Tɛlifoŋ nɔ Odaseyeli ní Yeɔ Omanye

¹ Oti ni ma wɔhiɛ akɛ Yehowa Odasefoi lɛ jeee ní wɔkɛ wɔhe awo sanekpakpa shiɛmɔ nitsumɔ lɛ mli kɛkɛ, shi moŋ ní wɔkɛ Maŋtsɛyeli lɛ he shɛɛ sane lɛ hu ashɛ mɔ fɛɛ mɔ ni wɔɔnyɛ lɛ ŋɔɔ. (Bɔf. 10:42; 20:24) Yɛ be mli ni shia kɛ shia nitsumɔ lɛ kã he eji gbɛ titri ni wɔtsɔɔ nɔ wɔnine shɛɔ gbɔmɛi lɛ anɔ lɛ, wɔyɔseɔ hu akɛ jeee gbɛ nɛɛ kɛ nitsumɔ jogbaŋŋ pɛ nɔ wɔtsɔɔ ni wɔnine shɛɔ mɔ fɛɛ mɔ nɔ. No hewɔ lɛ, bɔni afee ni ‘wɔgbe wɔsɔɔmɔ lɛ naa kwraa’ lɛ, wɔkɛ gbɛ̀i krokomɛi—ní tɛlifoŋ nɔ odaseyeli fata he—lɛ hu miitsu nii ní wɔkɛtao aŋkroaŋkroi ni tamɔ gwantɛŋi lɛ.—2 Tim. 4:5.

² Yɛ hei komɛi lɛ, gbɔmɛi yɛ tsũi ni abuɔ he waa mli, tsũi ni wekui babaoo yɔɔ mli, loo akutsei ni akɛ hebuu agbói etara naa, ní ewa akɛ akɛ he aaawo shia kɛ shia gbɛ̀i ni afɔɔ kɛ nitsumɔ ni nine kɛshɛɔ gbɔmɛi anɔ lɛ mli. Yɛ shikpɔŋkukuji ni wɔbaanyɛ wɔya shia kɛ shia yɛ jɛmɛ lɛ mli po lɛ, gbɔmɛi lɛ ateŋ mɛi babaoo bɛ shia. Shi kɛlɛ, shiɛlɔi babaoo miiye omanye yɛ gbɔmɛi nɛɛ ni amɛnine shɛɔ amɛnɔ kɛtsɔ tɛlifoŋ nɔ lɛ nɔ. Yɛ leebi shia kɛ shia shiɛmɔ ko ni gbalashihilɛ mli hefatalɔi komɛi kɛ amɛhe wo mli lɛ mli lɛ, amɛna akɛ mɛi nɛɛhu bɛ shia. Beni amɛku amɛsɛɛ kɛtee Maŋtsɛyeli Asa lɛ nɔ lɛ, amɛkwɛ mɛi ni bɛ shia lɛ a-tɛlifoŋ nɔmbai kɛtsɔ tɛlifoŋ nɔmbai awolo ni ato tɛlifoŋ nɔmbai kɛ adrɛs naa yɛ mli lɛ mli. Amɛtswa nakai nɔmbai lɛ ni amɛnine shɛ shiatsɛmɛi lɛ kpaanyɔ nɔ yɛ shia!

