Wó Yehowa Gbɛi ni Yɔɔ Nyam lɛ Nɔ Gojoo
1 Satan ba Nyɔŋmɔ gbɛi lɛ shi beni eha wɔ klɛŋklɛŋ fɔlɔi lɛ fee esha lɛ. Abonsam tsɔ gbɛ ni yɔɔ nigii nɔ ni etsɔɔ akɛ Yehowa elaka Adam. (1 Mose 3:1-5) Akɛni Nyɔŋmɔ gbɛi lɛ shishinumɔ tsɔɔ akɛ etsuɔ ewiemɔ he nii hewɔ lɛ, nɔ ni Satan kɛɛ lɛ ji naafolɔmɔ ni ehiii fe fɛɛ. Yehowa etsɔ eyiŋtoo he nitsumɔ nɔ fiofio ni ekɛjie heguɔgbee ni akɛba egbɛi lɛ nɔ lɛ, ni eha eba nyam.—Yes. 63:12-14.
2 Wɔ ji gbɔmɛi ni Yehowa ‘kɛ egbɛi lɛ ewo’ amɛ lɛ. (Bɔf. 15:14, 17) Enɛ haa wɔ hegbɛ koni wɔkwɛ gbɛ ni wɔɔtsɔ nɔ wɔtse egbɛi lɛ he. Wɔnaa akɛ Yehowa gbɛi lɛ yɛ nyam lɛɛlɛŋ, yɛ bɔ ni edamɔ shi eha nibii kpakpai fɛɛ lɛ hewɔ, tamɔ mlihilɛ, suɔmɔ, mɔbɔnalɛ, kɛ jalɛ. Nyɔŋmɔ anunyam gbɛi lɛ ni kwɔ gojoo lɛ haa ŋmiŋmi mɔmɔɔ wɔ. (Lala 8:2; 99:3; 148:13) Mɛni esa akɛ enɛ atsirɛ wɔ koni wɔfee?
3 Tse Nyɔŋmɔ Gbɛi lɛ He: Mɔ ko nyɛŋ eha Nyɔŋmɔ gbɛi lɛ afee krɔŋkrɔŋ fe bɔ ni eji amrɔ nɛɛ. Shi wɔbaanyɛ wɔtsɔ wɔjeŋba ni he tse kɛ Maŋtsɛyeli lɛ shiɛmɔ nɔ wɔtsɔɔ akɛ wɔwóɔ Nyɔŋmɔ gbɛi lɛ nɔ gojoo waa diɛŋtsɛ. Nyɛhaa wɔbɔa oshe wɔkɛa akɛ: “Nyɛdaa Yehowa shi, nyɛtsɛa egbɛi lɛ! Nyɛhaa alea enifeemɔ nii lɛ yɛ majimaji lɛ ateŋ, nyɛjajea akɛ awó egbɛi lɛ nɔ!” (Yes. 12:4) Mɛɛ gbɛ nɔ wɔɔtsɔ wɔfee enɛ?
4 Wɔbaanyɛ wɔŋɔ hegbɛ fɛɛ hegbɛ ni wɔɔná lɛ koni wɔkɛjaje Yehowa gbɛi lɛ kɛ nɔ fɛɛ nɔ ni edamɔ shi kɛha lɛ wɔtsɔɔ. Kɛ́ kɛtsɔ shiɛmɔ tɛ̃ɛ nɔ aloo yɛ trukaa odaseyeli nɔ jio, shia kɛ shia aloo shwapo kɛ shwapo naa jio, gbɛjegbɛi aloo yɛ tɛlifoŋ nɔ jio, wɔkɛ wɔshiɛmɔ nitsumɔ lɛ woɔ Yehowa hiɛ nyam. Kɛ́ wɔná mɛi ni yɔɔ wiemɔ lɛ he miishɛɛ ni amɛbo toi lɛ, esa akɛ wɔto gbɛjianɔ jogbaŋŋ ni wɔku sɛɛ wɔyasara amɛ ni wɔtsɔɔ amɛ Yehowa he nii babaoo. No tsɔɔ akɛ esa akɛ wɔye gbɛjianɔ ni wɔtoɔ akɛ wɔbaaya amɛŋɔɔ lɛ nɔ, ni wɔmia wɔhiɛ ni wɔje shia Biblia mli nikasemɔ shishi. Miishɛɛ sane ji akɛ, daa afi lɛ gbɔmɛi akpei ohai abɔ baa amɛbaleɔ Yehowa anunyam gbɛi lɛ, ni amɛkɛ woo haa lɛ, ni amɛtseɔ he.
5 Wɔtsuiŋ fɛɛ ní wɔɔjɛ koni wɔkɛ wɔhe awo Nyɔŋmɔ gbɛi lɛ hetsemɔ nitsumɔ nɛɛ mli lɛ baatsɔɔ wɔshidaamɔ faŋŋ yɛ sane ni Satan tee lɛ shi yɛ Eden lɛ mli. Enɛ ji nitsumɔ ni woo kɛ bulɛ yɔɔ mli fe fɛɛ ni wɔbaanyɛ wɔtsu. Nyɛhaa wɔwóa Yehowa anunyam gbɛi lɛ nɔ gojoo diɛŋtsɛ ni wɔkɛ ekãa ajie yi!—1 Kron. 29:13.