeɔ wɔbɛŋkɛɔ mɛi wɔhaa lɛ mli koni wɔná nɔmimaa akɛ wɔmiitsu yibii ni wɔɔwo babaoo bɔ ni wɔɔnyɛ lɛ he kaa lɛ he nii.—1 Kor. 7:31.
4 Yɛ be mli ni wɔbɔɔ mɔdɛŋ koni wɔbɛŋkɛ mɛi yɛ gbɛ̀i srɔtoi babaoo nɔ Iɛ, shia-kɛ-shia nitsumɔ lɛ kã he eji wɔ shiɛmɔ nitsumɔ lɛ fã titri ko lolo. Ani onaa akɛ bei pii Iɛ, mɛi bɛ shia loo amɛmiiwɔ kɛ́ otee amɛ ŋɔɔ lɛ? Kwɛ bɔ ni ejeɔ mɔ nijiaŋ wui, akɛni onyɛɛɛ okɛ amɛ agba sanekpakpa lɛ he shɛɛ sane lɛ hewɔ! Te obaanyɛ otsu kaa nɛɛ he nii oha tɛŋŋ?
5 Feemɔ Tswãa ni Okɛ Nilee Atsu Nii: Yɛ Israel klɛŋklɛŋ afii oha lɛ mli lɛ, nyɔɔŋ ji be mli ni wolɛi yaa wuo. Mɛni hewɔ amɛyaa wuo nyɔɔŋ? Eyɛ mli akɛ ejeee be ni hi fe fɛɛ kɛha amɛ moŋ, shi eji be ni hi fe fɛɛ kɛha looi babaoo shámɔ. Eji be ni woɔ yibii fe fɛɛ. Be mli ni June 15, 1992 Buu-Mɔɔ lɛ wieɔ nifeemɔ nɛɛ he lɛ, ekɛɛ: “Wɔ hu esa akɛ wɔle wɔshikpɔŋkuku lɛ jogbaŋŋ, koni wɔya wuo, taakɛ eji lɛ, yɛ be mli ni gbɔmɛi lɛ ateŋ mɛi ni fa yɔɔ shia ni amɛbaasumɔ ni amɛbo toi.” Adesai anifeemɔi amlipɛimɔ jogbaŋŋ etsɔɔ akɛ, yɛ maŋtiasei bibii babaoo kɛ hei babaoo ni wɔɔhe tsũi yɔɔ jɛmɛ lɛ amli Iɛ, ekolɛ wɔbaana mɛi yɛ shia kɛ́ wɔtee Hɔɔ kɛ Hɔgbaa leebi maŋkpa shi bei pii lɛ amɛhereee wɔ hiɛmɛɛ kɛ wɔyasara amɛ yɛ nakai be lɛ mli. Kɛ nɛkɛ sane lɛ ji yɛ okutso lɛ mli lɛ, ani obaanyɛ otsake bei ni okɛyasaraa amɛ lɛ mli kɛya leebi beni je etsɛre saŋŋ aloo kɛyaa shwane mii po? Enɛ ji gbɛ kpakpa ni wɔkɛaaha wɔ shiɛmɔ nitsumɔ ni mɔɔ shi jogbaŋŋ lɛ aya hiɛ, koni agbɛnɛ hu, wɔkɛjie mɔ hesusumɔ kpo wɔtsɔɔ wɔnanemɛi, ni ji nɔ ko ni yeɔ anɔkwa Kristofoi asuɔmɔ he odase lɛ.—Mat. 7:12.
6 Bɔfo Paulo kaiɔ wɔ yɛ Filipibii 4:5 akɛ, esa akɛ ‘wɔha gbɔmɛi fɛɛ ale wɔmlijɔlɛ lɛ.’ Yɛ mumɔŋ gbɛtsɔɔmɔ nɛɛ kɛ gbeekpamɔ naa lɛ, wɔmiisumɔ ni wɔŋmɛ pɛpɛɛpɛ ni wɔkɛ nilee atsu nii yɛ gbɛ̀i ni wɔkɛtsuɔ nii lɛ mli be mli ni wɔkɛ ekãa kɛ miishɛɛ tsuɔ wɔ shiɛmɔ nitsumɔ lɛ. Wɔsumɔɔɔ ni ‘wɔshiu nitsɔɔmɔ yɛ faŋŋ kɛ shia kɛ shia lɛ nɔ,’ shi wɔmiisumɔ ni wɔkwɛ koni wɔtsu wɔ shia-kɛ-shia shiɛmɔ nitsumɔ lɛ yɛ bei ni hi ni woɔ yibii lɛ mli. (Bɔf. 20:20) Taakɛ nakai wolɛi ni yɔɔ Israel klɛŋklɛŋ afii oha lɛ mli lɛ ji lɛ, wɔsusuɔ ‘wuoyaa’ he yɛ bei amli ni wɔbaanyɛ wɔwo yibii ni fe fɛɛ lɛ, jeee bei amli ni hi fe fɛɛ kɛha wɔ.