³ Ani oshashaoɔ shi akɛ okɛ tɛlifoŋ nɔ odaseyeli aaafata osɔɔmɔ nitsumɔ lɛ he? Nyɛmi nuu ko kpɛlɛ nɔ akɛ: “Misumɔɔɔ ni mɔ ko atswa mi tɛlifoŋ yɛ shia ni ebahɔɔ nɔ ko eha mi, no hewɔ lɛ, mihiɛ jwɛŋmɔ ni ejaaa momo yɛ nɛkɛ odaseyeli gbɛ nɛɛ he.” Shi kɛlɛ, beni etswa tɛlifoŋ shii enyɔ pɛ sɛɛ lɛ, ekɛɛ akɛ: “Miisumɔ! Misusuko dã akɛ enɛ baanyɛ aba, shi miisumɔ! Gbɔmɛi gbɔjɔɔ amɛhe yɛ tɛlifoŋ nɔ, ni onine nyɛɔ eshɛɔ nɔ fɛɛ nɔ ni he hiaa bo lɛ nɔ. Enɛ hi jogbaŋŋ!” Nyɛmi yoo ko jie su ni tamɔ nakai nɔŋŋ kpo, akɛ: “Mináaa tɛlifoŋ nɔ odaseyeli he miishɛɛ kwraa. Kɛ́ mawie anɔkwale lɛ, kulɛ misumɔɔ ni mafee nakai. Shi mika mikwɛ, ni mina akɛ ewoɔ yibii diɛŋtsɛ. Miyɛ sɛɛsaramɔi 37 ni jɛ tɛlifoŋ nɔ odaseyeli mli kɛ nikasemɔi babaoo fe bɔ ni manyɛ makwɛ nɔ!” Kɛ́ oosumɔ ni oka tɛlifoŋ nɔ odaseyeli okwɛ lɛ, no lɛ bo hu obaanyɛ oye omanye.

⁴ Tɛlifoŋ nɔ Odaseyeli He Gbɛjianɔtoo: Asafo lɛ mli odaseyeli nitsumɔ lɛ yɛ sɔɔmɔ nitsumɔ nɔkwɛlɔ lɛ nɔkwɛmɔ shishi. Bɔ fɛɛ bɔ ni hiamɔ lɛ ji lɛ, onukpai akuu lɛ baanyɛ ahala onukpa kroko loo asafoŋ sɔɔlɔ ko ní he esa koni ekɛ lɛ atsu nii ni amɛto tɛlifoŋ nɔ odaseyeli he gbɛjianɔ. Esa akɛ akɛ nyɛmi nuu ni kwɛɔ shikpɔŋkukuji anɔ lɛ hu afata he, ejaakɛ lɛ ebaaja shikpɔŋkukuji lɛ ni ebaabu nibii ahe akɔntaa. Nakai nɔŋŋ hu kpokpaa nɔkwɛlɔ lɛ baaná gbɛjianɔtoo lɛ hiɛyaa he miishɛɛ.

⁵ Kɛ́ hei komɛi yɛ nyɛshikpɔŋkuku lɛ mli ni anyɛɛɛ aye shia kɛ shia odase lɛ, no lɛ esa akɛ ato tɛlifoŋ shikpɔŋkukuji amli odaseyeli he gbɛjianɔ. Nyɛmi nuu ni akɛ nitsumɔ lɛ ewo edɛŋ lɛ baaŋmala adrɛs ni akɛbaawo nakai shikpɔŋkukuji, ní esa akɛ aha efee bibii bɔ ni sa koni anyɛ atsu amɛmli nii daa lɛ amli lɛ jogbaŋŋ. Esa akɛ akadi shikpɔŋkuku he mfonirii ni nɛkɛ hei nɛɛ yɔɔ nɔ lɛ, ni akadi akɛ ato hei pɔtɛɛ ní atsɔɔ nɛɛ kɛha tɛlifoŋ nɔ odaseyeli.

⁶ Nɛgbɛ obaanyɛ ona tɛlifoŋ nɔmbai lɛ yɛ? Kɛ́ tsũi ni abuɔ he waa lɛ yɛ amɛ diɛŋtsɛ amɛtɛlifoŋ nɔmbai awolo lɛ, no lɛ ekolɛ obaanyɛ ona nɔmbai lɛ kɛjɛ jɛmɛ. Kɛ jeee nakai lɛ, no lɛ abaanyɛ akwɛ wolo ni yɔɔ asa fioo lɛ nɔ lɛ mli ni aŋmala mɛi lɛ agbɛi ni akwɛ yɛ tɛlifoŋ nɔmbai awolo lɛ mli.

