Asafo Woloŋ Nikasemɔ he Gbɛjianɔtoo
Fa 1—Nikasemɔ Nɔkwɛlɔ lɛ Gbɛnaa Nii
1 Asafo Woloŋ Nikasemɔ tsuɔ gbɛfaŋnɔ ni he hiaa waa he nii yɛ Yehowa webii amumɔŋ hiɛyaa mli. Yɛ nyɔji ni jwere wɔhiɛ lɛ amli lɛ, wɔbaatao Asafo Woloŋ Nikasemɔ gbɛjianɔtoo lɛ fai sɔrɔtoi lɛ fɛɛ amli koni wɔsusu bɔ ni wɔɔfee wɔna he sɛɛ hu he. Yɛ enɛ mli lɛ wɔmiitao wɔgbala wɔjwɛŋmɔ kɛya bɔ ni woloŋ nikasemɔ nɔkwɛlɔ lɛ baaha nikasemɔ lɛ awo mɔ ekaa ni ewo hemɔkɛyeli hewalɛ eha lɛ nɔ.
2 Esa akɛ nɔkwɛlɔ lɛ asaa ehe jogbaŋŋ bɔni afee ni enitsɔɔmɔ lɛ amɔ shi. Akɛ mɔ ni kɛ ekaa kaseɔ Nyɔŋmɔ Wiemɔ lɛ, jeee akɛ esa akɛ ele sanebimɔi lɛ eko fɛɛ eko hetoo kɛkɛ, shi moŋ esa akɛ enu nɔ hewɔ ni nakai hetoo lɛ ja lɛ hu shishi. Esa akɛ emɔdɛŋbɔɔ afee akɛ ebaaye ebua mɛi fɛɛ yɛ nikasemɔ lɛ mli ni amɛle yiŋtoi ahewɔ ni ahaa nakai hetooi lɛ. (1 Pet. 3:15) Enɛ baaha hiɛsɔɔ ni amɛyɔɔ kɛha nɔ ni akaseɔ lɛ mli awa.
Otii Ni Sa Akɛ Ashɛ He Yɛ Nikasemɔ Lɛ Nɔkwɛmɔ Mli
3 Oti kome ni ma nɔkwɛlɔ lɛ hiɛ ji ni ekɛ sane ni yɔɔ nɔ ni akaseɔ lɛ mli lɛ atsu nii ni ekɛwo mɛi fɛɛ ni eba nikasemɔ lɛ ahemɔkɛyeli hewalɛ ni ekanya amɛ ni amɛsumɔ akɛ amɛaafee Nyɔŋmɔ suɔmɔnaa nii babaoo kɛmɔ shi. (Lala 110:3; 2 Tes. 1:3-5) Bɔni afee ni enyɛ efee enɛ lɛ, esa akɛ nɔkwɛlɔ lɛ awa yɛ hei ni sa koni eha otii ni tswaa tsuiŋ hekɛnɔfɔɔ yɛ Yehowa, e-Wiemɔ lɛ, kɛ egbɛjianɔtoo lɛ mli lɛ ‘anyɔ shi jogbaŋŋ.’ (Gal. 6:6. NW, Ref. Bi. Shishigbɛ niŋmaa.) Ebaanyɛ ekɛ sanebimɔi ni ekɛ ŋaa aaabi lɛ atsu nii ni ekɛha nɛkɛ otii ni tswaa hemɔkɛyeli emaa shi nɛɛ aje kpo kɛ be baaŋmɛ gbɛ.
4 Oti kroko hu ji ni eye ebua mɛi fɛɛ ni amɛna bɔ ni amɛaafee amɛkɛ emli sane lɛ atsu nii yɛ gbɛ pɔtɛɛ nɔ. Te amɛaafee tɛŋŋ amɛkɛtsu nii yɛ shiɛmɔ nitsumɔ lɛ mli? Ni amɛkɛwo nyɛmimɛi kɛ mɛi heei lɛ hu hewalɛ? Ni amɛkɛwo amɛweku lɛ kɛ amɛ diɛŋtsɛ amɛhe hewalɛ? Beni Asafo Woloŋ Nikasemɔ nɔkwɛlɔi saa amɛhe kɛhaa nikasemɔ fɛɛ nikasemɔ lɛ, esa akɛ amɛbɔ mɔdɛŋ ni amɛyoo bɔ ni abaanyɛ akɛ otii pɔtɛɛ komɛi ni yɔɔ nikasemɔ lɛ mli lɛ atsu nii aha yɛ gbɛi ni anyɛɔ atsuɔ he nii nɔ.
