Suɔmɔ Tsirɛɔ Wɔ Koni Wɔshiɛ
1 Ákɛ Yehowa Odasefoi lɛ, ale wɔ jogbaŋŋ akɛ Maŋtsɛyeli shɛɛ sane lɛ shiɛlɔi ni yɔɔ ekãa. (Mat. 24:14) Gbɔmɛi ni fa fe akpekpei ekpaa yɛ ekãa yɛ jeŋ fɛɛ; ni akɛ mɛi heei fataa he kɛji amɛbafata wɔhe yɛ shiɛmɔ nitsumɔ lɛ mli lɛ. Adamɔɔ mɛi abɔ ni kɛ amɛhe woɔ nitsumɔ nɛɛ mli lɛ anɔ abuɔ yibɔ lɛ he akɔntaa.
2 Mɛni tsirɛɔ wɔ koni wɔkɛ wɔhe aha kɛha nitsumɔ ní kaa mɔ nɛɛ? Anyɛɛɛ wɔ nɔ, akɛ heloonaa nii lakaaa wɔ, loo akɛ woo krɛdɛɛ ko haaa wɔ. Kɛjɛ shishijee lɛ, wɔteŋ mɛi babaoo she gbeyei ejaakɛ wɔnu he akɛ wɔsaaa, ni bei pii lɛ maŋ bii lɛ booo wɔ toi. (Mat. 24:9) Mɛi babaoo ni yɔɔ sɛɛ lɛ nyɛɛɛ anu nɔ ni tsirɛɔ wɔ lɛ shishi. Eka shi faŋŋ akɛ yiŋtoo ko ji nɔ ni tsirɛɔ wɔ ni wɔmiaa wɔhiɛ lɛ.
3 Hewalɛ ni Suɔmɔ Yɔɔ: Yesu tsɔɔ kitai lɛ ateŋ ewulu fe fɛɛ beni ewie akɛ ‘wɔsumɔ Yehowa kɛ wɔtsui fɛɛ kɛ wɔsusuma fɛɛ kɛ wɔjwɛŋmɔ fɛɛ kɛ wɔnyɛmɔ fɛɛ lɛ.’ (Mar. 12:30) Suɔmɔ ni wɔyɔɔ kɛha Yehowa lɛ damɔ hiɛsɔɔ henumɔi ní mli wa ní wɔyɔɔ wɔha mɔ ni eji kɛ nɔ ni eji—Nɔyelɔ kɛ Maŋtsɛ, nibii fɛɛ a-Bɔlɔ, mɔ ni ‘sa akɛ aŋɔ anunyam, agbojee, kɛ hewalɛ lɛ’ ahe lɛ nɔ titri. (Kpoj. 4:11) Anyɛŋ akɛ nɔ ko kwraa ato esui ni yɔɔ naakpɛɛ lɛ he.—2 Mose 34:6, 7.
4 Le ní wɔle Yehowa kɛ suɔmɔ ni wɔyɔɔ kɛha lɛ lɛ tsirɛɔ wɔ koni wɔha wɔla lɛ atso yɛ gbɔmɛi ahiɛ. (Mat. 5:16) Wɔla lɛ tsoɔ kɛji wɔjie eyi yɛ maŋ, wɔwie enaakpɛɛ nitsumɔi lɛ ahe, ni wɔgbɛ e-Maŋtsɛyeli lɛ he shɛɛ sane lɛ wɔshwã lɛ. Taakɛ bɔ ni ŋwɛibɔfo ni filikiɔ yɛ ŋwɛi teŋ lɛ ji lɛ, wɔhiɛ ‘naanɔ sanekpakpa ni wɔyaajaje wɔtsɔɔ jeŋmaŋ fɛɛ jeŋmaŋ kɛ akutso fɛɛ akutso kɛ majianɔ wiemɔi fɛɛ.’ (Kpoj. 14:6) Suɔmɔ ni wɔyɔɔ lɛ ji hewalɛ ni yɔɔ jeŋ muu fɛɛ shiɛmɔ nitsumɔ lɛ sɛɛ.
5 Je lɛ buɔ wɔshiɛmɔ nitsumɔ lɛ akɛ “kwashiai asane” ní esa akɛ akpoo. (1 Kor. 1:18) Abɔ mɔdɛŋ yɛ hei babaoo koni akɛba wɔ nitsumɔ lɛ shi. Anɔkwa suɔmɔ ni wɔyɔɔ lɛ ewaje wɔ koni wɔjaje taakɛ bɔfoi lɛ fee lɛ, akɛ: “Wɔnyɛŋ akɛ ja wɔwie nii ni wɔna kɛ nii ni wɔnu lɛ. . . . Esa akɛ aboɔ Nyɔŋmɔ moŋ toi fe gbɔmɛi.” (Bɔf. 4:20; 5:29) Shiɛmɔ nitsumɔ lɛ miiya nɔ eeshwere yɛ shikpɔŋ lɛ nɔ he fɛɛ he yɛ shitee-kɛ-woo fɛɛ sɛɛ.
6 Suɔmɔ ni wɔyɔɔ kɛha Yehowa lɛ tamɔ la ní tsoɔ ní tsirɛɔ wɔ koni wɔjaje egbojee lɛ. (Yer. 20:9; 1 Pet. 2:9) Wɔbaaya nɔ ní ‘wɔha ale enifeemɔ nii lɛ, ejaakɛ efee nii wuji’!—Yes. 12:4, 5.