⁷ Onukpai lɛ baanyɛ aná nitsumɔ nɛɛ he miishɛɛ babaoo kɛtsɔ gbɛjianɔ ni amɛaato kɛha mɛi ni yɔɔ niiashikpamɔ yɛ tɛlifoŋ nɔ odaseyeli mli lɛ ni amɛtsɔse mɛi krokomɛi, ekolɛ kɛtsɔ Gbɛgbalɔi Yeɔ Buaa Mɛi Krokomɛi gbɛjianɔtoo lɛ nɔ lɛ nɔ. Yɛ be kɛ bei amli lɛ, abaanyɛ akɛ asafoŋ hiamɔ nii ni yɔɔ Sɔɔmɔ Kpee lɛ mli lɛ atsu nii ni akɛha nɛkɛ odaseyeli gbɛ nɛɛ he omanyeyeli lɛ aya hiɛ.

⁸ Kɛ́ onukpai lɛ yasara mɛi ni hela eha amɛka tsuŋ loo mɛi ni bɛ gbɔmɔtsoŋ hewalɛ lɛ, amɛbaanyɛ amɛwo mɛnɛɛmɛi hewalɛ ni amɛkɛ amɛhe awo tɛlifoŋ nɔ odaseyeli mli, kɛ́ eeehi. Ekolɛ, onukpa ko baanyɛ atswa tɛlifoŋ fioo ko yɛ be mli ni shiɛlɔ lɛ boɔ lɛ toi lɛ. Kɛkɛ lɛ, shiɛlɔ lɛ baanyɛ aná hegbɛ ni eeená akɛ eeetswa tɛlifoŋ lɛ mli ŋɔɔmɔ. Mɛi babaoo ni eje shishi yɛ nɛkɛ gbɛ nɔ lɛ kɛ minitii fioo pɛ tsuɔ nii daa gbi yɛ nitsumɔ nɛɛ mli, ni amɛsumɔɔ diɛŋtsɛ.

⁹ Ŋaawoi Kɛha Omanyeyeli: Beni Yesu tsu ekaselɔi lɛ ní amɛyashiɛ lɛ, “etsu amɛ enyɔnyɔ.” (Luka 10:1) Mɛni hewɔ? Ele akɛ kɛji amɛtsu nii yɛ ekomefeemɔ mli lɛ, amɛbaakase nii kɛjɛ mli ni amɛbaawo amɛhe hewalɛ. Nakai nɔŋŋ eji anɔkwale yɛ tɛlifoŋ nɔ odaseyeli he. Kɛ́ nyɛtsu nii akɛ hefatalɔi lɛ, nyɛbaanyɛ nyɛye nyɛbua nyɛhe, nyɛgba nɔ ni jɛ mli kɛba lɛ he sane, ni nyɛkɛ ŋaawoo ni abaanyɛ akɛgba sane be kroko lɛ aha. Beni nyɛtswa tɛlifoŋ ní nyɛwieɔ lɛ, nyɛbaanyɛ nyɛye nyɛbua nyɛhe kɛtao saji ni sa.

¹⁰ Bɔni afee ni oha ojwɛŋmɔ kɛ oniiahesusumɔ aya hiɛ lɛ, ta he ni obaanyɛ okɛ woji ní okɛyeɔ odase lɛ—ni ji Biblia lɛ, Reasoning wolo lɛ, Taoɔ wolo bibioo lɛ, woji tɛtrɛbii, kɛ ekrokomɛi ni fata he—lɛ ashwie shi jogbaŋŋ. Ŋmalamɔ shiɛmɔ wiemɔi komɛi oshwie shi, ni okɛfɔ̃ he ni obaanyɛ ona. Feemɔ klalo ni oŋmala saji ni ja ni yeɔ emuu, ni date kɛ be fata he lɛ oshwie shi bɔni afee ni ole be ni obaaya oyadi miishɛɛ ni ajie lɛ kpo lɛ sɛɛ.

