Susumɔ Yehowa Wiemɔ lɛ He Daa Gbi!
1 Gbi fɛɛ gbi kɛ kaa hee baa ohemɔkɛyeli lɛ nɔ. Ekolɛ onaanyo ni ji jeŋnyo ko kã he eenyɛ onɔ koni okɛ nuu ko aje kpo ni nyɛyajie nyɛhiɛtserɛ. Otsɔɔlɔ lɛ miisumɔ ni otiu heloonaa nitsumɔ sɛɛ, loo onitsumɔtsɛ lɛ miisumɔ ni okɛ ŋmɛlɛtswai babaoo atsu nii. Ekolɛ ogbɔmɔtsoŋ hewalɛnamɔ ebɔi shibaa. Eyɛ mli akɛ kai ni tamɔ nɛkɛ baanyɛ anina bo be fɛɛ be moŋ, shi ashiko okome. Yehowa efee klalo akɛ eeeha bo nilee ni he hiaa bɔni afee ni onyɛ okpee amɛnaa. Ní wɔɔsusu Biblia ŋmalɛi kɛ wiemɔi ni yɔɔ Ŋmalɛi lɛ Amli ni Wɔɔkwɛ lɛ he lɛ ji gbɛ kome nɔ ní wɔɔtsɔ ni wɔnine baanyɛ ashɛ Yehowa Wiemɔ lɛ nɔ daa. Ani oŋɔɔ hegbɛ ni nɛkɛ gbɛjianɔtoo nɛɛ kɛhaa lɛ ni okɛtsuɔ nii?
2 Yelikɛbuamɔ Yɛ: Yesaia 30:20 lɛ wieɔ Yehowa he akɛ “Tsɔɔlɔ Kpeteŋkpele” mɔ ŋɔɔ ni Nyɔŋmɔ webii baanyɛ aya kɛha yelikɛbuamɔ. Ehaa bo nɔ pɛ ni he hiaa bo koni onyɛ okpee ohemɔkɛyeli he kaai lɛ anaa. Yɛ mɛɛ gbɛ nɔ? Kuku ni nyiɛ sɛɛ lɛ tsɔɔ mli akɛ: “Otoii hu aaanu “wiemɔ” ko yɛ osɛɛ akɛ: ‘Gbɛ lɛ nɛ! nyɛnyiɛa nɔ!’” Ŋmɛnɛ, Yehowa wieɔ kɛtsɔɔ Ŋmalɛi lɛ kɛ “tsulɔ anɔkwafo” lɛ woji lɛ anɔ. (Mat. 24:45) Nilee babaoo yɛ tsutsu Buu-Mɔɔ pɛ amli, ni wieɔ Kristofoi ashihilɛ fãi fɛɛ ahe. Emli nɔ ni atsɛ yisɛɛ yɛ Ŋmalɛi lɛ Amli ni Wɔɔkwɛ Daa wolo lɛ mli lɛ yeɔ buaa bo koni otswa nilee nitoohe ko ni jara wa waa diɛŋtsɛ yɛ kaai srɔtoi lɛ fɛɛ ahe nitsumɔ mli oma shi.—Yes. 48:17.
3 Too Be He Gbɛjianɔ Kɛha No: Eyɛ mli akɛ daa leebi bafeɔ be ni dekã ko bɛ kwraa moŋ, shi nyɛ ko tswa efai shi akɛ eeekane ŋmalɛ lɛ ni ekɛ ebinuu lɛ asusu wiemɔi ni yɔɔ mli lɛ ahe be mli ni eyeɔ leebi nii lɛ. Nɛkɛ wiemɔi nɛɛ ni sɔlemɔ fata he lɛ ji naagbee wiemɔi ni enuɔ daa leebi dani eshiɔ kɛyaa skul. Amɛwaje lɛ koni ekpoo bɔlɛnamɔ mli nifeemɔi, koni ekɔ shidaamɔ ni yɔɔ shiŋŋ yɛ maŋ hedɔɔ mli, koni agbɛnɛ hu eye odase etsɔɔ nikaselɔi kɛ tsɔɔlɔi fɛɛ. Eyɛ mli akɛ lɛ pɛ eji Odasefonyo yɛ skul lɛ moŋ, shi ehe efeee shoo.
4 Kwɛmɔ Yehowa kɛ e-Wiemɔ lɛ gbɛ kɛha gbɛtsɔɔmɔ kɛ kudɔmɔ. Kɛji ofee nakai lɛ, ebaafee mɔ ni yɔɔ diɛŋtsɛ kɛha bo, tamɔ naanyo ko ni aheɔ lɛ ayeɔ. Yaa eŋɔɔ daa gbi! Ákɛ mɔ ni fata akpekpei abɔ ni yɔɔ je lɛŋ ni kwɛɔ Nyɔŋmɔ Wiemɔ lɛ mli daa lɛ ahe lɛ, eba akɛ ohiŋmɛii ‘aaatsɔ tamɔ hiŋmɛii ni naa Otsɔɔlɔ Kpeteŋkpele lɛ.’