Ani Oyɛ He-kɛ-Afɔleshaa Mumɔ Lɛ?
1 Esa akɛ hiɛsɔɔ ni wɔnáa wɔhaa nɔ ni Yesu Kristo tsu yɛ gbɛ ni pɛsɛmkunya bɛ mli nɔ kɛha adesai lɛ atsirɛ wɔ fɛɛ koni wɔkɛ hesaai, hewalɛ kɛ nyɛmɔi ni wɔyɔɔ lɛ atsu nii yɛ he-kɛ-afɔleshaa gbɛ nɔ. Ŋmalɛi lɛ woɔ wɔ hewalɛ akɛ: “Nyɛŋɔ nyɛgbɔmɔtsei lɛ nyɛdamɔ shi akɛ afɔle ní hiɛ kã ni he tse ní sa Nyɔŋmɔ hiɛ ní nyɛjamɔ lɛ afee mumɔŋ jamɔ.” (Rom. 12:1) Omli ni ooopɛi yɛ be kɛ bei amli lɛ baaye abua bo koni ona kɛji oojie nakai mumɔ lɛ kpo jogbaŋŋ lo bɔ ni bo diɛŋtsɛ oshihilɛi baaŋmɛ bo gbɛ.
2 Be Mli ni Otaoɔ Biblia Mli Nilee: Ani oto be ofɔ̃ shi kɛha oteemɔŋ Biblia kanemɔ kɛ ekasemɔ daa? Ani okɛ nakai be he gbɛjianɔtoo lɛ miitsu nii pɛpɛɛpɛ? Ani eji nɔ ko ni ofɔɔ feemɔ akɛ ooosaa ohe jogbaŋŋ kɛha asafoŋ kpeei? Kɛ weku yitso ji bo lɛ, ani okɛ oshiabii lɛ kaseɔ Biblia lɛ daa? Ekolɛ enɛɛmɛi ni ooofee lɛ baabi ni okɛ be ni okɛtaa shi okɛkwɛɔ tɛlivishiŋ loo be ni oyeɔ yɛ kɔmpiuta lɛ hiɛ loo yɛ nibii krokomɛi ni ofeɔ lɛ mli lɛ ashã afɔle. Shi kɛlɛ, mɛɛ afɔleshaa fioo enɛ ji nɛkɛ, kɛ́ oná ole akɛ be ni okɛkaseɔ Nyɔŋmɔ Wiemɔ lɛ baaye abua bo koni oná naanɔ wala lɛ!—Yoh. 17:3.
3 Yɛ Obii lɛ Atsɔsemɔ Mli: Be ni hi fe fɛɛ ni akɛaaje he-kɛ-afɔleshaa shihilɛ gbɛ shishi ji kɛjɛ gbekɛbiiashi. Tsɔɔmɔ obii lɛ akɛ, yɛ be mli ni be yɔɔ kɛha shwɛmɔ lɛ, esa akɛ aná be hu kɛha nitsumɔ kɛ teokrase nitsumɔi. (Efe. 6:4) Ha amɛ nitsumɔ ko ni he baaba sɛɛnamɔ yɛ shia lɛ mli. Too gbɛjianɔ oha amɛ daa koni amɛfata ohe kɛya shiɛmɔ. Ha nɔkwɛmɔnɔ kpakpa ni bo diɛŋtsɛ ofeɔ lɛ aha nii ni otsɔɔ lɛ amɔ shi.
4 Yɛ Asafoŋ Nitsumɔi Amli: Asafo lɛ yaa hiɛ kɛ́ mɔ fɛɛ mɔ ni yɔɔ mli lɛ miisumɔ ni ekɛ ehe ashã afɔle koni etsu nii ni he baaba sɛɛnamɔ aha mɔ fɛɛ mɔ. (Heb. 13:16) Ani obaanyɛ okɛ bei babaoo atsu nii yɛ Maŋtsɛyeli shiɛmɔ kɛ kaselɔ feemɔ nitsumɔ lɛ mli? Ani obaanyɛ okɛ ohe aha koni oye obua helatsɛmɛi loo mɛi ni egbɔlɔ lɛ, ekolɛ ni oooye obua amɛ koni amɛná tsɔne ni amɛbaata mli kɛba kpeei?
5 Dani Yesu kɛ ehe aaashã naagbee afɔle beni eji adesa lɛ, ewo ekaselɔi lɛ ŋaa koni amɛkɛ amɛhiɛ ama Maŋtsɛyeli lɛ he nibii anɔ, ní amɛkɛ nibii krokomɛi fɛɛ aye gbɛhe ni ji enyɔ. (Mat. 6:33) He-kɛ-afɔleshaa mumɔ ni tamɔ nɛkɛ sɛɛ ni wɔɔtiu lɛ baaha wɔná miishɛɛ babaoo yɛ be mli ni wɔyaa nɔ wɔkɛ mlifilimɔ sɔmɔɔ Yehowa lɛ.