7 Mɛɛ tsakemɔi abaanyɛ afee? Bei pii lɛ, afeɔ kpeei kɛha shiɛmɔyaa Iɛ Hɔɔ kɛ Hɔgbaa leebi 8:30 loo 9:00, ni no sɛɛ Iɛ kuu lɛ yaa shinaai anaa nitsumɔ lɛ mli amrɔ nɔŋŋ yɛ shikpɔŋkuku lɛ mli. Shi kɛlɛ, onukpai akui komɛi eto gbɛjianɔ koni kuu Iɛ kɛ amɛhe awo shiɛmɔ nitsumɔ lɛ fãi krokomɛi lɛ amli, tamɔ gbɛjegbɛ nɔ odaseyeli, shikpɔŋkuku ni nitsumɔhei yɔɔ mli, loo sɛɛsaramɔi, dani amɛyaa shinaai anaa nitsumɔ lɛ mli yɛ hei ni shiai yɔɔ jɛmɛ lɛ. Asafoi krokomɛi eto kpee bei kɛha shiɛmɔ nitsumɔ lɛ he gbɛjianɔ yɛ sɛɛ mli yɛ leebi mli—yɛ leebi 10:00, leebi 11:00, loo shwane 12:00. No sɛɛ lɛ, kuu lɛ yaa shinaai anaa nitsumɔ Iɛ mli tɛ̃ɛ ni amɛshiɛɔ aahu kɛyashiɔ shwane mra mli. Yɛ shikpɔŋkukuji komɛi amli lɛ, shwane mra mli Iɛ baanyɛ afee be ni hi fe fɛɛ ni akɛaakpe kɛha shiɛmɔyaa moŋ fe leebi. Tsakemɔi ni tamɔ nɛkɛ baanyɛ awo yibii jogbaŋŋ yɛ shinaai anaa nitsumɔ Iɛ mli.
8 Okɛ Sɛɛyoomɔ kɛ Ŋaa Asu Nii: Be mli ni wɔyaa gbɔmɛi aŋɔɔ yɛ amɛshinaai anaa lɛ, wɔkɛ subaŋi srɔtoi ni ajieɔ lɛ kpo atsɔɔ yɛ wɔ shɛɛ sane lɛ he lɛ kpeɔ. Shiatsɛmɛi komɛi boɔ toi, mɛi krokomɛi yɛ shikpilikpii ni mɛi fioo ko pɛ baanyɛ afee ŋwanejelɔi loo mɛi atutualɔi. Yɛ sɛɛkpee nɔ̃ lɛ gbɛfaŋ lɛ, akaiɔ wɔ yɛ Reasoning From the Scriptures lɛ baafa 7 akɛ wɔtaooo koni “ ‘wɔye kunim yɛ ŋwanejeei amli’ yɛ wɔ kɛ mɛi ni ebuuu anɔkwale lɛ gbɛfaŋ.” Kɛ shiatsɛ lɛ ekpɛlɛɛɛ lɛ, nɔ ni hi fe fɛɛ ji ni wɔshi jɛmɛ ni wɔya. Esaaa akɛ wɔteeɔ béi ashi yɛ mɛi amli kɔkɔɔkɔ kɛtsɔ veveeve ni wɔɔfee koni amɛkɛ wɔ awie loo amɛkpɛlɛ jwɛŋmɔ ni wɔkɛhaa lɛ nɔ. Wɔkɛ wɔ shɛɛ sane lɛ enyɛɛɛ mɛi anɔ. Nakai feemɔ efeŋ nilee ni ebaanyɛ ekɛ naagbai aba Odasefoi krokomɛi anɔ kɛ nitsumɔ lɛ diɛŋtsɛ nɔ.
