‘Bó Toi ni Oshwere yɛ Nilee Gbɛfaŋ’
1 Abɛi awolo lɛ feɔ nilee he mfoniri akɛ eebolɔ akɛ: “Nyɛboa toi, ejaakɛ mibawie wiemɔi ni he jaraa, ni minaa ní mibagbele nɛɛ, wiemɔi ni ja sɔŋŋ ni. Minɔ ji ŋaawoo kɛ shweremɔ . . . Nyɛboa mi toi! Ejaakɛ ajɔɔ mɛi ni nyiɛɔ migbɛ̀i lɛ anɔ lɛ! Ejaakɛ mɔ ni aaaná mi lɛ, ená wala, ni ehiɛ aaaba nyam yɛ Yehowa hiɛ.” (Abɛi 8:6, 14, 32, 35) Nakai wiemɔi lɛ tsɔɔ nilee ni mɛɔ wɔ yɛ “Nyɔŋmɔ Wiemɔ lɛ Tsɔɔlɔi” Kpokpaa Wulu nɔ Kpee lɛ shishi.
2 Ákwɛ jeŋ muu fɛɛ nyɛmifeemɔ lɛ hiamɔ nii amli jogbaŋŋ, ni ásaa kpee shishi wiemɔ he gbɛjianɔtoo lɛ koni etsu nakai hiamɔ nii lɛ ahe nii. Kɛ wɔkɛ mumɔŋ nilee kɛ gbɛtsɔɔmɔi kpakpai ni akɛbaaha lɛ tsu nii lɛ, ebaanyɛ eye ebua ni wɔná miishɛɛ, ni wɔhiɛ wɔkɛ Yehowa teŋ wekukpaa kpakpa mli, ní wɔhi gbɛ ni kɛ mɔ yaa naanɔ wala mli lɛ nɔ. Eka shi faŋŋ akɛ, wɔyɛ yiŋtoo kpakpa ni wɔɔdamɔ nɔ ‘wɔbo toi ni wɔshwere yɛ nilee gbɛfaŋ.’—Abɛi 1:5.
3 Dani Aaaje Kpee lɛ Shishi: Bɔni afee ni wɔná nɔ ni akɛhaa lɛ he sɛɛ jogbaŋŋ lɛ, ehe baahia ni wɔtara wɔ sɛii anɔ ni wɔná jwɛŋmɔŋ toiŋjɔlɛ beni kpee lɛ jeɔ shishi lɛ. Enɛ biɔ ni mɔ ato gbɛjianɔ kpakpa. Oti titri kome ji koni ate shi mra beni je etsɛre. Yaawɔ mra gbɛkɛ. Tee shi mra bɔ ni sa ní otsɔɔ owebii lɛ ateŋ mɔ fɛɛ mɔ be ni esa akɛ akɛsaa he kɛ be ni amɛkɛaaye nɔ ko. Yaashɛ kpee lɛ shishi mra koni onyɛ oná he ko ota ni otsu saji ni he hiaa ahe nii dani aje kpee lɛ shishi. Nifeemɔ lɛ baaje shishi leebi 9:30 gbi fɛɛ gbi.
4 Akɛni yiŋtoo titri hewɔ ni abuaa he naa ji koni ajie Yehowa yi “yɛ gwabɔi amli” hewɔ lɛ, esa akɛ aje shishi yɛ gbɛ ni baawo wɔ-Nyɔŋmɔ lɛ hiɛ nyam leebi kɛ shwane fɛɛ. (Lala 26:12) Enɛ hewɔ lɛ, aawo mɛi fɛɛ hewalɛ koni atara shi dani atsɛ lala ni akɛbaaje shishi lɛ. Enɛ kɛ Ŋmalɛ naa ŋaawoo lɛ kpãa gbee akɛ: “Afee nii fɛɛ bɔ ni yɔɔ fɛo kɛ gbɛnaa gbɛnaa.” (1 Kor. 14:40) Mɛni no tsɔɔ kɛha wɔteŋ mɔ fɛɛ mɔ? Kɛ ona akɛ sɛinɔtalɔ lɛ eyata wiemɔ kpoku lɛ nɔ beni lalatswaa lɛ jeɔ shishi lɛ, taomɔ he ko ota amrɔ nɔŋŋ. Enɛ baaha okɛ otsui fɛɛ awo lala ni aláa kɛjeɔ shishi lɛ mli leebi kɛ shwane fɛɛ, ní owo yijiemɔ nɔ oha Yehowa.—Lala 149:1.
