Nyɔŋmɔ Gbɛi lɛ ni Aaaha Ale
1. Mɛɛ hewalɛ Nyɔŋmɔ gbɛi lɛ ni aaatsɔ nikasemɔ nɔ ale lɛ baanyɛ aná yɛ mɛi anɔ?
1 Beni okase Nyɔŋmɔ gbɛi lɛ klɛŋklɛŋ kwraa lɛ, te ofee onii oha tɛŋŋ? Bɔ ni mɛi babaoo fee amɛnii amɛha lɛ tamɔ bɔ pɛ ni yoo ko fee enii eha beni ekɛɛ akɛ: “Beni mina Nyɔŋmɔ gbɛi lɛ klɛŋklɛŋ kwraa yɛ Biblia lɛ mli lɛ, mifó. Ekanya mi waa akɛ miná mile akɛ manyɛ male Nyɔŋmɔ gbɛi diɛŋtsɛ ni mikɛtsu nii.” Yɛ egbɛfaŋ lɛ, Nyɔŋmɔ gbɛi lɛ ni etsɔ nikasemɔ nɔ ele lɛ ji nifeemɔ ko ni he hiaa ni eeetsɔ nɔ ekɛle Yehowa akɛ mɔ ko ni yɔɔ diɛŋtsɛ koni enyɛ etswa ekɛ lɛ teŋ wekukpaa ema shi.
2. Mɛni hewɔ ehe hiaa akɛ wɔtsɔɔ mɛi krokomɛi Yehowa he nii lɛ?
2 Mɛni Hewɔ Esa akɛ Aha Ale? Nɔ ni fata Nyɔŋmɔ gbɛi lɛ ní aaale lɛ he ji esui, eyiŋtoi, kɛ enifeemɔi. Yiwalaheremɔ hu fata he. Bɔfo Paulo ŋma akɛ: “Mɔ fɛɛ mɔ ni aaabo atsɛ́ [Yehowa, NW] gbɛi lɛ, aaahere eyiwala.” Paulo tsɔɔ mli akɛ, shi ‘te aaafee tɛŋŋ ni amɛaabo amɛtsɛ́ lɛ,’ ákɛ ja amɛkase Yehowa he nii ni amɛná emli hemɔkɛyeli klɛŋklɛŋ kwraa lɛ? No hewɔ lɛ, ehe miihia ni Kristofoi aha mɛi krokomɛi ale Nyɔŋmɔ gbɛi lɛ kɛ nɔ fɛɛ nɔ ni edamɔ shi kɛha. (Rom. 10:13, 14) Shi kɛlɛ, yiŋtoo titri ko waa yɛ hewɔ ni esa akɛ aha ale Nyɔŋmɔ gbɛi lɛ.
3. Mɛni ji yiŋtoo titri hewɔ ni wɔshiɛɔ lɛ?
3 Yɛ afi 1920 afii lɛ amli lɛ, Nyɔŋmɔ webii lɛ yɔse jeŋ muu sane ni kɔɔ jeŋ muu fɛɛ maŋtsɛ ni Nyɔŋmɔ ji lɛ bembuu kɛ egbɛi lɛ hetsemɔ lɛ he lɛ kɛjɛ Ŋmalɛi lɛ amli. Dani Yehowa baakpata mɛi fɔji lɛ ahiɛ, ni ekɛjie ahorabɔɔ babaoo ni akɛba egbɛi lɛ nɔ lɛ kɛya lɛ, esa akɛ ‘aha ale’ anɔkwale ni kɔɔ ehe lɛ “yɛ shikpɔŋ muu lɛ fɛɛ nɔ!” (Yes. 12:4, 5; Ezek. 38:23) No hewɔ lɛ, yiŋtoo titri hewɔ ní wɔshiɛɔ lɛ ji ni wɔjie Yehowa yi yɛ faŋŋ mli ni wɔtse egbɛi lɛ he yɛ gbɔmɛi fɛɛ hiɛ. (Heb. 13:15) Suɔmɔ ni wɔyɔɔ kɛha Nyɔŋmɔ kɛ wɔnanemɛi gbɔmɛi baatsirɛ wɔ ni wɔná nitsumɔ ni Nyɔŋmɔ kɛwo wɔdɛŋ koni wɔtsu nɛɛ mli gbɛfaŋnɔ kɛmɔ shi.