¹¹ Bei pii lɛ, mɛi kwɛɔ amɛhe nɔ jogbaŋŋ kɛji amɛnu gbee ko ni amɛnuko dã yɛ tɛlifoŋ lɛ nɔ. No hewɔ lɛ, jiemɔ miishɛɛ, naanyobɔɔ su, kɛ ŋaa kpo. Shiatsɛ lɛ baadamɔ ogbee pɛ nɔ ni ekɛle osu kɛ bɔ ni oyɔɔ. Gbɔjɔmɔ ohe ni owie kɛjɛ otsui mli. Wiemɔ blɛoo kɛ faŋŋ kɛ gbee ni wa bɔ ni sa koni anu. Ŋmɛɛ shiatsɛ lɛ gbɛ koni ewie. Tsɛ ogbɛi fɛɛ, ni okɛɛ akɛ oyɛ akutso lɛ mli. Wɔsumɔɔɔ ni gbɔmɛi susuɔ akɛ wɔyeɔ jara yɛ tɛlifoŋ nɔ. Yɛ nɔ najiaŋ ni ooowie akɛ okɛ mɛi fɛɛ ni yɔɔ tsũ pɔtɛɛ ko mli lɛ miiwie lɛ, kɛɛmɔ akɛ okɛ lɛ pɛ miiwie.

¹² Tɛlifoŋ nɔ Shiɛmɔ Wiemɔi: Abaanyɛ atsake hiɛkpamɔ wiemɔi babaoo ni yɔɔ Bɔ ni Ajeɔ Biblia Mli Sanegbaa Shishi ni Atsaa Nɔ dɛhiɛmɔ wolo lɛ baafai 2-16 lɛ mli ní afee lɛ tɛlifoŋ nɔ odaseyeli. Obaanyɛ okɛɛ akɛ: “Miitswa bo yɛ tɛlifoŋ nɔ ejaakɛ minyɛɛɛ maba oŋɔɔ ni mana bo diɛŋtsɛ. Nɔ hewɔ ni mitswaa bo lɛ ji ni mabi ojwɛŋmɔ yɛ sanebimɔ ko ni yɔɔ miishɛɛ lɛ he.” No sɛɛ lɛ bi osane lɛ.

¹³ Abaanyɛ akɛ klɛŋklɛŋ shiɛmɔ wiemɔ ni yɔɔ “Awuiyeli/Shweshweeshwefeemɔ” shishi lɛ atsu nii yɛ nɛkɛ gbɛ nɔ: “Hɛloo. Migbɛi ji _____. Miyɛ akutso nɛɛ mli. Miisumɔ ni mama nɔ mi maha bo akɛ miyeee jara ko ni mifeee niiamlitaomɔ ko hu. Miitswa bo ejaakɛ misusuɔ sane ni kɔɔ shweshweeshwe ni mɔ ko aaafee lɛ he lɛ he. Awuiyeli babaoo ebɔle wɔ he, ni esaa wɔshihilɛi ahe. Ani osusuɔ akɛ be ko baashɛ ni gbɔmɛi fɛɛ baanyiɛ gbɛjegbɛi lɛ ahe gbɛkɛ ni amɛnu he akɛ amɛyɛ shweshweeshwe? [Ŋmɛɛ gbɛ ni ewie.] Ha makane nɔ ni Nyɔŋmɔ ewo shi akɛ ebaafee lɛ.”

¹⁴ Gbɛ ni yɔɔ tɛ̃ɛ ní akɛtsuɔ nii ni akɛfeɔ Biblia mli nikasemɔi yɛ tɛlifoŋ lɛ nɔ lɛ woɔ yibii kpakpai. Abaanyɛ afee nikasemɔ lɛ he nɔkwɛmɔnɔ yɛ minitii fioo ko mli. Kɛɛmɔ mɔ lɛ akɛ obaasumɔ ni oba eŋɔɔ yɛ eshia koni otsa nikasemɔ lɛ nɔ, loo kɛji mɔ lɛ shashao shi lɛ, kɛɛmɔ akɛ obaasumɔ ni otsa nikasemɔ lɛ nɔ yɛ tɛlifoŋ lɛ nɔ gbi kroko.

¹⁵ Kɛ́ omu sanegbaa lɛ naa lɛ, ha nɔ ko ni baaha onyɛ oyasara gbɔmɔ lɛ yɛ eshia loo okɛ wolo bibioo ko amaje lɛ lɛ ahi ojwɛŋmɔ mli. Kɛ́ mɔ lɛ shashao shi akɛ ekɛ e-adrɛs aaaha bo lɛ, no lɛ kɛɛmɔ lɛ akɛ obaasumɔ ni otswa lɛ ekoŋŋ. Ekolɛ, ebaabi ni nyɛwie yɛ tɛlifoŋ nɔ shii abɔ dani ehe baajɔ lɛ bɔ ni sa ni efɔ bo nine kɛba eshia.

