Ná 1999 Teokrase Sɔɔmɔ Skul Gbɛjianɔtoo lɛ He Sɛɛ
1 Yesu ji Tsɔɔlɔ Nukpa lɛ. Gbɔmɛi ‘anaa kpɛ amɛhe yɛ enitsɔɔmɔ lɛ hewɔ.’ (Marko 1:22) Eyɛ mli akɛ wɔteŋ mɔ ko nyɛŋ awie ni etsɔɔ nii tamɔ Yesu moŋ, shi wɔbaanyɛ wɔbɔ mɔdɛŋ ni wɔkase lɛ. (Bɔf. 4:13) Teokrase Sɔɔmɔ Skul gbɛjianɔtoo lɛ ni wɔkɛ wɔhe aaawo mli lɛ baaye ebua wɔ koni wɔshɛ oti nɛɛ he, ni wɔya nɔ jogbaŋŋ yɛ wɔwiemɔ kɛ nitsɔɔmɔ hesaai amli.
2 Yɛ afi 1999 afi lɛ mli lɛ, Nifeemɔ ni Ji 1 lɛ, baadamɔ saji ni yɔɔ 1997 Buu-Mɔɔ lɛ kɛ Awake! woji tɛtrɛbii lɛ anɔ. Wɔ niiashishinumɔ yɛ mumɔŋ saji ahe lɛ baaya hiɛ waa diɛŋtsɛ, kɛji akɛ wɔkane nɛkɛ saji nɛɛ kɛtsɔ hiɛ, ni agbɛnɛ hu wɔbo toi yɛ skul gbɛjianɔtoo lɛ mli lɛ. Esa akɛ mɛi ni akɛ tsɔsemɔ wiemɔ nifeemɔi nɛɛ ewo amɛdɛŋ lɛ atsɔɔ bɔ ni aaafee akɛ sane lɛ atsu nii, ni aha efee nɔ ni yɔɔ miishɛɛ, ni ŋɔɔ hu. Nifeemɔ ni Ji 3 lɛ baadamɔ Weku Miishɛɛ wolo lɛ nɔ, ni Nifeemɔ ni Ji 4 lɛ baadamɔ Biblia mli gbɔmɔ ko nɔ, eyɛ mli akɛ ekolɛ abaatsake sane ni yɔɔ nifeemɔ nɛɛ mli moŋ. Esa akɛ skul nɔkwɛlɔ lɛ asusu sane lɛ he jogbaŋŋ dani ekɛha mɛi lɛ. Esa akɛ nikaselɔi fɛɛ ni akɛ nifeemɔ ni jɛ Weku Miishɛɛ wolo lɛ mli lɛ haa amɛ lɛ afee mɛi ni feɔ nɔkwɛmɔnɔ kpakpa yɛ amɛ diɛŋtsɛ amɛweku shihilɛ mli.
3 Okɛ Ŋaawoo Atsu Nii, Koni Osaa Ohe Jogbaŋŋ: Mɔ fɛɛ mɔ baanyɛ aya hiɛ lolo yɛ wiemɔ kɛ nitsɔɔmɔ he ŋaa mli. (1 Tim. 4:13) Enɛ hewɔ lɛ esa akɛ wɔbi ŋaawoo, ni wɔkasusu akɛ eji nɔ ko ni he ehiaaa. (Abɛi 12:15; 19:20) Anɔkwale lɛ ni akɛaaha ni emɔ shi yɛ kpeei ashishi lɛ kɛ agbɛnɛ hu yɛ shiɛmɔ nitsumɔ lɛ mli lɛ biɔ babaoo fe ni aaawie otii lɛ ahe aloo akane ŋmalɛi lɛ kɛkɛ tamɔ kusum nifeemɔ ko. Esa akɛ wɔshɛ mɛi atsuii ahe, ni wɔkanya mɛi ni boɔ toi lɛ. Wɔbaanyɛ wɔfee enɛ kɛtsɔ anɔkwale lɛ ni wɔɔwie kɛ nɔmimaa kɛjɛ wɔtsui mli lɛ nɔ. (Okɛto Bɔfoi lɛ Asaji 2:37 he.) Ŋaawoo ni wɔnine shɛɔ nɔ yɛ skul lɛ mli lɛ, baaye ebua wɔ koni wɔtsu enɛ he nii.
4 Kɛ onine shɛ nifeemɔ ko nɔ lɛ, susumɔ wiemɔ sui ni esa akɛ otsu he nii lɛ he, taakɛ atsɔɔ mli yɛ School Guidebook lɛ mli lɛ. Susumɔ nɔ ni he hiaa akɛ ofee koni okɛ tsutsu ŋaawoo ni akɛha bo lɛ atsu nii lɛ he. Jwɛŋmɔ osane yitso lɛ he waa, bɔ ni obaafee lɛ oha, kɛ aaabi nakai yɛ odɛŋ, kɛ gbɛ nɔ ni oootsɔ okɛ ŋmalɛi ni yɔɔ osane lɛ mli lɛ baatsu nii oha lɛ he jogbaŋŋ. Susumɔ bɔ ni ooofee okɛ sane lɛ atsu nii ni okɛtsɔɔ nii ni okɛkanya mɛi lɛ he jogbaŋŋ bɔ ni ooonyɛ.—1 Tim. 4:15, 16.
5 Kɛ ooshe gbeyei akɛ okɛ ohe aaawo skul lɛ mli lɛ, sɔlemɔ yɛ he, ni okɛ oskul nɔkwɛlɔ lɛ asusu ohenumɔi lɛ ahe. Mɔ fɛɛ mɔ baanyɛ aná Teokrase Sɔɔmɔ Skul lɛ he sɛɛ yɛ afi 1999 mli kɛtsɔ gbɛjianɔtoo lɛ ní ekɛ ehe aaawo mli kɛmɔ shi lɛ nɔ.