9 Dani wɔɔje shikpɔŋkuku ko mli nitsumɔ shishi lɛ, nilee yɛ mli akɛ wɔɔkwɛ shikpɔŋkuku he wolo lɛ mli koni wɔtao adrɛs he kadimɔnii ni tsɔɔ he ni shia lɛ mli bii ekɛɛ wɔ akɛ wɔkaba jɛmɛ lɛ. Kɛ adrɛs ni tamɔ nakai yɛ lɛ, esa akɛ akɛɛ shiɛlɔ fɛɛ shiɛlɔ ni tsuɔ nii yɛ nakai gbɛjegbɛ lɛ nɔ lɛ he ni esaaa akɛ eyaa. Mɔ ko mɔ ko kwraa akakpɛ yiŋ eha ehe akɛ eeeya shiai nɛɛ amli ni sɔɔmɔ nitsumɔ nɔkwɛlɔ lɛ gbɛtsɔɔmɔ akɛ afee nakai lɛ bɛ mli.—Kwɛmɔ January 1994 Wɔ Maŋtsɛyeli Sɔɔmɔ lɛ mli Sanebimɔ He lɛ.
10 Wɔbaanyɛ wɔtsu nii jogbaŋŋ kɛmɔ shi, kɛ wɔkɛ sɛɛyoomɔ tsu nii be mli ni wɔtsuɔ shia kɛ shia nitsumɔ lɛ. Kwɛmɔ nii jogbaŋŋ be mli ni oyaa shia ko mli lɛ. Ani akɛ shinaai loo samfɛji anaa mamai lɛ fɛɛ eba shi? Ani anuuu gbɛɛmɔ ko ni tsɔɔ akɛ aafee nɔ ko yɛ mli? Enɛ baanyɛ atsɔɔ akɛ mɛi ni yɔɔ mli lɛ ewɔ. Ekolɛ, wɔkɛ shiatsɛ lɛ baagba sane ni woɔ yibii babaoo kɛ́ wɔba yɛ sɛɛ mli. Ekolɛ nɔ ni baahi fe fɛɛ ji ni wɔho shia nɛɛ he dã ni wɔkadi shia lɛ nɔmba. Obaanyɛ oya shia lɛ mli ekoŋŋ dani oshi shikpɔŋkuku lɛ mli loo oŋma nɔ ko fioo akɛ obaaba ekoŋŋ yɛ sɛɛ mli.
11 Shihilɛi baanyɛ aba lolo ni ekolɛ wɔjeŋ gbɛ ni wɔbaatsiɛ mɔ ko hiɛ loo yɛ gbɛ kroko nɔ lɛ wɔbaagba enaa. Ekolɛ ebaafee tamɔ nɔ ni emli ewo la loo emli efũ po. Te esa akɛ wɔfee nii wɔha tɛŋŋ? Abɛi 17:27 woɔ ŋaa akɛ: “Mɔ ni mumɔ he jɔ lɛ, lɛ ji mɔ ni kɔɔ sane sɛɛ.” Yɛ be mli ni wɔkpaaa fai akɛ wɔtɔ yɛ wɔshiɛmɔ nitsumɔ lɛ hewɔ lɛ, eka shi faŋŋ akɛ wɔbaanyɛ wɔtsɔɔ bɔ ni edɔ wɔ akɛ wɔba yɛ be ni esaaa mli. Wɔbaanya wɔkɛ mlijɔlɛ abi kɛji be kroko baahi waa ni wɔkɛɛ akɛ wɔbaaku wɔ sɛɛ wɔba ekoŋŋ. Bei pii lɛ, wiemɔ ni akɛ gbee ni mli jɔ wieɔ, ní jɛ anɔkwayeli mli ni tsɔɔ mɔ hesusumɔ lɛ haa mɔ ni tamɔ nɛkɛ tsui nyɔɔ emli. (Abɛi 15:1) Kɛ shiatsɛ ko kɛɛ wɔ akɛ etsuɔ nii daa gbɛkɛ lɛ, abaanyɛ aŋma nɔ ko fioo kɛfata shikpɔŋkuku he wolo lɛ he bɔni afee ni anyɛ aya be kroko yɛ be ni sa mli.