5 Beni Kpee lɛ Yaa Nɔ: Ezra “kɛ etsui efɔ̃ nɔ akɛ eeetao Yehowa mla lɛ sɛɛgbɛ ní eye nɔ.” (Ezra 7:10) Te wɔɔfee tɛŋŋ wɔkɛ wɔtsui afɔ̃ nɔ koni wɔná nilee ni Yehowa kɛhaa lɛ? Be mli ni okwɛɔ saneyitsei ni yɔɔ fãi srɔtoi ni ato naa yɛ wiemɔ he wolo ni akala lɛ nɔ lɛ, bi ohe akɛ, ‘Mɛni ji nɔ ni Yehowa kɛɔ mi kɛtsɔɔ wiemɔ he gbɛjianɔtoo nɛɛ nɔ? Te mafee tɛŋŋ mikɛ nilee nɛɛ atsu nii koni mi kɛ miweku lɛ aná he sɛɛ?’ (Yes. 30:21; Efe. 5:17) Yaa nɔ obi nakai saji lɛ be fɛɛ be ni kpee lɛ yaa nɔ lɛ. Ŋmalamɔ saji bibii ni oto akɛ okɛbaatsu nii. Nyɛfea ekome kɛsusua he fiofio yɛ gbii etɛ lɛ fɛɛ mli leebi kɛ shwane nifeemɔ lɛ sɛɛ. Enɛ baaye ebua bo ni okai nɔ ni okaseɔ lɛ ni okɛtsu nii.
6 Ŋmɛlɛtswai babaoo ni akɛboɔ sane toi yɛ be kome too lɛ nɔŋŋ mli lɛ baanyɛ afee nɔ ni wa. Mɛni baanyɛ aye abua wɔ koni wɔtsĩ jwɛŋmɔ ni aaanyɛ agba kɛya afa lɛ naa? Okɛ hewalɛ ni hiŋmɛi lɛ yɔɔ lɛ atsu nii. Nɔ ni wɔkɛ wɔhiŋmɛii kwɛɔ jogbaŋŋ lɛ náa wɔjwɛŋmɔ ni wɔkɛmaa sane toiboo nɔ lɛ nɔ hewalɛ babaoo. (Mat. 6:22) No hewɔ lɛ, tee shi owo nyɛmɔ ni eeenyɛ eba akɛ oootsɔ oyitso kɛtsɔɔ he fɛɛ he ni hoofeemɔ ko jɛɔ kɛbaa loo he ni nifeemɔ ko yaa nɔ yɛ jɛmɛ lɛ. Kwɛmɔ wielɔ lɛ hiɛ gãa. Nyiɛmɔ sɛɛ yɛ o-Biblia lɛ mli beni akaneɔ ŋmalɛ ko lɛ, ni ha o-Biblia lɛ naa akã beni asusuɔ ŋmalɛ lɛ he lɛ.
7 Kristofoi asuɔmɔ baatsirɛ wɔ koni wɔkagba mɛi krokomɛi anaa beni kpee lɛ yaa nɔ lɛ. (1 Kor. 13:5) ‘Be ni akɛfeɔ dioo’ ni akɛboɔ sane toi lɛ nɛ. (Jaj. 3:7) No hewɔ lɛ, kwa wiemɔ kɛ nyiɛmɔ sɔŋŋ ni anyiɛɔ kɛkɛ bɔ ni esaaa lɛ. Too gbɛjianɔ kɛtsɔ hiɛ koni okaya niiasɛɛyaahe lɛ kpitiokpitio. Mɛɛ kɛyashi be ni ato kɛha niyeli loo ninumɔ lɛ, ja hela ni naa wa he saji ahewɔ. Mɛi ni kɛ tɛlifoŋ ni kpãa bɛ sɛɛ, nibii ni gbɛɛɔ, tsɔnei bibii ni akɛshaa vidio, kɛ kamerai baa lɛ kɛ enɛɛmɛi akatsu nii bɔ ni baagbala mɛi krokomɛi ajwɛŋmɔ. Esa akɛ fɔlɔi ato gbɛjianɔ koni amɛweku muu lɛ fɛɛ—ni mɛi ni yeko afii nyɔŋmai enyɔ fata he lɛ—atara shi yɛ hekome bɔni afee ni amɛnyɛ amɛkwɛ amɛbii anɔ jogbaŋŋ.—Abɛi 29:15.
8 Nyɛsɛɛ afi lɛ, onukpa ko ni kɛ afii nyɔŋmai abɔ sɔŋŋ etee kpeei lɛ kɛɛ akɛ: “Misusuɔ akɛ nɛkɛ kpee nɛɛ sa kadimɔ waa yɛ yiŋtoo kroko hewɔ. Nɔ ni miihe ashɛ mɔ fɛɛ mɔ ni gbekɛbii bibii fata he lɛ miiŋmala nibii bibii. Eji miishɛɛ sane akɛ oookwɛ enɛ. Akɛ Bibliai tsu nii jogbaŋŋ beni wielɔi lɛ tsɛ́ɔ koni agbele hei komɛi lɛ.” Sane toiboo jogbaŋŋ ni tamɔ nɛkɛ lɛ sa yijiemɔ waa diɛŋtsɛ. Jeee akɛ ekɛ sɛɛnamɔi bahaa wɔ kɛ wɔnanemɛi ni wɔkɛ amɛ eba kpee lɛ kɛkɛ, shi nɔ ni fe fɛɛ lɛ ewoɔ wɔ Tsɔɔlɔ Kpeteŋkpele, Yehowa Nyɔŋmɔ hiɛ nyam.—Yes. 30:20.