Nyɛkɛ Woji Memeji lɛ Atsua Nii Jogbaŋŋ Kɛmɔ Shi
1 Gbɔmɔ kɛ woji memeji akpekpei abɔ eto wojiatoohei yɛ shikpɔŋ lɛ nɔ he fɛɛ he. Kɛlɛ, mɛɛ sɛɛnamɔ ni sɛɛ tsɛɔ etsɔ kɛha adesai aweku lɛ? (Jaj. 12:12) Woji ni gbalaa jwɛŋmɔ kɛyaa Nyɔŋmɔ Maŋtsɛyeli lɛ kɛ nɔ ni ebaafee eha adesai lɛ nɔ lɛ ajara wa babaoo. Asafoi babaoo yɛ nakai woji ni akala dani afi 1985 shɛ lɛ srɔtoi yɛ amɛnine nɔ. Yɛ January mli lɛ, wɔkɛ nɛkɛ woji memeji nɛɛ baaha maŋbii lɛ.
2 Amɛhe yɛ Sɛɛnamɔ Diɛŋtsɛ: Yɛ be mli ni wɔteŋ mɛi komɛi baanyɛ anu he akɛ nɛkɛ woji nɛɛ be eho kɛ́ akɛmiito wɔwoji heei lɛ ahe lɛ, esa akɛ wɔkai akɛ Ŋmalɛ naa anɔkwalei yɛ mli. Maŋtsɛyeli shɛɛ sane ni amɛtsɔɔ mli ŋmɛnɛ lɛ he yɛ sɛɛnamɔ lolo, ni kɛ́ abo toi lɛ, ebaanyɛ ehere mɔ yiwala. (Yoh. 17:3) No hewɔ lɛ, esa akɛ wɔbɔ mɔdɛŋ waa koni wɔkɛ woji memeji nɛɛ atsu nii jogbaŋŋ kɛmɔ shi.
3 Yoo ko ni ná Buu Mɔɔ Asafo lɛ woji memeji lɛ babaoo kɛjɛ enaa ŋɔɔ ákɛ gboshinii lɛ niiashikpamɔ maa bɔ ni amɛhe yɔɔ sɛɛnamɔ lɛ nɔ mi. Odasefonyo ko bi yoo lɛ kɛji ele sɛɛnamɔ diɛŋtsɛ ni yɔɔ woji lɛ ahe lo. Yoo lɛ to he eha lɛ akɛ: “Mileee amɛhe sɛɛnamɔ, shi te mafee tɛŋŋ male hu?” Yoo lɛ kpɛlɛ Biblia mli nikasemɔ nɔ, eba anɔkwale lɛ mli ni no sɛɛ lɛ, ebana akɛ enaa wojiatoohe lɛ mli woji lɛ ajara wa waa diɛŋtsɛ. Mɛɛ gboshinii ni he yɔɔ sɛɛnamɔ nakai woji ni abua naa lɛ bafee nɛkɛ!
4 Nyɛjaa: Kɛfata woji memeji lɛ ni okɛaaha yɛ shia kɛ shia lɛ he lɛ, kwɛmɔ ni okɛha yɛ be mli ni ofeɔ sɛɛsaramɔi yɛ mɛi ni ole akɛ amɛnáa wɔwoji lɛ akanemɔ he miishɛɛ lɛ aŋɔɔ, kɛ mɛi ni shɛɔ Buu-Mɔɔ kɛ Awake! lɛ kɛ mɛi ni okɛ woji tɛtrɛbii lɛ haa daa lɛ. Kɛha mɛi ni okɛkaseɔ Biblia lɛ, woji memeji ni ahala lɛ baanyɛ ekɛ shishijee nilee ko ni baaha amɛniiashishinumɔ yɛ anɔkwale lɛ he lɛ mli alɛɛ aha amɛ. Kaaha ohiɛ miikpa nɔ akɛ oooná woji memeji ni bɛ nɔ ni obua naa lɛ mli lɛ eko. Yɛ nɛkɛ gbɛ nɔ lɛ, obaana teokrase wojiatoohe ni he yɔɔ sɛɛnamɔ babaoo, ni obaanyɛ okɛtsu nii ni okɛha oteemɔŋ nikasemɔ bei lɛ aya hiɛ.
5 Yɛ nɔ najiaŋ ni wɔɔha wɔwoji memeji lɛ ahi wojiatoohe lɛ, nyɛhaa wɔkɛtsua nii jogbaŋŋ kɛmɔa shi ní wɔkɛkanya mɛi ni wɔkɛkpeɔ lɛ koni ‘amɛshe anɔkwa Nyɔŋmɔ lɛ gbeyei ni amɛye ekitai lɛ anɔ.’—Jaj. 12:13.