Henaabuamɔ Kɛha Yehowa Yijiemɔ
1. Mɛni ji kpee lɛ saneyitso, ni mɛni hewɔ esa akɛ wɔjie Yehowa yi lɛ?
1 Yehowa ji hewalɛi fɛɛ atsɛ, ní enilee mli kwɔ fe bɔ ni aaanyɛ anu shishi, mɔ ni eye emuu yɛ jalɛsaneyeli mli, kɛ suɔmɔ ni jieɔ ehe kpo yɛ gbɔmɔtso su mli. Ákɛ Bɔlɔ, Wala-Halɔ, kɛ Jeŋ Muu Fɛɛ Maŋtsɛ lɛ, lɛ pɛ esa akɛ wɔja. (Lala 36:10; Kpoj. 4:11; 15:3, 4) Afi nɛɛ “Okɛ Anunyam Aha Nyɔŋmɔ” Majimaji Ateŋ Kpeei kɛ Kpokpaa Wulu nɔ Kpeei lɛ baawaje wɔfai shi ni wɔtswa akɛ wɔbaajie eyi akɛ anɔkwa Nyɔŋmɔ koome lɛ.—Lala 86:8-10.
2, 3. Gbɛjianɔtoo kpakpa baaye abua wɔ ni wɔná nifeemɔi lɛ ahe sɛɛ kɛmɔ shi yɛ mɛɛ gbɛ nɔ?
2 Gbɛjianɔtoo Kpakpa He Miihia: Bɔni afee ni wɔná mumɔŋ okpɔlɔŋmɛɛ ni Yehowa esaa eto wɔ lɛ he sɛɛ jogbaŋŋ kɛmɔ shi lɛ, gbɛjianɔtoo kpakpa he miihia. (Efe. 5:15, 16) Ani oto gbɛjianɔ momo kɛha wɔɔhe, tsɔne ni obaata mli kɛya, kɛ gbɛbimɔ koni okaya nitsumɔ loo skul? Kaatsi saji ni he hiaa nɛɛ oto kɛyashi beni eeefee nɔ ni ekpe sɛɛ tsɔ̃. Kɛji akɛ osɛɛ gbala shi yɛ gbɛ ni ooobi koni okaya nitsumɔ loo skul lɛ, no lɛ ekolɛ miishɛɛ nifeemɔ nɛɛ mli fã ko baaŋmɛɛ bo. Ehe miihia ni wɔ fɛɛ wɔhi jɛmɛ kɛha nifeemɔi srɔtoi lɛ fɛɛ.
3 Ha efee oti ni ma ohiɛ akɛ obaashɛ kpeehe lɛ shishi mra gbi fɛɛ gbi. No baaha ota shi dani abɔi shishijee lala lɛ lamɔ, ni ebaaye ebua bo koni osaa ojwɛŋmɔ kɛbo tsɔsemɔ ni akɛbaaha lɛ toi. Abaagbele shinaai lɛ leebi 8:00 daa gbi. Ofainɛ kaamɔ gbɛ oha mɔ ko, ja oweku kɔkrɔɔ lɛ mli bii loo mɛi ni fata ohe kɛtee lɛ pɛ.
4. Mɛni hewɔ abiɔ ni wɔ fɛɛ wɔkɛ shwane niyenii aba kpee lɛ shishi lɛ?
4 Aabi koni mɔ fɛɛ mɔ kɛ shwane niyenii aba fe nɔ ni aaashi kpee lɛ shishi ni ayahe niyenii be mli ni aba shwane hejɔɔmɔ lɛ. Gbɛjianɔtoo nɛɛ sɛɛ ni ooofĩ lɛ baaye abua ní jɛmɛ afee he ni toiŋjɔlɛ yɔɔ ni ebaaha oná be babaoo ni okɛ nanemɛi heyelilɔi aná naanyobɔɔ mli ŋɔɔmɔ. (Lala 133:1-3) Ofainɛ ha ehi ojwɛŋmɔ mli akɛ, akpɛlɛɛɛ ni akɛ glase nibii ni jwaraa kɛ dãai ni wa aba hei ni abaafee kpeei lɛ yɛ lɛ. Aakpa mɛi ni baaya kpeei yɛ bɔɔltswaahe lɛ ni yɔɔ Accra kɛ Kumasi lɛ afai koni amɛkadi akɛ, esaaa ákɛ amɛkɛ nibii ni dara ni akɛ weku muu fɛɛ niyenii woɔ mli ni emli akajɔ lɛ baa shwɛmɔhe lɛ. Gbɛ bɛ kɛha nibii ni tamɔ nakai. Okɛ nibii bibii ni baanyɛ ahɔ onaji ateŋ lɛ pɛ aba. Nakai nɔŋŋ efeŋ nɔ ni nilee yɔɔ mli akɛ okɛ nibii wuji ni akɛ nibii toɔ mli lɛ baawo okar lɛ nitoohe lɛ, akɛni ekolɛ he ni akɛbaaha koni akɛ kar srɔtoi amamɔ jɛmɛ lɛ kɛ kpeehe lɛ teŋ aaajɛkɛ lɛ hewɔ.
