Bɔ ni Akɛ Shiɛmɔ Wiemɔi ni Akɛhaa lɛ Tsuɔ Nii
1. Te esa akɛ wɔbu shiɛmɔ wiemɔi ni akɛhaa lɛ wɔha tɛŋŋ?
1 Shiɛmɔ wiemɔi ni akɛhaa koni atsɔ nɔ akɛ wɔwoji tɛtrɛbii lɛ kɛ woji krokomɛi lɛ aha lɛ jeɔ kpo daa yɛ Wɔ Maŋtsɛyeli Sɔɔmɔ lɛ mli. Kɛ́ wɔmiishiɛ lɛ, ehe ehiaaa akɛ wɔti shiɛmɔ wiemɔi ni akɛha nɛɛ amli pɛpɛɛpɛ taakɛ aŋma lɛ. Akɛhaa koni eye kɛbua wɔ ni wɔle nɔ ni esa akɛ wɔwie. Bei pii lɛ shiɛmɔ wiemɔi lɛ baanyɛ amɔ shi jogbaŋŋ kɛ́ wɔkɛwo wɔ diɛŋtsɛ wɔwiemɔi amli. Ni wɔɔwie tamɔ bɔ ni wɔwieɔ daa lɛ haa wiemɔ lɛ feɔ mlɛo ehaa shiatsɛ lɛ, ni ehaa wɔkɛ anɔkwayeli kɛ nɔmimaa wieɔ.—2 Kor. 2:17; 1 Tes. 1:5.
2. Mɛni hewɔ ehe hiaa ni wɔsusu maŋ kusumii ahe kɛ́ wɔmiisaa wɔhe kɛ shiɛmɔ wiemɔi lɛ?
2 Tsakemɔ Oshiɛmɔ Wiemɔ lɛ Hiɛ: Maŋ kusumii náa gbɛ nɔ ni wɔtsɔɔ wɔkɛ sanekpakpa lɛ haa lɛ nɔ hewalɛ waa. Ani obaanyɛ oŋa shiatsɛ lɛ ni no sɛɛ lɛ okɛ oshiɛmɔ wiemɔ lɛ awo sanegbaa lɛ mli, aloo mɛi ni yɔɔ oshikpɔŋkuku lɛ mli lɛ kpaa bo gbɛ akɛ okɛ oshiɛmɔ wiemɔ lɛ aha tɛ̃ɛ? Nɔ ni esa akɛ afee lɛ yɛ srɔto yɛ he fɛɛ he, ni bei komɛi po lɛ bɔ ni mɔ fɛɛ mɔ sumɔɔ akɛ efee lɛ. Sɛɛyoomɔ he miihia yɛ sanebimɔi ni akɛtsuɔ nii lɛ hu mli. Sanebimɔi ni sa yɛ hei komɛi lɛ baanyɛ agba mɛi krokomɛi anaa. Enɛ hewɔ lɛ, esa akɛ wɔkɛ nilee atsu nii ni wɔtsake wɔshiɛmɔ wiemɔi lɛ ahiɛ yɛ bɔ ni akpɛlɛɔ nɔ yɛ he ni wɔyɔɔ lɛ naa.
3. Mɛni hewɔ esa akɛ wɔsusu mɛi ni wɔshiɛɔ wɔtsɔɔ amɛ lɛ ashihilɛ kɛ amɛsusumɔi ahe lɛ?
3 Kɛfata he lɛ, kɛ́ wɔmiisaa wɔhe kɛha shiɛmɔyaa lɛ, esa akɛ wɔsusu mɛi ni yɔɔ wɔshikpɔŋkuku lɛ mli lɛ ashihilɛ kɛ amɛsusumɔi ahe. Ákɛ nɔkwɛmɔnɔ lɛ, bɔ ni okɛ Katoliknyo diɛŋtsɛ ko baasusu Mateo 6:9, 10 lɛ he lɛ baafee srɔto yɛ bɔ ni okɛ mɔ ko ni lé “Wɔtsɛ ni yɔɔ Ŋwɛi” sɔlemɔ lɛ baasusu he oha lɛ he. Kɛ́ wɔtsɔ hiɛ wɔsusu nii ahe lɛ, bei pii lɛ wɔbaanyɛ wɔtsake wɔshiɛmɔ wiemɔi lɛ ahiɛ ni wɔha mɛi ni wɔkɛkpeɔ yɛ shiɛmɔ nitsumɔ lɛ mli lɛ aná he miishɛɛ.—1 Kor. 9:20-23.
4. Mɛni hewɔ wɔhe ni wɔɔsaa jogbaŋŋ lɛ he hiaa lɛ?
4 Kɛji akɛ wɔto gbɛjianɔ akɛ wɔkɛ shiɛmɔ wiemɔ ko ni akɛha baatsu nii tamɔ bɔ ni aŋma lɛ po lɛ, esa akɛ wɔsaa wɔhe jogbaŋŋ. Esa akɛ wɔkane sane loo saneyitso ni wɔsaa wɔhe akɛ wɔkɛbaatsu nii lɛ jogbaŋŋ ni wɔtao saji ni baatee mɛi amiishɛɛ shi. Yɛ no sɛɛ lɛ esa akɛ wɔkɛ saji nɛɛ afata wɔshiɛmɔ wiemɔ lɛ he. Kɛ́ wɔbaanyɛ wɔkɛ miishɛɛ aha wɔwoji lɛ, ja wɔle saji kpakpai ni yɔɔ mli lɛ.
5. Mɛni hewɔ wɔbaanyɛ wɔkɛ shiɛmɔ wiemɔ kroko asaa wɔhe, ni wɔbaanyɛ wɔfee enɛ yɛ mɛɛ gbɛ nɔ?
5 Shiɛmɔ Wiemɔ Krokomɛi: Ani esa akɛ wɔkɛ shiɛmɔ wiemɔi ní akɛhaa lɛ pɛ atsu nii? Dabi. Kɛ́ shiɛmɔ wiemɔ loo ŋmalɛ kroko kɛ nitsumɔ yɛ mlɛo kɛha bo lɛ, okɛ no atsu nii. Esa akɛ ohiɛ ahi saji ni yɔɔ woji tɛtrɛbii lɛ amligbɛ ní mɛi ni yɔɔ oshikpɔŋkuku lɛ mli lɛ baaná he miishɛɛ lɛ anɔ titri, ní okɛtsu nii. Kɛ́ abaafee shiɛmɔ wiemɔi ahe nɔkwɛmɔnɔ yɛ Sɔɔmɔ Kpee lɛ mli lɛ, abaanyɛ ato gbɛjianɔ ni akɛ shiɛmɔ wiemɔ fɛɛ shiɛmɔ wiemɔ ni mɔɔ shi jogbaŋŋ yɛ shikpɔŋkuku lɛ mli lɛ afee nɔkwɛmɔnɔ lɛ. Abaanyɛ atsɔ nɛkɛ gbɛ nɔ aye abua mɛi fɛɛ koni amɛkɛ sanekpakpa lɛ aha yɛ gbɛ ni mɔɔ shi nɔ.