Sanebimɔ he

◼ Ani esa akɛ wɔtsɔɔ gbɛjianɔtoo kɛha oniatsumɔ lɛ mli yɛ be mli ni wɔkɛ tɛlifoŋ yeɔ odase lɛ?

Kɛji akɛ wɔmiiye odase tɛ̃ɛ lɛ, no lɛ wɔbaanyɛ wɔgbála mli akɛ akɛ onia ni ajɛɔ suɔmɔ mli atsuɔ lɛ fĩɔ jeŋ muu fɛɛ Biblia kasemɔ nitsumɔ ni Yehowa Odasefoi tsuɔ lɛ sɛɛ, ni ákɛ wɔyɛ he miishɛɛ akɛ wɔɔkpɛlɛ oniatsumɔ ni tamɔ nɛkɛ nɔ. Shi kɛlɛ, esaaa akɛ atsĩɔ oniatsumɔ ko loo gbɛjianɔtoo kɛha oniatsumɔ lɛ tã kɛji akɛ aaye odase yɛ tɛlifoŋ nɔ, akɛni abaanyɛ anu enɛ shishi yɛ gbɛ ni ejaaa nɔ akɛ eji gbɛ ko ni atsɔɔ nɔ abaa shika kɛtsɔ tɛlifoŋ nɔ lɛ hewɔ. Yehowa Odasefoi asɔɔmɔ nitsumɔ lɛ jeee jarayeli yɛ gbɛ ko kwraa nɔ.—2 Kor. 2:17.

◼ Mɛni esa akɛ wɔfee kɛji akɛ mɔ ko bi ni Yehowa Odasefoi akatswa lɛ tɛlifoŋ dɔŋŋ beni wɔyeɔ odase yɛ tɛlifoŋ nɔ lɛ?

Esa akɛ akɛ bulɛ aha mɔ lɛ nibimɔ lɛ. Esa akɛ aŋma nɔ ko kuku ni tsɔɔ gbi nɔ ni mɔ lɛ kɛɛ akatswa lɛ tɛlifoŋ dɔŋŋ lɛ, ni akɛ egbɛi afata he, ni akɛwo shikpɔŋkuku lɛ wolo kotoku lɛ mli bɔni afee ni shiɛlɔi akatswa nakai nɔmba lɛ wɔsɛɛ ko. Shikome yɛ afi fɛɛ afi mli lɛ, esa akɛ akwɛ nibii ni aŋmala ashwie shi ni tsɔɔ mɛi ni bi koni wɔkatswa amɛ tɛlifoŋ dɔŋŋ lɛ amli. Yɛ sɔɔmɔ nɔkwɛlɔ lɛ gbɛtsɔɔmɔ naa lɛ, abaanyɛ aha shiɛlɔi ni he esa ni kɛ ŋaalee tsuɔ nii lɛ ayasara nɛkɛ mɛi nɛɛ koni ale bɔ ni amɛnuɔ he amɛhaa agbɛnɛ.—Kwɛmɔ Sanebimɔ He ni je kpo yɛ January 1994 Wɔ Maŋtsɛyeli Sɔɔmɔ lɛ mli lɛ mli.