5. Wɔbaanyɛ wɔje shishi wɔsaa wɔtsui kɛha kpeei lɛ yɛ mɛɛ gbɛ nɔ?
5 Bo Sane Toi ni Okase Nii: Ezra tsɔ̃ sɔlemɔ nɔ esaa etsui kɛha Nyɔŋmɔ wiemɔ lɛ toiboo. (Ezra 7:10) Esaa etsui kɛha Yehowa nitsɔɔmɔi lɛ. (Abɛi 2:2) Wɔbaanyɛ wɔbɔi wɔtsui saamɔ kɛha kpee lɛ dani wɔshi shĩa kɛtsɔ kpee lɛ saneyitso lɛ nɔ ni wɔɔjwɛŋ ni wɔkɛ wɔweku lɛ asusu he lɛ nɔ.
6. Mɛni baanyɛ aye abua wɔ ni wɔjwɛŋmɔ ahi wiemɔ he gbɛjianɔtoo lɛ nɔ? (Kwɛmɔ akrabatsa lɛ.)
6 Nibii akwɛmɔ kɛ gbɛɛmɔi pii ni baanyɛ agbala wɔjwɛŋmɔ lɛ baanyɛ ahi henaabuamɔ tsu agbo mli. Nibii ni gbalaa mɔ jwɛŋmɔ ni tamɔ enɛɛmɛi lɛ baanyɛ ajie wɔjwɛŋmɔ kɛjɛ wielɔ lɛ nɔ yɛ gbɛ ni waaa nɔ. Kɛji eba lɛ nakai lɛ, wɔlaajeɔ saji otii ni yɔɔ wiemɔ lɛ mli lɛ. Ŋaawoi ni akɛha yɛ akrabatsa ni fata enɛ he lɛ mli lɛ baanyɛ aye abua wɔ ni wɔsane toiboo aya hiɛ.
7, 8. Mɛɛ gbɛ nɔ wɔɔtsɔ wɔjie mɛi krokomɛi ahe susumɔ kpo wɔtsɔɔ, ni mɛɛ gbɛjianɔ ato kɛha mɛi ni nuuu nii jogbaŋŋ lɛ?
7 Susumɔ Mɛi Krokomɛi Ahe: Abaanyɛ akɛ kamerai kɛ nibii bibii ni akɛshaa vidio lɛ atsu nii be mli ni nifeemɔ lɛ yaa nɔ, shi bɔni afee ni okagbala mɛi krokomɛi ajwɛŋmɔ lɛ, feemɔ nakai kɛjɛ oshitamɔhe lɛ pɛ. Esa akɛ akudɔ tɛlifoŋ ni kpaa bɛ sɛɛ kɛ tsɔnei bibii ni akɛ shɛɛ haa kɛtsɔɔ nɔ lɛ agbɛɛmɔ bɔ ni amɛgbaŋ mɛi krokomɛi anaa. Bɔni afee ni mɛi ni nuuu nii jogbaŋŋ lɛ aná he sɛɛ lɛ, abaafee eko yɛ mumuii awiemɔ mli yɛ Accra, Koforidua kɛ Sunyani kpeei lɛ ashishi. Esaaa akɛ mɔ ko kɛ evidio, redio loo nɔ ko ni tamɔ nakai lɛ ahe kpãai lɛ tsaa kpee shishi sarawa hewalɛ kpãai lɛ loo adeka ni wiemɔ tsɔɔ mli lɛ sɛɛ kpãai lɛ.
8 Kwɛ bɔ ni wɔshweɔ akɛ wɔɔbua wɔhe naa ni wɔjie Yehowa yi wɔha! Eba akɛ, wɔɔtswa wɔfai shi akɛ wɔkɛ anunyam aaaha lɛ kɛtsɔ gbɛjianɔtoi srɔtoi lɛ fɛɛ shishi ni wɔɔhi, kɛ sane toi ni wɔɔbo jogbaŋŋ, kɛ kɛtsɔ nibii ni wɔkaseɔ ni wɔkɛaatsu nii lɛ nɔ.—5 Mose 31:12.
[Akrabatsa ni yɔɔ baafa 3]
Sane Toiboo yɛ Kpeei Ashishi
▪ Jwɛŋmɔ wiemɔi ni abaaha lɛ saneyitsei lɛ anɔ
▪ Gbelemɔ ni okane ŋmalɛi ni atsɛɔ lɛ
▪ Ŋmalamɔ saji otii kukuji oshwie shi
▪ Kadimɔ saji otii ni okɛbaatsu nii
▪ Tĩi nibii ni okase lɛ amli