5 Abaanyɛ akɛ saji komɛi atsu nii ni akɛye abua wekumɛi, nanemɛi skulbii, kɛ nitsulɔi ni heee yeee. Saji lɛ ekrokomɛi baaye abua mɛi ni yɔɔ shiai ni mli egbala lɛ amli aloo mɛi ni yɔɔ fɔlɔ kome shiai amli lɛ. Nɔkwɛlɔ lɛ baaha mɛi ni eba nikasemɔ lɛ atsɔɔ amɛjwɛŋmɔ kɛtsɔ yelikɛbuamɔ ni ekɛaaha amɛ ni amɛsusu nii ahe ni amɛna bɔ ni amɛaafee amɛkɛ nɔ ni akaseɔ lɛ atsu nii diɛŋtsɛ lɛ nɔ. Esa akɛ nɔkwɛlɔ lɛ abɔ mɔdɛŋ ni eha nikasemɔ lɛ afee miishɛɛ ni eha eŋɔɔ fe sanebimɔ-kɛ-hetoo kɛkɛ ni akɛaasusu emli sane lɛ he.—Okɛto 1 Korintobii 14:9, 19 he.
Jiemɔ Miishɛɛ Kpo Yɛ Nyɛmimɛi Lɛ Ahe
6 Kɛji nɔkwɛlɔ lɛ jie miishɛɛ kpo yɛ mɛi fɛɛ ni yɔɔ kuu lɛ mli lɛ ahe lɛ, no lɛ ebaanyɛ ewo amɛ hewalɛ ni amɛkɛ amɛhe awo mli kɛmɔ shi. Abaanyɛ atsɔ hiɛ akɛ ŋmalɛi aha mɛi ni sheɔ gbeyei fioo lɛ ni amɛsaa amɛhe ni amɛkane, aloo abaaha amɛ Sanebimɔ ko kɛtsɔ hiɛ ni amɛsaa amɛhe ni amɛha hetoo. Esa akɛ mɔ fɛɛ mɔ abɔ mɔdɛŋ ni eha saji ahetoo yɛ lɛ diɛŋtsɛ ewiemɔ mli. Kɛji nɔkwɛlɔ lɛ bo saji ahetoo ni ahaa lɛ toi jogbaŋŋ lɛ, ebaanyɛ ena kɛji yelikɛbuamɔ he miihia mɛi pɔtɛɛ komɛi. Ebaanyɛ ekɛ kuu lɛ mlibii krokomɛi ni yɔɔ niiashikpamɔ lɛ atsu nii ni ekɛye ebua nakai mɛi aŋkroaŋkroi lɛ.
7 Asafo Woloŋ Nikasemɔ lɛ ji jɔɔmɔ kɛha wɔ. Ehaa wɔnaa hegbɛi ni wɔkɛkpeɔ yɛ kui bibii amli ni wɔnine shɛɔ yelikɛbuamɔ nɔ aŋkroaŋkro. Ekaba akɛ wɔɔbu lɛ akɛ no ji nɔ ni he ehiaaa fe fɛɛ yɛ kpeei krokomɛi lɛ ateŋ. Nyɛ Asafo Woloŋ Nikasemɔ nɔkwɛlɔ lɛ kɛ hiɛdɔɔ tsuɔ egbɛnaa nii lɛ he nii koni ekɛ nikasemɔ fɛɛ nikasemɔ atsu nii ni ekɛwo hemɔkɛyeli ni oyɔɔ yɛ Yehowa mli lɛ mli hewalɛ koni ekɛtswa hiɛsɔɔ ni Oyɔɔ kɛha mumɔŋ nibii ni Nyɔŋmɔ eto he gbɛjianɔ lɛ ema shi ni eya hiɛ.