Okɛ Ohe Awo Osɔɔmɔ lɛ Mli ‘Vii’
1 Kɛ́ wɔkane akɛ beni bɔfo Paulo yɔɔ Korinto lɛ etsu buufeemɔ nitsumɔ lɛ, ekolɛ wɔbaamu sane naa akɛ enɛ ba eshiɛmɔ nitsumɔ lɛ shi. Shi kɛlɛ, Bɔfoi lɛ Asaji 18:5 kɛɔ akɛ: “Wiemɔ lɛ ta Paulo mli ni eye odase veveeve etsɔɔ Yudafoi lɛ akɛ Yesu ji Kristo lɛ.” (Wɔma efã ko nɔ mi.) Mɛni hewɔ Paulo kɛ ehe wo shiɛmɔ nitsumɔ lɛ mli vii lɛ? Eyɛ mli akɛ mɛi babaoo ni yɔɔ Korinto lɛ ebatsɔmɔ heyelilɔi moŋ, shi Nuntsɔ lɛ ma nɔ mi akɛ mɛi babaoo yɛ lolo ni abaafee amɛ kaselɔi yɛ nakai maŋ lɛ mli. (Bɔf. 18:8-11) Ani wɔyɛ yiŋtoo ni tamɔ nakai nɔŋŋ ní wɔɔdamɔ nɔ wɔkɛ wɔhe awo wɔshiɛmɔ nitsumɔ lɛ mli vii? Hɛɛ. Abaanyɛ ana mɛi babaoo lolo ní atsɔɔ amɛ anɔkwale lɛ.
2 Okɛ Be Babaoo Atsu Nii yɛ Sɔɔmɔ lɛ Mli yɛ April Mli: Eka shi faŋŋ akɛ, oti ni ma ohiɛ ji ní okaná dekã kwraa yɛ sanekpakpa lɛ shiɛmɔ mli daa nyɔŋ nɔ. Shi nyɔji komɛi haa wɔnáa hegbɛi babaoo ni wɔkɛ wɔhe woɔ nitsumɔ nɛɛ mli ‘vii.’ Nɔ ni fata enɛɛmɛi ahe ji April nyɔŋ lɛ, yɛ Kaimɔ be lɛ mli. Ani oshihilɛi eŋmɛ bo gbɛ koni ofee gbɛgbalɔi awalɔ loo ni oha mɔdɛŋ ni obɔɔ yɛ shiɛmɔ nitsumɔ lɛ mli lɛ aya hiɛ yɛ be nɛɛ mli? Ajɔɔ shiɛlɔi babaoo ní feɔ enɛ lɛ waa diɛŋtsɛ. (2 Kor. 9:6) Kɛ́ oofee nɔ fɛɛ nɔ ni ooonyɛ lɛ, kaimɔ akɛ Yehowa náa osusuma muu fɛɛ sɔɔmɔ lɛ he miishɛɛ. (Luka 21:2-4) Bɔ fɛɛ bɔ ni oshihilɛ ji lɛ, ha efee oti ni ma ohiɛ akɛ okɛ ohe baawo osɔɔmɔ nitsumɔ lɛ mli ‘vii’ yɛ April mli. Ni ohiɛ akakpa nɔ, ní okɛ oshiɛmɔyaa he akɔntaabuu lɛ aha yɛ nyɔŋ lɛ naagbee bɔni afee ni abu onitsumɔ lɛ he akɔntaa afata Yehowa webii krokomɛi ni eshwɛ lɛ anɔ̃ lɛ he.
3 Saramɔ Mɛi Heei ni Ba Kaimɔ lɛ Shishi Lɛ: Nyɛsɛɛ afi lɛ, mɛi ni ba Kaimɔ lɛ shishi yɛ Ghana ji 230,469. Aleee mɛi ni baaba afi nɛɛ. Ni kɛlɛ, amaniɛbɔi tsɔɔ akɛ ‘nikpamɔ’ babaoo yɛ ní abaanyɛ akpa. (Mat. 9:37, 38) No hewɔ lɛ, too gbɛjianɔ koni oyasara mɛi ni yɔɔ wiemɔ lɛ he miishɛɛ ni ba Kaimɔ lɛ shishi lɛ ní oye obua amɛ yɛ mumɔŋ amrɔ nɔŋŋ kɛ́ eeehi. Saramɔi nɛɛ ní oootsi oto lɛ baaha ‘mɔ fɔŋ lɛ abashá nɔ ni adũ yɛ amɛtsuii amli lɛ.’ (Mat. 13:19) Saramɔ ní ooofee nɔŋŋ lɛ baatsɔɔ akɛ okɛ ohe ewo osɔɔmɔ nitsumɔ lɛ mli ‘vii’ lɛɛlɛŋ.
