Te Oyeɔ Nii Jogbaŋŋ yɛ Mumɔŋ Ohaa Tɛŋŋ?
1 Afɔɔ wiemɔ akɛ ‘bɔ ni wɔyeɔ nii wɔhaa lɛ, nakai wɔ gbɔmɔtsoŋ hewalɛnamɔ ji.’ Lɛɛlɛŋ, wɔ niyeli sui saa bɔ ni wɔ gbɔmɔtsoŋ hewalɛnamɔ ji lɛ he. Akɛni Yesu wie akɛ: “Jeee aboloo kɛkɛ haa gbɔmɔ yi náa wala; shi moŋ wiemɔ fɛɛ wiemɔ ni jɛɔ Nyɔŋmɔ daaŋ lɛ” hewɔ lɛ, nakai nɔŋŋ wɔ mumɔŋ niyeli sui hu saa wɔhe yɛ gbɛ kpakpa loo gbɛ fɔŋ nɔ. (Mat. 4:4) No hewɔ lɛ, te oyeɔ nii jogbaŋŋ yɛ mumɔŋ ohaa tɛŋŋ? Ani niyenii pɔtɛɛ komɛi pɛ osumɔɔ ní oye? Ani oyeɔ nii tamɔ mɔ ko ní anyiɛ osɛɛ? Aloo ani onáa miishɛɛ akɛ oooŋmɛ otsui shi ní oye mumɔŋ niyenii ní hewalɛ yɔɔ mli, ní ŋmɛɔ pɛpɛɛpɛ, be fɛɛ be?
2 Pɛimɔ Oniyeli Mli Okwɛ: Yehowa haa wɔ ‘niyenii yɛ be ni sa mli,’ ni ji ‘okpɔlɔ ní akɛ fɔ nii eŋmɛ,’ kɛtsɔɔ “tsulɔ anɔkwafo kɛ nilelɔ” lɛ nɔ. (Mat. 24:45; Yes. 25:6) Kɛ́ wɔɔná nibii ní ejɛ suɔmɔ mli eto he gbɛjianɔ eha wɔ nɛɛ he sɛɛ kɛmɔ shi lɛ, no lɛ esa akɛ wɔbɔ mɔdɛŋ ní wɔye nii jogbaŋŋ yɛ mumɔŋ.
3 Obaanyɛ obi ohe akɛ: ‘Ani mikaneɔ daa gbi ŋmalɛ lɛ kɛ emlitsɔɔmɔ lɛ daa gbi? Ani mikaneɔ Biblia lɛ daa gbi ni mijwɛŋɔ nɔ? Ani mikaseɔ nɔ ni abaasusu he yɛ asafoŋ kpeei ashishi lɛ kɛtsɔɔ hiɛ ni mikɛsaa mihe? Ani mikane wɔ woji heei ní eba, ní Yesaia Gbalɛ Lɛ—La Kɛha Adesai Fɛɛ, kpo 1 lɛ fata he lɛ migbe naa?’
4 Yesu wo shi akɛ: “Miishɛɛ ji mɛi ni amɛhiɛ yɔɔ amɛmumɔŋ hiamɔ nii anɔ lɛ . . . Miishɛɛ ji mɛi ni jalɛ he hɔmɔ kɛ kumai yeɔ amɛ lɛ, shi amɛaatɔrɔ.” (Mat. 5:3, 6, NW) No hewɔ lɛ ye nii jogbaŋŋ yɛ mumɔŋ kɛtsɔ Nyɔŋmɔ he nilee ní okɛaawo ojwɛŋmɔŋ kɛ otsuiŋ obɔ lɛ nɔ.