Mɛni Hewɔ Esa akɛ Oya nɔ Oshiɛ Lolo?
1 Ani atsu Maŋtsɛyeli shiɛmɔ nitsumɔ lɛ he nii yɛ be kakadaŋŋ mli yɛ akutsoŋ ni oyɔɔ lɛ? (Mat. 24:14) Kɛji nakai lɛ, ekolɛ obaanu he akɛ átsu asafo lɛ shikpɔŋkuku lɛ mli nii bɔ ni sa. Agbɛnɛ kɛ ooshiɛ lɛ, ekolɛ gbɔmɛi pii ni okɛ amɛ kpeɔ lɛ feɔ tamɔ amɛnyaaa Maŋtsɛyeli shɛɛ sane lɛ he. Fɛɛ sɛɛ lɛ, kadimɔ nɔ ni akpɛlɛ nɔ yɛ Yesu anɔkwa kaselɔi lɛ ahe yɛ Yesaia Gbalɛ Kpo II wolo lɛ baafa 141 lɛ, akɛ: “Yɛ hei komɛi lɛ, ekolɛ nɔ ni jɛɔ amɛ sɔɔmɔ nitsumɔ lɛ mli baa lɛ baafee nɔ ko bibioo kwraa kɛ akɛto nitsumɔ ni amɛtsu kɛ mɔdɛŋbɔɔ ni amɛkɛtsu nii lɛ he lɛ. Shi kɛlɛ, amɛŋmɛɔ amɛtsui shi.” Shi mɛni hewɔ esa akɛ amɛya nɔ amɛshiɛ?
2 Kaimɔ Yeremia: Esaaa akɛ wɔ tsuishiŋmɛɛ yɛ anɔkwayeli mli yɛ shiɛmɔ nitsumɔ lɛ mli lɛ damɔɔ gbɔmɛi ni aaabo wɔ toi loo amɛbooo toi lɛ nɔ. Yeremia kɛ afii 40 shiɛ yɛ nakai shikpɔŋkuku lɛ nɔŋŋ mli, eyɛ mli akɛ mɛi fioo ko pɛ bo lɛ toi, ni mɛi pii teɔ shi woɔ eshɛɛ sane lɛ. Mɛni hewɔ Yeremia ŋmɛ etsui shi? Ejaakɛ eetsu nitsumɔ ni Nyɔŋmɔ fã lɛ akɛ etsu, ni nɔ ni baaba yɛ wɔsɛɛ be mli lɛ he nilee ni eyɔɔ lɛ tsirɛ lɛ koni eya nɔ eshiɛ yɛ faŋŋ mli.—Yer. 1:17; 20:9.
3 Shihilɛ mli ni wɔyɔɔ lɛ tamɔ nakai nɔŋŋ. Yesu “ewo wɔ kitã akɛ wɔshiɛ wɔtsɔɔ maŋ lɛ ni wɔye odase akɛ lɛ ji mɔ ni Nyɔŋmɔ efã eto hiɛkalɔi kɛ gbohii akojolɔ lɛ.” (Bɔf. 10:42) Shɛɛ sane ni wɔhiɛ lɛ ji wala kɛ gbele sane kɛha mɛi ni nuɔ lɛ. Abaadamɔ bɔ ni mɛi hereɔ sanekpakpa lɛ nɔ amɛhaa lɛ nɔ akojo amɛ. Akɛni nakai eji hewɔ lɛ, wɔ gbɛnaa nii ji ni wɔfee bɔ ni afã lɛ pɛpɛɛpɛ. Kɛji akɛ gbɔmɛi kpoo akɛ amɛaabo toi po lɛ, enɛ kɛ hegbɛ haa wɔ koni wɔtsɔɔ bɔ ni suɔmɔ ni wɔyɔɔ kɛha amɛ lɛ mli kwɔ ha, kɛ wɔhe ni wɔtuu wɔha Yehowa kɛtsɔ bɔ ni wɔkãa he wɔfeɔ nɔ ni esa akɛ wɔfee lɛ nɔ. Shi babaoo yɛ lolo.
4 Wɔmiiná He Sɛɛ: Nyɔŋmɔ suɔmɔnaa nii ni wɔfeɔ, yɛ bɔ ni ahereɔ nɔ yɛ shikpɔŋkuku lɛ mli lɛ fɛɛ sɛɛ lɛ haa wɔ mligbɛ toiŋjɔlɛ, tsui ni nyɔɔ mɔ mli, kɛ miishɛɛ, ni anyɛŋ ana yɛ gbɛ kroko nɔ. (Lala 40:9) Yiŋtoo diɛŋtsɛ baa wɔshihilɛi amli. Babaoo ni wɔkɛ wɔhe woɔ sɔɔmɔ lɛ mli lɛ, babaoo hu ni wɔkɛ wɔtsuii kɛ wɔjwɛŋmɔi mamɔɔ shihilɛ yɛ Nyɔŋmɔ jeŋ hee lɛ mli lɛ he hiɛnɔkamɔ kɛ miishɛɛ lɛ nɔ. Ŋmalɛ mli shiwoi nɛɛ ahe susumɔ haa wɔmumɔŋ shihilɛ yaa hiɛ, ni ewajeɔ wekukpaa ni ka wɔkɛ Yehowa teŋ lɛ.
5 Kɛji akɛ wɔnaaa nɔ ni jɛɔ wɔshiɛmɔ nitsumɔ lɛ mli baa lɛ amrɔ nɔŋŋ po lɛ, ekolɛ atɛo anɔkwale dumɔwu ko yɛ mɔ aŋkro ko tsui mli, ni enɛ baakwɛ̃ yɛ Yehowa be ni sa mli. (Yoh. 6:44; 1 Kor. 3:6) Wɔteŋ mɔ ko leee mɛi abɔ ni baaba abakase Maŋtsɛyeli lɛ he sane lɛ kɛtsɔ Yehowa webii amɔdɛŋbɔi anɔ, yɛ wɔmaŋ lɛ mli loo yɛ jeŋ fɛɛ.
6 Ehe miihia waa fe bei fɛɛ, akɛ wɔbo Yesu famɔ akɛ: “Nyɛkwɛa jogbaŋŋ, nyɛshia kpe ni nyɛsɔlea; ejaakɛ nyɛleee beyinɔ ni be lɛ shɛɔ. Shi nɔ ni mikɛɛɔ nyɛ nɛɛ, mɛi fɛɛ mikɛɛɔ: Nyɛsaraa!” lɛ toi. (Mar. 13:33, 37) No hewɔ lɛ, eba akɛ wɔ fɛɛ wɔɔya nɔ wɔjaje Maŋtsɛyeli lɛ he sanekpakpa lɛ, ni wɔha Yehowa tsui anya yɛ be mli ni wɔnáa egbɛi kpeteŋkpele ni yɔɔ krɔŋkrɔŋ lɛ hetsemɔ mli gbɛfaŋnɔ lɛ.