Okɛ Hejɔɔmɔ Be Awo Egbɛhe ni Sa
1 Yɛ gbii ni mli wa nɛɛ amli lɛ, hejɔɔmɔ he miihia wɔ fɛɛ yɛ be kɛ bei amli. Hiɛtserɛjiemɔ fioo ko ni aaaná lɛ hi ojogbaŋŋ. Shi kɛlɛ, be babaoo ni aaafite yɛ hejɔɔmɔ be, hiɛtserɛjiemɔ be, kɛ naanyobɔɔ be mli lɛ baanyɛ eha be ni mɔ ko fiteɔ yɛ mumɔŋ nibii ahe lɛ aba shi kwraa. Ebaanyɛ eba lɛ nakai nɔŋŋ yɛ yarafeemɔi ahe. Esa akɛ wɔkɛ hejɔɔmɔ be kɛ nifeemɔi krokomɛi abe awo amɛgbɛhe ni sa. (Mat. 5:3) Mɛɛ gbɛ nɔ abaanyɛ atsu enɛ he nii? Kɛtsɔ ŋaawoo ni yɔɔ Efesobii 5:15-17 lɛ kɛ nitsumɔ nɔ.
2 Ha Husui Ahi He: Paulo ŋma akɛ, esa akɛ Kristofoi ‘akwɛ bɔ ni amɛaafee’ ni amɛaahi shi yɛ nilee mli lɛ ojogbaŋŋ. Nii ni afeŋ kɛtɛkeŋ nɔ he miihia waa koni akɛ hejɔɔmɔ be atsu nɔ diɛŋtsɛ ni he hiaa lɛ he nii. Ehi jogbaŋŋ akɛ wɔbaasusu bɔ ni wɔtsuɔ wɔhejɔɔmɔ be he nii wɔhaa lɛ he kɛ hiɛdɔɔ. Esa akɛ hiɛtserɛjiemɔ he aba sɛɛnamɔ diɛŋtsɛ kɛha wɔ fe nɔ ni eeeha wɔɔnu he akɛ wɔfite wɔbe aloo etɔ wɔ fe nine. Kɛ yɛ be mli ni wɔkɛ wɔhe ewo nifeemɔ ko mli wɔgbe naa lɛ wɔnu he akɛ wɔbɛ miishɛɛ, wɔtsui enyɔɔɔ wɔmli, ni wɔnu he akɛ wɔye fɔ lɛ, enɛ baatsɔɔ akɛ esa akɛ wɔfee tsakemɔi yɛ bɔ ni wɔkɛ wɔbe tsuɔ nii wɔhaa lɛ mli.
3 Okɛ Hiɛshikamɔ Atsu Nii: Paulo kɛ ŋaawoo ni kɔɔ “mɛi ni tsuɔ amɛdeka he nii” yɛ nibii ni he hiaa fe fɛɛ yɛ shihilɛ mli lɛ ahe ha, shi jeee ni aaafee mɛi ni “bɛ yitseiaŋ.” Kristofoi ni ejɔɔ amɛhe nɔ nyɛŋ amɛha amɛshihilɛ adamɔ hiɛtserɛjiemɔi loo yarafeemɔi anɔ. Eyɛ mli moŋ akɛ hejɔɔmɔ baanyɛ awo wɔ hewalɛ yɛ gbɔmɔtsoŋ, shi mumɔŋ hewalɛnamɔ jɛɛhe ji Nyɔŋmɔ nifeemɔ hewalɛ lɛ. (Yes. 40:29-31) Wɔ nine shɛɔ emumɔ lɛ nɔ kɛtsɔ teokrase nifeemɔi anɔ—Biblia lɛ kasemɔ, asafoŋ kpeei ni wɔyaa, shiɛmɔ nitsumɔ lɛ ni wɔtsuɔ—jeee kɛtsɔ hiɛtserɛjiemɔ nɔ.
4 Too Nibii ni He Hiaa lɛ Ahe Gbɛjianɔ: Paulo fã Kristofoi koni ‘amɛya nɔ amɛyoo nii ni ji Yehowa suɔmɔnaa nii lɛ.’ Yesu tsɔɔ akɛ esa akɛ Nyɔŋmɔ Maŋtsɛyeli lɛ afee nɔ ni he hiaa wɔ fe fɛɛ yɛ shihilɛ mli yɛ wɔ nitsumɔi amli. (Mat. 6:33) Ehe miihia ni wɔfee nibii ni baaha wɔhi shi yɛ wɔhenɔjɔɔmɔ kɛha Yehowa lɛ naa klɛŋklɛŋ. No sɛɛ lɛ, abaanyɛ akɛ hiɛtserɛjiemɔ awo egbɛhe ni sa. Kɛ atsu no he nii lɛ, ekɛ sɛɛnamɔ ni sa baaba, ni wɔbaaná he miishɛɛ waa.—Jaj. 5:12.