4. Akɛ Nyɔŋmɔ gbɛi lɛ yɔseɔ Yehowa Odasefoi yɛ mɛɛ gbɛ nɔ?
4 ‘Maŋ ko Kɛha Egbɛi Lɛ’: Wɔŋɔ gbɛi ni ji Yehowa Odasefoi lɛ wɔfɔ̃ wɔnɔ yɛ afi 1931 mli. (Yes. 43:10) Kɛjɛ nakai beaŋ kɛbaa nɛɛ lɛ, Nyɔŋmɔ webii eha ale Nyɔŋmɔ gbɛi lɛ kɛyashɛ he ko akɛ Proclaimers wolo lɛ tsɔɔ mli yɛ baafa 124 akɛ: “Yɛ je lɛŋ fɛɛ lɛ, ayɔseɔ mɔ fɛɛ mɔ ni kɛ Yehowa gbɛi lɛ fɔɔ nitsumɔ lɛ oya nɔŋŋ akɛ Yehowa Odasefoi lɛ ateŋ mɔ kome.” Ani ayɔseɔ bo nakai? Esa akɛ hiɛsɔɔ ni wɔyɔɔ kɛha Yehowa ekpakpafeemɔ lɛ atsirɛ wɔ ni ‘wɔjie egbɛi lɛ yi,’ ni wɔwie ehe be fɛɛ be ní hegbɛ aaaba.—Lala 20:8; 145:1, 2, 7.
5. Bɔ ni wɔbaa wɔjeŋ wɔhaa lɛ kɔɔ Nyɔŋmɔ gbɛi ni kã wɔnɔ lɛ he yɛ mɛɛ gbɛ nɔ?
5 Ákɛ ‘maŋ kɛha egbɛi lɛ,’ esa akɛ wɔba wɔjeŋ yɛ tɛi ni efolɔ eshwie shi lɛ anaa. (Bɔf. 15:14; 2 Tim. 2:19) Bei pii lɛ, nɔ̃ klɛŋklɛŋ ni mɛi yɔseɔ yɛ Yehowa Odasefoi ahe ji amɛjeŋba kpakpa lɛ. (1 Pet. 2:12) Wɔsumɔŋ akɛ wɔgbe Nyɔŋmɔ gbɛi lɛ he guɔ kɔkɔɔkɔ kɛtsɔ wɔhiɛ ni wɔɔku wɔshwie eshishitoo mlai lɛ anɔ loo kɛtsɔ ejamɔ lɛ ní wɔkɛaaye gbɛhe ni ji enyɔ yɛ wɔshihilɛ mli lɛ nɔ. (3 Mose 22:31, 32; Mal. 1:6-8, 12-14) Yɛ no najiaŋ lɛ, eba akɛ wɔshihilɛ gbɛ aaatsɔɔ akɛ wɔbuɔ hegbɛ ni wɔná akɛ wɔɔha Nyɔŋmɔ gbɛi lɛ akã wɔnɔ lɛ akɛ nɔ ko ni jara wa waa.
6. Mɛɛ hegbɛ wɔbaanyɛ wɔná mli ŋɔɔmɔ amrɔ nɛɛ kɛ agbɛnɛ kɛmiiya naanɔ?
6 Ŋmɛnɛ, wɔmiina akɛ Yehowa sanejajemɔ lɛ miiya nɔ akɛ: “Kɛjɛ hulu shitee mli kɛyashi eshinyɔɔ mli lɛ migbɛi lɛ da yɛ jeŋmaji lɛ ateŋ.” (Mal. 1:11) Nyɛhaa wɔyaa nɔ wɔhaa alea anɔkwalei ni kɔɔ Yehowa he lɛ, ni ‘wɔjie egbɛi krɔŋkrɔŋ lɛ yi daa kɛya naanɔi anaanɔ.’—Lala 145:21.