¹⁶ Hegbɛ ní Aaaŋɔ Klɛŋklɛŋ: Nyɛmi yoo ko ni eye afii 15 je eleebi shiɛmɔ nitsumɔ lɛ shishi kɛ tɛlifoŋ tswaa. Ekɛ yoo ko wie, ni yoo lɛ kpɛlɛ akɛ ebaahe Nilee wolo lɛ. Beni nyɛmi yoo lɛ kɛ wolo lɛ tee shia lɛ, yoo lɛ sumɔ ni ele bɔ ni fee ni oblayoo lɛ le etɛlifoŋ nɔmba lɛ, ejaakɛ egbɛi bɛ wolo mli. Nyɛmi yoo lɛ tswa nɔmbai lɛ ni eleee! Yoo lɛ kpɛlɛ ni akɛ lɛ akase nii ni amrɔ nɛɛ eji shiɛlɔ ni abaptisiko lɛ.

¹⁷ Nyɛmi yoo ko hé tɛlifoŋ shikpɔŋkuku ko shi etsuuu mli nii otsii etɛ yɛ gbeyeishemɔ hewɔ. Mɛni wo lɛ hewalɛ ni ekɛje shishi? Ekai January 22, 1997, Awake! ni hiɛ saneyitso akɛ “When I Am Weak, Then I Am Powerful,” (Beni Migbɔjɔ lɛ, Kɛkɛ lɛ Miná Hewalɛ). Ekɔɔ Odasefonyo ko ni yɛ egbɔmɔtsoŋ gbɔjɔmɔi fɛɛ sɛɛ lɛ eshiɛɔ yɛ tɛlifoŋ nɔ lɛ he. Nyɛmi yoo lɛ kɛɛ akɛ: “Misɔle miha Yehowa ni mibi ni ewo mi hewalɛ. Mibi lɛ koni eha mi wiemɔi kpakpai ni mikɛfee mishiɛmɔ wiemɔi.” Mɛni jɛ eklɛŋklɛŋ tɛlifoŋ nɔ odaseyeli lɛ mli kɛba? Ebɔ amaniɛ akɛ: “Yehowa ha misɔlemɔ lɛ hetoo. Gbɔmɛi lɛ bo mi toi, ni mito sɛɛsaramɔ feemɔ he gbɛjianɔ.” Sɛɛ mli lɛ, Biblia mli nikasemɔ feemɔ jɛ etɛlifoŋ nɔ odaseyeli lɛ mli ba. Emu sane naa akɛ: “Yehowa etsɔɔ mi shi kome ekoŋŋ akɛ mikɛ mihe afɔ̃ enɔ shi jeee mi diɛŋtsɛ minɔ.”—Abɛi 3:5.

¹⁸ Anɔkwale lɛ ni akɛhaa kɛtsɔ tɛlifoŋ nɔ lɛ ebafee gbɛ ni atsɔɔ ashiɛɔ sanekpakpa lɛ yɛ omanyeyeli mli. Saamɔ ohe jogbaŋŋ, ni okɛ ohe awo mli kɛ otsui muu fɛɛ. Kɛji otswa tɛlifoŋ fioo ní abooo bo toi lɛ, kaaha onijiaŋ miije wui. Sɔlemɔ ni obi Yehowa gbɛtsɔɔmɔ, ni okɛ nibii ni oŋmala lɛ ato mɛi krokomɛi ni shiɛɔ yɛ gbɛ ni yɔɔ miishɛɛ nɛɛ nɔ lɛ anɔ̃ he. Akɛni wɔsumɔɔɔ ni wɔshiɔ mɔ ko yɛ wɔshikpɔŋkuku lɛ mli hewɔ lɛ, eba akɛ wɔɔtsu wɔshiɛmɔ nitsumɔ lɛ jogbaŋŋ kɛ hehiamɔ.—Rom. 10:13, 14.