12 Sɛɛyoomɔ hu he miihia yɛ be mli ni wɔbɔɔ mɔdɛŋ koni wɔtsu wɔ shikpɔŋkuku lɛ fɛɛ mli nii lɛ. Akɛni mɛi babaoo bɛ shia beni wɔtee amɛŋɔɔ klɛŋklɛŋ lɛ, ehe miihia koni wɔbɔ mɔdɛŋ lolo ni wɔya amɛŋɔɔ koni wɔkɛ amɛ ayagba yiwalaheremɔ he shɛɛ sane lɛ. (R.om. 10:13) Amaniɛbɔi tsɔɔ akɛ, bei komɛi lɛ, shiɛlɔi yaa shia kome too lɛ nɔŋŋ mli shii abɔ yɛ gbi kome mli koni amɛbɔ mɔdɛŋ ni amɛna gbɔmɛi lɛ yɛ shia. Enɛ ejeee akutsoŋbii lɛ ajwɛŋmɔ mli. Abaanyɛ ana jwɛŋmɔ ni ejaaa akɛ Yehowa Odasefoi ‘bahoɔ be fɛɛ be’ yɛ amɛ gbɛjegbɛ lɛ nɔ. Te abaafee tɛŋŋ akwa enɛ?
13 Okɛ sɛɛyoomɔ atsu nii. Kɛ ooba shia ni mɛi bɛ mli lɛ mli ekoŋŋ lɛ, ani nibii komɛi tsɔɔ akɛ amrɔ nɛɛ mɔ ko yɛ shia? Kɛ aŋmɛ agbó lɛ mli yɛ kponɔgbɛ lɛ, belɛ ekolɛ mɔ lɛ bɛ shia lolo, no hewɔ lɛ, tsũ lɛ naa shinaa lɛ ni aaayatswa lɛ woŋ yibii yɛ nɛkɛ be mli. Kɛ abɔ mɔdɛŋ yɛ bei srɔtoi amli yɛ gbi lɛ mli, tamɔ gbɛkɛ, shi nine shɛɛɛ mɔ lɛ nɔ lolo lɛ, no lɛ abaanyɛ akɛ nilee atsu nii ni ashi dɛhiɛmɔ wolo yɛ shinaa lɛ naa, titri lɛ, kɛ́ bei pii lɛ atsuɔ shikpɔŋkuku lɛ mli nii saŋŋ lɛ. Ekolɛ ebaanyɛ efee akɛ abaanyɛ ayana mɔ lɛ be kroko ni abaatsu nii yɛ shikpɔŋkuku lɛ mli.
14 Esa akɛ wɔkwa sanegbaai kakadaji yɛ shinaa lɛ naa kɛ́ shiatsɛ lɛ damɔ shinaa lɛ naa ni kɔɔyɔŋ tsakemɔ lɛ mli ehiii lɛ. Kɛ afɔ bo nine kɛba mli lɛ, kwɛmɔ koni okawo shikpɔŋ lɛ muji. Okɛ sɛɛyoomɔ atsu nii kɛ́ gbee ko miibolo eewo oyi lɛ. Kɛ ootsu nii yɛ shiai ni tsũi hɔlɔ mli lɛ amli lɛ, wiemɔ blɛoo koni okafee hoo ni egba shia mli bii lɛ anaa ni no tsɔɔ akɛ oba jɛmɛ.
15 Akɛ Gbɛjianɔtoo Kpakpa Atsu Nii, ni Afee Mɛi ni Bulɛ Yɔɔ Amɛhe: Kɛ wɔkɛ gbɛjianɔtoo kpakpa tsu nii lɛ, wɔbaanyɛ wɔkwa kui wuji ni anaa amɛ yɛ faŋŋ mli ni buaa he naa yɛ shikpɔŋkuku lɛ mli lɛ. Shiatsɛmɛi komɛi atsui baanyɛ afa kɛ́ shiɛlɔi akuu wulu badamɔ amɛshia hiɛ. Wɔsumɔɔɔ ni mɛi asusu akɛ “wɔmiitutua” hei ni wɔɔhe tsũi yɔɔ lɛ. Be ni akɛtoɔ shikpɔŋkuku lɛ mli nitsumɔ he gbɛjianɔ jogbaŋŋ kɛmɔɔ shi ji beni afeɔ kpee kɛha shiɛmɔyaa lɛ. Shiɛlɔi akui bibii, tamɔ weku lɛ éfaaa shiatsɛmɛi atsui tsɔ̃ ni gbɛjianɔ fioo pɛ ehe hiaa ni ato ekoŋŋ be mli ni atsuɔ shikpɔŋkuku lɛ mli nii lɛ.