4 Yaa nɔ Oye Obua Mɛi ni Ekpa Shiɛmɔyaa Lɛ: Yɛ February mli lɛ, aje mɔdɛŋbɔɔ krɛdɛɛ ko shishi koni aye abua mɛi ni ekpa shiɛmɔyaa lɛ. Kɛ́ mɛi komɛi yɛ ní onukpai lɛ ebasarako amɛ lɛ, no lɛ esa akɛ onukpai lɛ ato gbɛjianɔ koni amɛyasara amɛ dani April nyɔŋ lɛ agbo. Onukpai lɛ baabɔ mɔdɛŋ koni amɛle nɔ ni kɛ aŋkro lɛ naagba lɛ ba kɛ gbɛ ni hi fe fɛɛ ni amɛaatsɔ nɔ amɛye amɛbua lɛ ni esɔmɔ Yehowa kɛ ekãa ekoŋŋ. Nɛkɛ yelikɛbuamɔ ni suɔmɔ yɔɔ mli nɛɛ tsɔɔ akɛ onukpai lɛ buɔ sɔ̃ ni kã amɛnɔ akɛ amɛkwɛ “Nyɔŋmɔ asafoku” lɛ kɛ hiɛdɔɔ lɛ. (1 Pet. 5:2; Bɔf. 20:28) September 15, 1993, Buu-Mɔɔ, baafai 22-23 lɛ kɛ ŋaawoo kpakpai ní onukpai lɛ baanyɛ amɛkɛtsu nii kɛji amɛmiitsu naagbai enumɔ ni baanyɛ asa mɛi ni ekpa shiɛmɔyaa lɛ ahe lɛ ateŋ eko he nii lɛ. Esa jogbaŋŋ akɛ, abaanyɛ akanya mɛi komɛi yɛ shiɛmɔ nitsumɔ lɛ mli yɛ April mli.
5 Ye Obua Mɛi Babaoo ní Amɛbatsɔmɔ Shiɛlɔi ní Abaptisiko Amɛ: Ani obii lɛ ahe esa ákɛ sanekpakpa shiɛlɔi heei? Ni mɛi krokomɛi ní okɛ amɛ kaseɔ Biblia lɛ hu? Kɛ́ onukpai lɛ kpɛlɛ nakai gbɔmɛi lɛ anɔ lɛ, ani April ebafeŋ be ni sa kɛha amɛ ní amɛkɛaaje shiɛmɔyaa shishi? Kɛ́ mɔ ko miiya ehiɛ, ni ekase Taoɔ wolo bibioo lɛ kɛ Nilee wolo lɛ, abaanyɛ atsa Biblia mli nikasemɔ lɛ nɔ yɛ wolo ni ji enyɔ mli—yɛ God’s Word wolo lɛ, True Peace wolo lɛ, loo Ekome ni Afee Kɛmiija wolo lɛ mli. Oti ni ma ohiɛ ji ní oye obua nikaselɔ lɛ ni enu anɔkwale lɛ shishi babaoo, ní ehe asa akɛ shiɛlɔ ni abaptisiko lɛ, ni ebatsɔ Yehowa Odasefonyo ni ejɔɔ ehe nɔ ni abaptisi lɛ.—Efe. 3:17-19; 1 Tim. 1:12; 1 Pet. 3:21.
6 Oshiŋŋfeemɔ kɛ anɔkwa miishɛɛ ni oyɔɔ yɛ o-Biblia kaselɔi lɛ ahe lɛ baanyɛ aye abua amɛ ni naagbee lɛ amɛha anɔkwale lɛ afee amɛnɔ. Odasefonyo ko kɛ gbalashihilɛ mli hefatalɔi onukpai komɛi ní jɛ amɛtsuiŋ fɛɛ amɛkpɛlɛ akɛ amɛbaakase Biblia lɛ kpe. Shi gbalashihilɛ mli hefatalɔi lɛ tsi nikasemɔ lɛ amɛto otsii etɛ kɛtsara nɔ. Naagbee mli lɛ, amɛje nikasemɔ lɛ shishi. No sɛɛ lɛ, kɛ hoo lɛ gbalashihilɛ mli hefatalɔi lɛ folɔɔ nikasemɔ lɛ mli otsi fɛɛ otsi. Shi, naagbee mli lɛ, ŋa lɛ tee ehiɛ kɛshɛ baptisimɔ he. Nyɛmi nuu lɛ kaiɔ akɛ: “Beni abaptisi yoo lɛ sɛɛ lɛ, ehiŋmɛii amli yimɔ obɔbɔ kɛ miishɛɛ yaafonui, ni eha miishɛɛ yaafonui ba mi kɛ miŋa fɛɛ hu hiŋmɛii amli.” Hɛɛ, sanekpakpa lɛ ní akɛ he woɔ mli ‘vii’ lɛ kɛ miishɛɛ baa!
7 Biblia mli gbalɛi kɛ je lɛŋ saji tsɔɔ akɛ wɔyɛ naagbee be lɛ mli vii diɛŋtsɛ. Amrɔ nɛɛ ji be ni esa akɛ Nyɔŋmɔ webii fɛɛ kɛ amɛhe awo sanekpakpa lɛ mli ‘vii’ ní amɛha mɛi krokomɛi ale. Bɔfo Paulo kɛ nɔmimaa haa akɛ nakai mɔdɛŋbɔɔ lɛ “efeee yaka yɛ Nuntsɔ lɛ mli.”—1 Kor. 15:58.