Feemɔ Klalo Kɛha Yesaia Gbalɛ lɛ Kasemɔ!
1 “Anɔkwafoi ni jáa lɛ lɛ baanyɛ aná hekɛnɔfɔɔ akɛ Yehowa . . . eŋmɛŋ Satan je lɛ gbɛ ni ehi shi gbi kome po kɛteke he ni jalɛ sane biɔ ni ehi shi kɛyashi.” Mɛɛ hewalɛwoo wiemɔ po nɛ! Nɛgbɛ atsɛ́ wiemɔ nɛɛ yisɛɛ kɛjɛ? Yesaia Gbalɛ Lɛ—La Kɛha Adesai Fɛɛ 1. Ani Yesaia gbalɛ lɛ kɛ yiŋtoo ni wɔɔdamɔ nɔ wɔmu sane ni shɛjeɔ mɔ mii naa nɛkɛ haa wɔ? Hɛɛ! Ama yiwalaheremɔ ni eji saneyitso lɛ nɔ mi waa yɛ faŋŋ mli yɛ nakai Biblia mli wolo lɛ mli. (Yes. 25:9) No hewɔ ni ebaafee hewalɛwoo diɛŋtsɛ kɛha wɔ akɛ wɔɔkase Nyɔŋmɔ Wiemɔ lɛ fã nɛɛ yɛ Asafo Woloŋ Nikasemɔ lɛ shishi lɛ. Ani wɔbaaya jɛmɛ ni wɔyaná he sɛɛ daa otsi? Mɛni hewɔ esa akɛ wɔya jɛmɛ?
2 Atsɛɔ Yehowa yɛ Yesaia 30:20 (NW) akɛ wɔ “Tsɔɔlɔ Kpeteŋkpele.” Esa akɛ Kristofonyo fɛɛ Kristofonyo abo toi jogbaŋŋ beni Yehowa tsɔɔ wɔ nii kɛtsɔɔ e-Wiemɔ kɛ agbɛnɛ kɛtsɔɔ Biblia kasemɔ he woji ni “tsulɔ anɔkwafo kɛ nilelɔ” lɛ kɛha lɛ nɔ lɛ. (Mat. 24:45; Yes. 48:17, 18) Enɛ ji anɔkwale diɛŋtsɛ yɛ Yesaia Gbalɛ I wolo lɛ he. Te ooofee tɛŋŋ oná he sɛɛ diɛŋtsɛ kɛjɛ ekasemɔ mli lɛ?
3 Saamɔ Ohe Koni Okɛ Ohe Awo Mli: Too be ni fá he gbɛjianɔ daa otsi koni osaa ohe kɛha woloŋ nikasemɔ lɛ. Kanemɔ nɔ ni abaakase lɛ kuku fɛɛ kuku. Susumɔ sanebimɔi ni akala lɛ fɛɛ eko he. Kadimɔ hetooi lɛ yɛ owolo lɛ mli. Akala kukuji ni atsɛ sɛɛ kɛjɛ Yesaia wolo lɛ mli lɛ agboi. Kanemɔ amɛ jogbaŋŋ. Yɛ ŋmalɛi krokomɛi ni aŋmalako mli wiemɔi lɛ agbɛfaŋ lɛ, gbelemɔ ni okane ni okwɛ bɔ ni amɛkɔɔ sane lɛ he amɛhaa. Jwɛŋmɔ nɔ ni okaseɔ lɛ nɔ. Agbɛnɛ okɛ owoloŋ nikasemɔ kuu lɛ agba nɔ ni ejɛ ohesaamɔ lɛ mli kɛba lɛ he sane.
4 Esa akɛ nyɛmi nuu ni kwɛɔ nikasemɔ lɛ nɔ lɛ aye abua mɛi fɛɛ ni amɛba lɛ koni amɛkɛ Biblia lɛ atsu nii jogbaŋŋ koni amɛhiɛ asɔ sɛɛnamɔ kpele ni yɔɔ nɔ ni akaseɔ lɛ he lɛ. Kɛji akɛ atsɛ bo klɛŋklɛŋ ni oha sane hetoo lɛ, ha hetoo ni mli ka shi faŋŋ ni yɔɔ tɛ̃ɛ. Kɛji akɛ mɔ ko efee nakai momo lɛ, obaanyɛ olɛɛ sane ni asusuɔ he lɛ mli. Ekolɛ obaanyɛ otsɔɔ bɔ ni ŋmalɛ titri ko fiɔ saneyitso lɛ sɛɛ lɛ mli. Bɔɔ mɔdɛŋ ni oha hetoo yɛ bo diɛŋtsɛ owiemɔ mli, koni oná ohe ni okɛwoɔ sane lɛ hesusumɔ mli lɛ mli ŋɔɔmɔ.
5 Nyɛhaa wɔ fɛɛ wɔkɛ miishɛɛ apɛia shɛɛ sane ni jara wa ni yɔɔ Yesaia wolo lɛ mli lɛ mli. Ebaawo wɔ hewalɛ ni daa gbi lɛ, wɔhi shi yɛ miishɛɛ mli ni wɔkpa Yehowa yiwalaheremɔ lɛ gbɛ!—Yes. 30:18.