16 Gbɛjianɔtoo kpakpa biɔ koni fɔlɔi akwɛ amɛbii ajeŋba jogbaŋŋ be mli ni amɛtsuɔ shikpɔŋkuku lɛ mli nii lɛ. Esa akɛ gbekɛbii aba amɛjeŋ jogbaŋŋ be mli ni amɛfataa onukpai ahe kɛyaa shinaai anaa lɛ. Esaaa akɛ aŋmɛɔ gbekɛbii agbɛ ni amɛshwɛɔ loo amɛkpaa shi, ni amɛmiigbala shiabii loo mɛi ni hoɔ lɛ ajwɛŋmɔ kɛmiiba wɔnɔ bɔ ni esaaa.
17 Pɛpɛɛpɛŋmɛɛ hu he miihia, be mli ni wɔjɔɔ wɔhe kɛyeɔ nɔ ko fioo lɛ. June 1995, Wɔ Maŋtsɛyeli Sɔɔmɔ lɛ baafa 7 kɛɛ akɛ: “Be mli ni wɔshiɛɔ lɛ, wɔbaanyɛ wɔfite be ni he baa sɛɛnamɔ lɛ yɛ be mli ni wɔjɔɔ wɔhe kɛyeɔ nɔ ko fioo lɛ. Shi kɛlɛ, kɛ kɔɔyɔŋ tsakemɔ lɛ mli bawa waa lɛ, wɔhe ni wɔɔjɔɔ fioo lɛ baaha wɔná hewalɛ ekoŋŋ ni eye ebua ni wɔtsa nɔ. Shi kɛlɛ, mɛi babaoo sumɔɔ ni amɛkɛ hiɛdɔɔ aye mɛi odase, ni amɛsumɔɔɔ ni amɛkɛ nyɛmimɛi bɔɔ yɛ hejɔɔmɔ be kɛha nɔ ko fioo yeli mli, beni eji be ni ato ama shi kɛha shiɛmɔ nitsumɔ lɛ.” Eyɛ mli akɛ kpa ni akpaa kɛha nɔ ko fioo yeli lɛ ji mɔ diɛŋtsɛ yiŋkpɛɛ moŋ, shi nɔ ni ayɔse ji akɛ, bei komɛi lɛ, akɛ hoofeemɔ gbaa leebi shiɛmɔ nitsumɔ lɛ mli niiashikpamɔi lɛ he sane, ni enɛ baanyɛ agbala jwɛŋmɔ kɛjɛ woo ni yɔɔ wɔ shiɛmɔ nitsumɔ lɛ he lɛ mli koni efite bɔ ni emɔɔ shi ehaa lɛ. Kɛ shiɛlɔi kɛ sɛɛyoomɔ tsu nii lɛ, amɛbaanyɛ amɛkwa be ni ato kɛha shiɛmɔ nitsumɔ lɛ ni amɛkɛaatsu nii bɔ ni esaaa lɛ.
18 Mɛi babaoo ena yibiiwoo kpakpai kɛtsɔ mɛi ni amɛbɛŋkɛɔ amɛ yɛ he fɛɛ he ni abaanyɛ ana amɛ yɛ lɛ nɔ—yɛ gbɛjegbɛi anɔ, tsɔnei amaamɔhei, kɛ maŋ lɛŋ hei krokomɛi. Wɔmiisumɔ ni wɔye odase fɛfɛo yɛ biɛ hu, jeee kɛtsɔ wɔwiemɔi anɔ kɛkɛ, shi kɛtsɔ wɔmlijɔlɛ lɛ hu nɔ. Esa akɛ shiɛlɔi ni yɔɔ asafo fɛɛ asafo mli lɛ akwɛ koni amɛtsɔɔ bulɛ yɛ amɛshikpɔŋkukuji ahe husui lɛ ahe, bɔni afee ni amɛkafee mɛi ni fa babaoo tsɔ̃ yɛ jarayelihei loo mɛi ni fa babaoo tsɔ̃ yɛ nitsulɔi ni yɔɔ nitsumɔhei lɛ aŋɔɔ, tamɔ pɛtro hɔɔmɔhei ni tsuɔ nii ŋmɛlɛtswai 24 lɛ nɛkɛ. Bɔni afee ni wɔkwɛ koni wɔtsu wɔ shiɛmɔ nitsumɔ lɛ yɛ gbɛjianɔtoo kpakpa naa bɔ ni woo yɔɔ mli lɛ, wɔbaatsu nii yɛ wɔ diɛŋtsɛ wɔshikpɔŋkukuji ni akɛha wɔ lɛ pɛ amli ja asafo kroko mli Asafoŋ Sɔɔmɔ Ajinafoi Akuu lɛ eto gbɛjianɔ pɔtɛɛ ko akɛ abaye abua amɛ.—Okɛto 2 Korintobii 10:13-15 he.
