“Wiemɔ ni Awie yɛ Be ni Sa Mli”
1 Ani efeɔ kaa kɛhaa bo akɛ ooogba mɛi krokomɛi wala he shɛɛ sane lɛ? Ani onuɔ he akɛ esa akɛ okɛɛ nɔ ko ni biɔ jwɛŋmɔŋ nilee babaoo dani oná otoibolɔi lɛ anɔ hewalɛ? Beni Yesu tsu ekaselɔi lɛ kɛtee lɛ, ekɛɛ amɛ akɛ: “Shi ni nyɛyaa nɛɛ, nyɛshiɛa nyɛkɛa akɛ: Ŋwɛi maŋtsɛyeli lɛ eshɛ shi etã.” (Mat. 10:7) Shɛɛ sane lɛ bɛ hwanyaŋŋ ni eyɛ mlɛo akɛ aaakɛɛ mɔ ko. Ebɛ srɔto kwraa ŋmɛnɛ.
2 Bei pii lɛ wiemɔi fioo komɛi pɛ he hiaa koni akɛje sanegbaa shishi. Beni Filipo kɛ Etiopia piafonyo lɛ kpe lɛ, ebi lɛ akɛ: “Ani oonu nɔ ni okaneɔ lɛ shishi lo?” (Bɔf. 8:30) Mɛɛ sanegbaa ni nyɔmɔwoo yɔɔ mli jɛ “wiemɔ ni awie yɛ be ni sa mli” lɛ mli kɛba nɛkɛ!—Abɛi 25:11.
3 Obaanyɛ okɛ nifeemɔ gbɛ ni tamɔ nɛkɛ nɔŋŋ atsu nii yɛ oshiɛmɔ nitsumɔ lɛ mli. Yɛ mɛɛ gbɛ nɔ? Kɛtsɔ yɔsemɔ ni oooyɔse nii jogbaŋŋ ni ohala wiemɔi ni sa shihilɛi lɛ nɔ. Bi sane, ni obo hetoo lɛ toi.
4 Sanebimɔi Komɛi ni Akɛjeɔ Shishi: Kɛ obaaje sanegbaa shishi lɛ, obaanyɛ oka sanebimɔi nɛɛ eko okwɛ:
◼ “Ani osɔleɔ Nuntsɔ lɛ Sɔlemɔ lɛ (loo, ‘Wɔtsɛ ni Yɔɔ Ŋwɛi’) yɛ ojamɔ mli?” (Mat. 6:9, 10) Kɛɛmɔ efã ko okwɛ, koni no sɛɛ lɛ okɛɛ akɛ: “Mɛi komɛi biɔ akɛ, ‘Mɛni ji Nyɔŋmɔ gbɛi ni Yesu kɛɛ aha ehe atse lɛ?’ Mɛi krokomɛi biɔ akɛ, ‘Mɛɛ Maŋtsɛyeli Yesu kɛɛ wɔsɔle wɔbi lɛ?’ Ani oná sanebimɔi nɛɛ ahetooi ni haa mɔ tsui nyɔɔ emli?”
◼ “Ani osusu he pɛŋ akɛ: ‘Mɛɛ shishinumɔ yɔɔ shihilɛ sɛɛ?’” Tsɔɔmɔ akɛ ekɔɔ Nyɔŋmɔ he nilee he.—Jaj. 12:13; Yoh. 17:3.
◼ “Ani osusuɔ akɛ be ko baaba ni abaajie gbele kɛya?” Okɛ Yesaia 25:8 kɛ Kpojiemɔ 21:4 aha hetoo ni anyɛɔ akɛ he fɔ̃ɔ nɔ.
◼ “Ani basabasafeemɔ ni yaa nɔ yɛ je lɛ mli lɛ naa tsabaa ni waaa yɛ?” Tsɔɔmɔ mli akɛ Nyɔŋmɔ tsɔɔ akɛ “suɔmɔ onaanyo.”—Mat. 22:39.
◼ “Ani nibii ahiɛkpatamɔ ko baajɛ ŋwɛiniiaŋ aba wɔshikpɔŋ nɛɛ nɔ gbi ko?” Gbaa mɛi krokomɛi shiwoo ni Biblia lɛ kɛhaa akɛ shikpɔŋ lɛ baahi shi kɛya naanɔ lɛ he sane.—Lala 104:5.
5 Okɛ sanekpakpa lɛ aha yɛ gbɛ ni yɔɔ mlɛo, ni yaa lɛ tɛ̃ɛ ni mlihilɛ yɔɔ mli lɛ nɔ. Yehowa baajɔɔ mɔdɛŋ ni obɔɔ koni okɛ anɔkwale “wiemɔ” ko aha mɛi krokomɛi lɛ nɔ.