Okɛ Obe Atsu Nii Jogbaŋŋ
1 Shwelɛ ni wɔyɔɔ akɛ wɔɔsa Yehowa hiɛ lɛ tsirɛɔ wɔ koni wɔha mumɔŋ nibii afee oti ni ma wɔhiɛ yɛ shihilɛ mli. E-Wiemɔ lɛ kɛ famɔ haa wɔ koni ‘wɔtao maŋtsɛyeli lɛ tsutsu’ ni ‘wɔyoo nii ni hi titri lɛ.’ (Mat. 6:33; Fil. 1:10) Mɛɛ gbɛ nɔ wɔbaanyɛ wɔtsɔ wɔná be kɛha Maŋtsɛyeli nibii ahe nitsumɔ, ní wɔkɛ nii ni he bɛ sɛɛnamɔ tsɔ̃ lɛ aye gbɛhe ni ji enyɔ?—Efe. 5:15-17.
2 Okɛ Maŋtsɛyeli Nitsumɔi Aye Klɛŋklɛŋ Gbɛhe: Too obe he gbɛjianɔ bɔni afee ni okafite be yɛ nibii ni he ehiaaa ahe. Mɛi komɛi kadiɔ bei pɔtɛɛi komɛi yɛ amɛ kalenda lɛ nɔ yɛ nyɔŋ fɛɛ nyɔŋ shishijee mli kɛha shiɛmɔyaa. No sɛɛ lɛ, amɛkwɛɔ jogbaŋŋ koni nibii krokomɛi ahe nitsumɔ akafite nakai gbɛjianɔtoi lɛ. Abaanyɛ afee nakai nɔŋŋ kɛná be kɛha kpeeiyaa, mɔ aŋkro nikasemɔ, kɛ kpokpaa nɔ kpeeiyaa hu. Mɛi babaoo eto gbɛjianɔ koni amɛkane Biblia lɛ daa kɛje gbi lɛ shishi loo ní amɛkɛmu naa. Too be pɔtɛɛ ko kɛha nitsumɔi ni he hiaa lɛ, ni okɛ nakai be lɛ akatsu nibii komɛi kɛkɛ ahe nii.—Jaj. 3:1; 1 Kor. 14:40.
3 Kaafite Bei Pii Yɛ Je Nɛŋ Nii Ahe: Yɛ maji komɛi anɔ lɛ, kpɔiaŋgbɔlemɔ nifeemɔi, shwɛmɔ, hiɛtserɛjiemɔ kɛ nibii krokomɛi ni atiuɔ sɛɛ lɛ fa babaoo. Mɛi babaoo yeɔ be ni fa fe nine yɛ tɛlivishiŋ kwɛmɔ mli loo yɛ kɔmpiuta he. Shi bɔ fɛɛ bɔ ni fee lɛ, hiɛtserɛjiemɔ nifeemɔi kɛ nibii heei ni je lɛ feɔ lɛ ni wɔɔha ehe wɔbei fɛɛ lɛ baaha wɔshwa wɔhe. (1 Yoh. 2:15-17) No hewɔ lɛ, Ŋmalɛi lɛ woɔ wɔ hewalɛ koni wɔkafite bei pii yɛ je nɛŋ nii ahe. (1 Kor. 7:31) Kɛ́ obo nakai ŋaawoo ni nilee yɔɔ mli lɛ toi lɛ, no baanyɛ aha Yehowa ana akɛ okɛ ejamɔ lɛ yeɔ klɛŋklɛŋ gbɛhe yɛ oshihilɛ mli.—Mat. 6:19-21.
4 Eshwɛ fioo ni nibii agbɛjianɔtoo nɛɛ baaba naagbee. Mɛi ni kɛ Maŋtsɛyeli lɛ he nibii yeɔ klɛŋklɛŋ gbɛhe lɛ baaná miishɛɛ, ni Nyɔŋmɔ baakpɛlɛ amɛnɔ. (Abɛi 8:32-35; Yak. 1:25) Belɛ, eba akɛ wɔkɛ nii ni he hiaa waa nɛɛ, ni ji wɔbe lɛ baatsu nii jogbaŋŋ.