19 Asafoi komɛi ni yɔɔ akutsei babaoo ni abaanyɛ atsu maŋ odaseyeli nitsumɔ yɛ mli lɛ eto hei nɛɛ ahe gbɛjianɔ ewo shikpɔŋkukuji amli. Kɛkɛ lɛ akɛ shikpɔŋkuku he wolo ko haa aŋkro loo kuu ko. Enɛ haa atsuɔ mli nii jogbaŋŋ kɛmɔɔ shi ni ehaaa shiɛlɔi babaoo tsɔ̃ atsu nii yɛ he kome too lɛ nɔŋŋ yɛ be kome too lɛ nɔŋŋ mli, yɛ shishitoo mla ni yɔɔ 1 Korintobii 14:40 kɛ gbeekpamɔ naa: “Áfee nii fɛɛ bɔ ni yɔɔ fɛo kɛ gbɛnaa-gbɛnaa.”
20 Esa akɛ wɔhesaamɔ afee nɔ ni woo yɔɔ he be fɛɛ be ni tsɔɔ akɛ wɔji sɔɔlɔi najiaŋdamɔlɔi ni Yehowa gbɛi kã wɔnɔ. Nakai nɔŋŋ eji yɛ nibii ni wɔkɛtsuɔ nii lɛ ahe. Woji abaagii tserɛitserɛi kɛ Bibliai ni emli baafai lɛ anaabui lɛ edrɔ kɛwo mli, aloo nibii ekpa mli loo Bibliai ni abua woji bibii anaa awo mli lɛ gbalaa mɛi ajwɛŋmɔ kɛjɛɔ Maŋtsɛyeli shɛɛ sane lɛ he. Nɔ ni akɛɔ ji akɛ atadewoo kɛ hesaamɔ “ji gbɛ ni tswaa mɔ ko he adafi oya etsɔɔ mɛi ni yɔɔ jɛmɛ lɛ, ni etsɔɔ mɔ ni oji, kɛ nɔ ni ofeɔ, kɛ shihilɛ mli he ni sa bo.” No hewɔ lɛ, esaaa akɛ wɔhesaamɔ feɔ basabasa loo wɔshwako wɔyi, esaaa akɛ egbalaa mɛi ajwɛŋmɔ loo efeɔ haŋtsii, shi moŋ esa akɛ be fɛɛ be lɛ efee “bɔ ni sa . . . sanekpakpa lɛ.”—Fil. 1:27; okɛto 1 Timoteo 2:9, 10 he.
21 Bɔfo Paulo wie yɛ 1 Korintobii 9:26 akɛ: “Foi ni midaa nɛɛ, midáaa lɛ butubutu; nɔmɔ ni minɔɔ nɛɛ, jeee kɔɔyɔɔ mikɛnɔ̃ɔ.” Bɔni afee ni wɔkase Paulo lɛ, wɔtswa wɔfai shi akɛ wɔɔtsu wɔshiɛmɔ nitsumɔ lɛ he nii ni emɔ shi ni ewo yibii. Yɛ be mli ni wɔkɛ ekaa náa odaseyeli nitsumɔ lɛ mli gbɛfaŋnɔ akɛ Yehowa “baalabii akuu” lɛ mli bii ŋmɛnɛ lɛ, eba akɛ wɔkɛ Kristofoi anilee kɛ sɛɛyoomɔ baatsu nii ni wɔkɛ yiwalaheremɔ he shɛɛ sane lɛ ayaha mɛi fɛɛ ni yɔɔ wɔ shikpɔŋkuku lɛ mli lɛ.