Nɔkwɛlɔi ni Nyiɛɔ Hiɛ—Buu-Mɔɔ Nikasemɔ Nɔkwɛlɔ Lɛ
1 Buu-Mɔɔ Eetswa Yehowa Maŋtsɛyeli He Adafi lɛ ji “tsulɔ anɔkwafo kɛ nilelɔ” lɛ gbɛ titri ni etsɔɔ nɔ ekɛ mumɔŋ niyenii haa wɔ “yɛ be ni sa nɔ.” (Mat. 24:45) Onukpa ni kwɛɔ Buu-Mɔɔ Nikasemɔ lɛ nɔ lɛ yɛ gbɛnaa nii ko ni he hiaa akɛ tsɔɔlɔ ni he esa ni feɔ nɔkwɛmɔnɔ kpakpa yɛ Kristofoi ashihilɛ mli.—Rom. 12:7; Yak. 3:1.
2 Bɔni afee ni enyɛ etsɔɔ nii jogbaŋŋ lɛ, esa akɛ Buu-Mɔɔ Nikasemɔ nɔkwɛlɔ lɛ kɛ mɔdɛŋbɔɔ asaa ehe daa otsi. Ekɛ sɔlemɔ kɛ henɔkwɛmɔ feɔ enɛ. Miishɛɛ ni eyɔɔ yɛ asafo lɛ he lɛ jeɔ kpo yɛ mɔdɛŋ ní ebɔɔ yɛ anɔkwayeli mli koni ekɛ sane ni abaakase lɛ ashɛ wɔtsuii ahe lɛ mli. Egbalaa ejwɛŋmɔ kɛyaa nikasemɔ lɛ mli otii lɛ anɔ ni eyeɔ ebuaa wɔ koni wɔna bɔ ni amɛkɔɔ nikasemɔ lɛ he saneyitso lɛ he.
3 Nɔ ni fata hesaamɔ jogbaŋŋ ni eeefee lɛ he ji ŋmalɛi ni eeekwɛ fɛɛ kɛtsɔ hiɛ bɔni afee ni ele bɔ ni ekɔɔ he. Ehaa Nyɔŋmɔ Wiemɔ lɛ baa klɛŋklɛŋ kɛtsɔ hewalɛ ni ewoɔ asafo lɛ ni amɛkɛ Biblia lɛ atsu nii jogbaŋŋ yɛ nikasemɔ lɛ mli lɛ nɔ. Kɛ oti ko ejeee kpo yɛ hetooi ni jɛ asafo lɛ ŋɔɔ loo kɛ aku hiɛ afɔ̃ ŋmalɛ oti ko nɔ lɛ, ebiɔ sane pɔtɛɛ ko efataa he koni ekɛgbala sane lɛ kɛje kpo. Kɛtsɔ nɛkɛ gbɛ nɔ lɛ, eyeɔ ebuaa wɔ ni wɔnaa hetoo ni ja lɛ ni wɔleɔ bɔ ni wɔkɛ nɔ ni wɔkaseɔ lɛ baatsu nii yɛ wɔ shihilɛi amli.
4 Buu-Mɔɔ Nikasemɔ nɔkwɛlɔ lɛ bɔɔ mɔdɛŋ koni eya ehiɛ yɛ lɛ diɛŋtsɛ enitsɔɔmɔ hesaai amli fiofio. Ewieee babaoo, shi ewoɔ wɔ hewalɛ koni wɔwie—yɛ wɔ diɛŋtsɛ wɔwiemɔi amli kuku ní edamɔ oti lɛ nɔ. Ekolɛ yɛ be kɛ bei amli lɛ, ebaakai wɔ akɛ esa akɛ mɔ klɛŋklɛŋ ni baawie lɛ kɛ sanebimɔ ni akala lɛ hetoo ni yɔɔ kuku, kɛ tɛ̃ɛ aha. Hetooi ni akɛfataa he ni jɛɔ toibolɔi lɛ aŋɔɔ lɛ baanyɛ agbala jwɛŋmɔ kɛya bɔ ni ŋmalɛi ni atsɛ lɛ kɔɔ he ehaa, kɛ sane naatsɔɔmɔ ni fiɔ sɛɛ loo sane lɛ kɛ nitsumɔ nɔ. Buu-Mɔɔ Nikasemɔ nɔkwɛlɔ lɛ kanyaa mɔ fɛɛ mɔ koni ekɛ ehe awo mli kɛtsɔ aŋkroaŋkro hesaamɔ kɛ weku mli hesaamɔ ni ewoɔ he hewalɛ lɛ nɔ.
5 Ákɛ “Yehowa kaselɔi lɛ,” wɔhiɛ sɔɔ ‘nikeenii ni ekɛha gbɔmɛi,’ tamɔ Buu-Mɔɔ Nikasemɔ nɔkwɛlɔi ni “bɔɔ . . . tsɔɔmɔ he mɔdɛŋ lɛ.”—Yes. 54:13; Efe. 4:8, 11; 1 Tim. 5:17.