Fɔ̃ɔ Nine Otsɛ́ Amɛ ní Amɛba
1 Ninefɔ̃ɔ ko ni akɛha yɛ afii ohai abɔ komɛi ni eho lɛ miijije bianɛ yɛ shikpɔji 233 nɔ yɛ jeŋ fɛɛ: “Nyɛbaa ni wɔyakwɔa Yehowa gɔŋ lɛ, . . . koni etsɔɔ wɔ egbɛ̀i lɛ, ni wɔnyiɛ etempɔŋi lɛ anɔ!” (Yes. 2:3) Yehowa gbɛjianɔtoo lɛ ní wɔɔtsɔɔ gbɔmɛi agbɛ kɛya mli lɛ ji gbɛ ni hi fe fɛɛ ni wɔbaanyɛ wɔtsɔ nɔ wɔye wɔbua amɛ koni amɛná mumɔŋ nɔyaa ni kɛmɔ yaa naanɔ wala mli.
2 Ekolɛ shiɛlɔi komɛi baashashao shi akɛ amɛbaafɔ̃ mɛi anine kɛba Maŋtsɛyeli Asa lɛ nɔ kɛyashi be mli ni amɛaajie nɔyaa kpo yɛ shia Biblia mli nikasemɔ he dã. Shi kɛlɛ, bei komɛi lɛ, gbɔmɛi jeɔ shishi amɛyaa asafoŋ kpeei po dani akɛ amɛ jeɔ Biblia mli nikasemɔ shishi. Esaaa akɛ wɔshashaoɔ shi akɛ wɔkɛ miishɛɛ aaafɔ̃ mɛi anine, ni wɔwo amɛ hewalɛ koni amɛba kpeei.
3 Nɔ ni Esa akɛ Ofee: Okɛ dɛhiɛmɔ woji ni akɛtswaa mɛi adafi yɛ he ni wɔkpeɔ yɛ lɛ atsu nii jogbaŋŋ. Kɛɛmɔ akɛ, afeɔ nakai kpeei lɛ yaka ni aheee too yɛ mɔ ko mɔ ko dɛŋ. Tsɔɔmɔ bɔ ni afeɔ kpeei lɛ ahaa lɛ mli. Tsɔɔmɔ akɛ amɛji Biblia mli nikasemɔi diɛŋtsɛ, ni akɛ, akɛ nɔ ni akaseɔ lɛ haa mɔ fɛɛ mɔ koni enyiɛ sɛɛ. Tsĩi hei srɔtoi kɛ shihilɛi srɔtoi amli ni mɛi ni baa lɛ yɔɔ mli lɛ tã. Tsĩi tã akɛ amɛji gbɔmɛi ni jɛ akutso lɛ mli, ni akɛ, ahereɔ gbekɛbii ni eye afii srɔtoi lɛ fɛɛ hiɛmɛɛ. Esa akɛ wɔfɔ̃ mɛi ni wɔkɛkaseɔ nii lɛ anine, ni wɔkɛɛ amɛ akɛ wɔbaaye wɔbua amɛ yɛ gbɛ fɛɛ gbɛ nɔ koni amɛba.
4 Nibii ni aŋmala ashwie shi yɛ Biblia lɛ mli lɛ ateŋ naagbee nɔ kome ji ninefɔ̃ɔ ni miishɛɛ yɔɔ mli koni akɛbaná Yehowa wala nikeenii lɛ mli gbɛfaŋnɔ lɛ: “Ni Mumɔ lɛ kɛ ayemforo lɛ kɛɔ akɛ: Ba! . . . Ni mɔ ni sumɔɔ lɛ, ha ni ebayɛ wala nu lɛ yaka.” (Kpoj. 22:17) Anyɛŋ akɛ nɔ ko ato mɛi krokomɛi anine ní aaafɔ̃ koni amɛba wɔkpeei ashishi lɛ najiaŋ.
5 Yesaia 60:8 feɔ yijielɔi heei akpei ohai abɔ ni miiba Nyɔŋmɔ webii asafoi lɛ mli bianɛ akɛ okpoi ni “filikiɔ tamɔ atatu, loo tamɔ okpoi ni baa amɛsamfɛjiaŋ nɛɛ” lɛ gbalɛ he mfoniri. Wɔ fɛɛ wɔbaanyɛ wɔfɔ̃ mɛi heei anine kɛba wɔkpeei ashishi ni wɔha amɛhiɛ amɛ. Kɛtsɔ nɛkɛ gbɛ nɔ lɛ, wɔkɛ Yehowa baafee ekome yɛ be mli ni ewoɔ henaabuamɔ nitsumɔ lɛ foi lɛ.—Yes. 60:22.