Shiɛmɔ Wiemɔi ní Yɔɔ Mlɛo kɛ Faŋŋ lɛ Mɔɔ Shi Jogbaŋŋ
1 Mɛni hewɔ bei pii lɛ, mɛi ni shiɛlɔi ni darako lɛ wieɔ Maŋtsɛyeli shɛɛ sane lɛ tsɔɔ amɛ lɛ boɔ amɛ toi lɛ? Yiŋtoo kome ji akɛ amɛwiemɔi lɛ yɛ kukuji. Shiɛlɔi komɛi baanyɛ anu he akɛ esa akɛ odasefonyo ko naa atse yɛ shiɛmɔ wiemɔi amli. Shi kɛlɛ, niiashikpamɔ etsɔɔ akɛ shiɛmɔ wiemɔi ni yɔɔ mlɛo kɛ faŋŋ lɛ hi fe fɛɛ.
2 Yesu jaje Nyɔŋmɔ Maŋtsɛyeli lɛ yɛ gbɛ ni yɔɔ mlɛo kɛ tɛ̃ɛ nɔ, ni etsɔɔ ekaselɔi lɛ ni amɛfee nakai nɔŋŋ. (Mat. 4:17; 10:5-7; Luka 10:1, 9) Ekɛ hiɛkpamɔ wiemɔi, sanebimɔi, kɛ nɔkwɛmɔnii ni yɔɔ mlɛo tsu nii koni ekɛgbala etoibolɔi lɛ ajwɛŋmɔ ni ekɛshɛ amɛtsuii ahe. (Yoh. 4:7-14) Wɔbaafee jogbaŋŋ akɛ wɔɔkase enɔkwɛmɔnɔ lɛ, ni wɔkɛ shiɛmɔ wiemɔi ni abaanyɛ anu shishi yɛ gbɛ ni waa nɔ lɛ atsu nii.
3 “Maŋtsɛyeli lɛ he sanekpakpa” lɛ ji shɛɛ sane ni esa akɛ wɔjaje. (Mat. 24:14) Kɛ́ okɛ Maŋtsɛyeli lɛ tsu nii akɛ osaneyitso lɛ, ebaaha oshiɛmɔ wiemɔi afee nɔ ni yɔɔ mlɛo. Wiemɔ nibii ni otoibolɔi lɛ susuɔ he lɛ ahe. Yei yɛ amɛweku he miishɛɛ babaoo fe maŋkwramɔŋ saji. Nɔ klɛŋklɛŋ ni tsɛ ko susuɔ he ji enitsumɔ kɛ eweku lɛ shweshweeshwefeemɔ. Oblahii kɛ oblayei yɛ amɛ wɔsɛɛ be he miishɛɛ; ni mɛi ni egbɔlɔ lɛ yɛ amɛgbɔmɔtsoŋ hewalɛ kpakpa namɔ kɛ shweshweeshwe shihilɛ he miishɛɛ. Bei pii lɛ, gbɔmɛi susuɔ saji ni yaa nɔ yɛ he ni amɛyɔɔ lɛ he fe nibii ni yaa nɔ yɛ shikpɔji ni yɔɔ shɔŋŋ nɔ. Yɛ be mli ni nyɛgba saji ni nyɛ fɛɛ nyɛyɔɔ he miishɛɛ lɛ sɛɛ lɛ, gbalamɔ jwɛŋmɔ kɛba jɔɔmɔi ni adesai toibolɔi lɛ baaná mli ŋɔɔmɔ yɛ Nyɔŋmɔ Maŋtsɛyeli nɔyeli shishi lɛ nɔ. Wiemɔi kukuji fioo ni ahala lɛ jogbaŋŋ kɛ ŋmalɛi baanyɛ afee nɔ ni hi fe fɛɛ ní baakanya otoibolɔi lɛ amiishɛɛ.
4 Obaanyɛ oje sanegbaa ko shishi kɛtsɔ enɛ kɛɛmɔ nɔ:
◼ “Ŋwanejee ko bɛ he akɛ, okpɛlɛɔ nɔ akɛ helai babaoo ní anyɛɛɛ atsa miihao adesai aweku lɛ. Shi ani ole akɛ Nyɔŋmɔ ewo shi akɛ etsɛŋ ni ebaajie helai srɔtoi fɛɛ, kɛ agbɛnɛ hu gbele kɛya?” Ŋmɛɛ gbɛ ni ewie, ni okane Kpojiemɔ 21:3, 4.
5 Eba akɛ, kɛtsɔ shiɛmɔ wiemɔi ni yɔɔ mlɛo kɛ faŋŋ nɔ lɛ, obaashɛ mɛi babaoo ni yɔɔ oshikpɔŋkuku lɛ mli lɛ ajwɛŋmɔŋ kɛ tsuii ahe, ni oye obua amɛ ni amɛkase Yehowa he nii kɛ gbɛkpamɔ akɛ amɛbaaná naanɔ wala mli ŋɔɔmɔ.—Yoh. 17:3.