Wolo Kasemɔ yɛ Skul kɛ Omumɔŋ Otii
1 Kɛ́ oná shishitoo kpakpa ni ji wolo kasemɔ kɛjɛ ogbekɛbiiashi lɛ, ebaanyɛ eha oná ŋaalee srɔtoi ni he hiaa kɛha nikanemɔ kɛ niŋmaa jogbaŋŋ, ni ebaaha ole shikpɔŋ lɛ, yinɔsane, akɔntaabuu, kɛ jeŋ nilee bɔ ni sa. Yɛ nakai beaŋ lɛ, obaanyɛ okase bɔ ni asusuɔ nii ahe jogbaŋŋ, bɔ ni amuɔ sane naa yɛ gbɛ ni ja nɔ, bɔ ni atsuɔ naagbai ahe nii, kɛ bɔ ni akɛ susumɔi tsuɔ nii ni haa ehe baa sɛɛnamɔ. Skulyaa ni tamɔ nɛkɛ lɛ baaye ebua bo jogbaŋŋ yɛ owala shihilɛ be fɛɛ mli. Wolo kasemɔ baanyɛ akɔ omumɔŋ otii yɛ shihilɛ mli lɛ he yɛ mɛɛ gbɛ nɔ, ni yɛ mɛɛ gbɛ nɔ ebaaye ebua bo koni oná “ŋaawoo ni hi kɛ jwɛŋmɔ”?—Abɛi 3:21, 22.
2 Ha Akɛ Bo Atsu Nii yɛ Nyɔŋmɔ Sɔɔmɔ lɛ Mli: Beni oyɔɔ skul lɛ, feemɔ toiboo kpakpa yɛ klas, ni otsu nibii ni akɛhaa bo ni oyatsu amɛhe nii yɛ shia lɛ ahe nii jogbaŋŋ. Kɛ́ oná nikanemɔ kɛ nikasemɔ su kpakpa lɛ, no lɛ obaanyɛ okase Nyɔŋmɔ Wiemɔ lɛ ni etɔŋ bo, ni ebaaha ohe awa yɛ mumɔŋ. (Bɔf. 17:11) Nilee ni fa baaye ebua bo koni onyɛ okɛ gbɔmɛi ni jɛ shihilɛi srɔtoi amli, ni sumɔɔ nibii srɔtoi, ni heɔ nibii srɔtoi amɛyeɔ lɛ agba sane yɛ be mli ni okɛ amɛ kpeɔ yɛ sɔɔmɔ nitsumɔ lɛ mli lɛ. Woloŋlee ni onáa yɛ skul lɛ he baaba sɛɛnamɔ yɛ be mli ni otsuɔ o-Kristofoi agbɛnaa nii ahe nii yɛ Nyɔŋmɔ gbɛjianɔtoo lɛ mli lɛ.—Okɛto 2 Timoteo 2:21; 4:11 he.
3 Kasemɔ Bɔ ni Ooofee Oye Obua Ohe: Kɛ́ otsu he nii jogbaŋŋ lɛ obaanyɛ okase ŋaa ni he hiaa kɛha shihilɛ yɛ be mli ni ogbe skul naa lɛ sɛɛ. (Okɛto 1 Timoteo 5:8 he.) Halamɔ nibii ni osumɔɔ akɛ okase lɛ jogbaŋŋ. Yɛ nɔ najiaŋ ni ooogbala ojwɛŋmɔ kɛya nitsumɔ ni enámɔ wa lɛ nɔ moŋ lɛ, susumɔ nitsumɔ ko ni oookase aloo ŋaalee ko ni oooná ni baaye ebua bo koni oná nitsumɔ ni sa yɛ he fɛɛ he lɛ he. (Abɛi 22:29) Tsɔsemɔ ni tamɔ nakai baaha onyɛ oye obua ohe kɛji akɛ okpɛ oyiŋ akɛ obaasɔmɔ yɛ he ni hiamɔ lɛ da yɛ lɛ.—Okɛto Bɔfoi lɛ Asaji 18:1-4 he.
4 Wolo kasemɔ bɔ ni sa ni aaaná yɛ be mli ni ayaa skul lɛ baanyɛ aye abua bo koni olɛɛ osɔɔmɔ nitsumɔ lɛ mli. Tsu nii waa koni oná ŋaalee srɔtoi ni he hiaa ni okɛbaaye obua ohe yɛ be mli ni oyaa hiɛ yɛ Yehowa sɔɔmɔ nitsumɔ lɛ mli lɛ. Enɛ baatsɔɔ akɛ oskulyaa lɛ baaye ebua bo koni oshɛ omumɔŋ otii lɛ ahe.